سماح أنور: الجمهور عارف إني هكبر وأعجز والطبيعي للممثل إنه يظهر من غير مكياج

نهال ناصر

نهال ناصر تاريخ النشر: الأربعاء، 1 أبريل 2026 | آخر تحديث:

سماح أنور

تحدثت الفنانة سماح أنور عن فكرة ظهورها في أعمالها بدون مكياج وخاصة مسلسل "حكاية نرجس" الذي عرض في رمضان 2026.

وقالت سماح أنور خلال لقائها في برنامج "كلمة أخيرة": "الطبيعي للممثل إنه يظهر من غير مكياج، اللي مش طبيعي أن الممثل يظهر بشكل واحد الجمهور بيمل، قناعتي الشخصية ومش بقول أن غيري غلط، بالنسبة ليا الصح أن الممثلة أو الممثل الجمهور عارف هو موجود من أمتى عايش معاك ومع أعمالك عارف إني هكبر وأعجز وعايز يشوف إيه الأدوار اللي هعملها لكن لو عايزة أفضل في سن وشكل معين وأفضل القمر، دا هيحددني كممثلة لو جيت أعمل "أم نرجس" مش هعرف أعمل الشكل".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت سماح أنور لتكشف عن رأيها في عمليات التجميل: "من حق كل حد يعمل اللي يسعده دا الصح بس مش شرط أن الصح بتاعك ينفع معايا، الممثل محتاج يسيب نفسه، أنا لو هعمل أدوار تناسب سني هتبقى ست عندها 50 أو 60 سنة ولو ست عايشة في منطقة شعبية ومهملة وبقالها 10 سنين محدش دخل غسل وشها هتبقى عاملة إزاي؟ أنا أسناني مركبة حاجات بقالها سنين طويلة، وقت مسلسل "حكاية نرجس" كنت بتعمد مغسلش وشي وأسناني بمضمض بس عشان تبقى لونها مصفر بسبب القهوة عشان يناسب الدور".

نرشح لك: محمد رمضان يكشف عن موعد عرض فيلم "أسد" بصور جديدة من العمل

وعن روتينها اليومي قالت سماح أنور: "أنا كسولة أوي مبحبش الرياضة، خلصت الرياضة وأنا صغيرة من وأنا عندي 8 سنين لحد 18 سنة شاركت في بطولات وأخدت ميداليات في سباحة وفروسية وكرة يد، يومي بيبقى عن شغلي والاهتمام بابني وحيواناتي ولو عندي مشاوير معنديش روتين إني أروح أعمل مساج أنا بتخنق من الحاجات دي".

وشاركت سماح أنور في رمضان 2026 بمسلسلي "حكاية نرجس" و"عرض وطلب".

ومسلسل "حكاية نرجس" مسلسل دراما اجتماعي يدور حول نرجس امرأة ثلاثينية تعاني من ضغوط اجتماعية بعد طلاقها ووصمها بالعقم، لتنغمس في أكاذيب وجرائم لتكوين أسرة وهمية تقودها لمصير قاسٍ.ز

المسلسل من بطولة ريهام عبد الغفور وحمزة العيلى، تامر نبيل، سماح أنور، دنيا ماهر، بسنت أبو باشا، وأحمد عزمى. قام بمعالجة وسيناريو والحوار عمار صبري، فكرة وإخراج سامح علاء، وإنتاج محمد مشيش.

فيما تدور أحداث مسلسل "عرض وطلب" حول مدرسة مكافحة تعيش في حي شعبي، تجد نفسها وحيدة في مواجهة تحديات قاسية، أبرزها إنقاذ والدتها المريضة بالفشل الكلوي، ورعاية شقيقها من ذوي الهمم.

المسلسل بطولة سلمى أبوضيف، محمد حاتم، علي صبحي، سماح أنور، إخراج عمرو موسى.