شريف رمزي لـ"في الفن": ممثلين وناس في الشارع سألوني عن نهاية "خالد نور وولده نور خالد" وتحليلات الجمهور مختلفة عن اللي هيحصل

نهال ناصر

نهال ناصر تاريخ النشر: السبت، 6 أبريل، 2024 | آخر تحديث:

شريف رمزي

في النصف الثاني من رمضان عرض مسلسل "خالد نور وولده نور خالد" ليستكمل معنا رحلة الكوميديا في الشهر الفضيل.

أحداث المسلسل غريبة ولا يفهمها الجمهور، انفجار نووي أدى إلى عودة والد "نور" شيكو المهندس "خالد" كريم محمود عبد العزيز ليعيشا معا في نفس الزمن، وفي رحلة بحثهما عن حقيقة ما حدث يرافقهما طبيب المخ والأعصاب "بدر" الفنان شريف رمزي، الذي تدور حوله علامات استفهام كبيرة إن كان هو سبب كل ما يحدث.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تواصل FilFan.com مع الفنان شريف رمزي ليحدثنا عن "خالد نور وولده نور خالد" وكواليسه والمقارنة مع "أشغال شقة".

نرشح لك: دنيا سمير غانم تكشف عن عمرها الحقيقي

في البداية تحدثنا مع شريف رمزي عن عودته بعد غياب طويل بمسلسل "خالد نور وولده نور خالد" وقال: "كنت مستني حاجة قوية أرجع بيها، أنا بشتغل لما بيكون في حاجة عارف أنها هتحقق نجاح وإحنا الحمد لله رقم 1 من أول ما بدأ عرض المسلسل و"تريند"، ساعات بيتعرض حاجات بحس أنها ضعيفة ومش بقبلها، بحب أكون في حاجة ليها معنى ودور كويس وظروف كويسة زي الإخراج والأبطال والإنتاج، بفضل إني مبقاش موجود على الفاضي".

وأكد شريف رمزي أن عناصر النجاح كانت متوفرة في مسلسل "خالد نور وولده نور خالد" قائلا: "حكمي الأساسي على أي عمل هو السيناريو، لما المنتج أمير شوقي بعتلي المسلسل قريته واستمعت بيه وكل العناصر كانت مناسبة، الدور حبيته ومحوري ومؤثر في الأحداث، الأبطال معايا أصحابي كريم محمود عبد العزيز وشيكو، والإنتاج أمير أخ وصديق عزيز والمؤلفين بحبهم والمخرج أستاذ محمد أمين بحب أفلامه".

شريف رمزي وشيكو وكريم محمود عبد العزيز

وتابع شريف رمزي: "إحنا مش ممثلين إحنا إخوات وكريم كان معايا في المدرسة، واشتغلت مع شكيو وكريم في أوائل أعمالهم، وغير الشغل إحنا على طول مع بعض، العلاقة تتعدى الزمالة بنروح الشغل وإحنا حابينه".

وعن أكثر المشاهد التي يحبها في المسلسل: "كل المشاهد حلوة في المسلسل، من أول ما نبدأ بنينا المسلسل على فكرة افتراضية، فأي مشهد فيه كوميديا، طالما بنضحك طول الوقت دي الأحداث بالنسبة لينا، حتى المشاهد اللي مفيهاش دراما كتير بيكون في ضحك، إحنا في كل حلقة بنمشي في مهمة وفي الآخر بنحاول نكتشف فيها إيه اللي حصل".

شريف رمزي وحنان سليمان ومحمد أبو داود

وخلال الأيام الماضية امتلأت مواقع التواصل الاجتماعي بتحليلات الجمهور للمسلسل وكلها تدور حول شخصية "بدر" التي يقدمها الفنان شريف رمزي وأنه السبب وسر كل ما يحدث وقال عن هذا الأمر: "تحليلات الجمهور عجباني جدا، وسعيد جدا هي دي الفكرة كنت متأكد أن دا هيحصل، تخمينات الجمهور عجبت كل فريق العمل وحتى المؤلفين سمعت مداخلة لأحمد عبد الوهاب بيقول أن في تحليلات ونهايات أحلى من اللي بنقدمها، في ناس حللت مشاهد وظهور شخصين شبه شيكو وكريم محمود عبد العزيز، وفي ناس قالت دا هيطلع حلم، من الحلقات اللي جايه كل حلقة هتبين وتكشف حاجات، والنهاية مختلفة عن كل توقعات وتحليلات الجمهور، وهتكون مرضية للجمهور إن شاء الله".

شريف رمزي وشيكو وكريم محمود عبد العزيز من كواليس مسلسل خالد نور وولده نور خالد

وأكمل: "هو مفيش حاجة الجمهور بيرضى عنها 100%، كنت بتكلم في ندوة وبيسألوني عن رأيي في النقد قلت لهم أن في فرق بين النقد وبين آراء الناس، النقد هو تحليل منطقي فني للمسلسل بشكل أكاديمي نتكلم عن التمثيل والمونتاج والموسيقى والإخرج، لكن آراء الناس سواء سلبية أو إيجابية هو رأي، وإحنا 100 مليون وطبيعي كل واحد يقول رأيه، لكن إننا نوصل لمرحلة أن حتى اللي مش عاجبينه بيتفرج علينا دا نجاح".

ومنذ عرض مسلسل "خالد نور وولده نور خالد" وهناك مقارنات بينه وبين مسلسل "أشغال شقة" لهشام ماجد، وكشف شريف رمزي عن رأيه في هذا الأمر وقال: "العرض في النص التاني وأننا نبدأ بعد مسلسل كوميدي وهو في أعلى نقطة ليه في الحلقة الأخيرة، وإحنا في أقل نقطة لينا الحلقة الأولى اللي بتعرف فيها الشخصيات والتمهيد هي بتكون أضعف حلقات، لو كنا نزلنا مع بعض كانت هتبقى منافسة عادلة، لكن إحنا نازلين بعد مسلسل مكسر الدنيا وكوميدي وفيه هشام ماجد لأن شيكو وهشام الناس متعودة تشوفهم مع بعض هيقارنوهم ببعض غير لو نازلين جنب أي فنان كوميدي تاني، لكن إحنا كنا متحضرين لده ولاختلاف الموضوعين كنا متأكدين إننا مختلفين والحمد لله هشام ماجد كان الأول في أول 15 يوم وإحنا الأول في تاني 15 حلقة، الحمد ربنا نصفنا لكن المقارنة هتحصل هتحصل وهي ظالمة، وقلنا لبعض منقلقش لحد ما الناس تاخد على المسلسل وتتعود على الأبطال".

شريف رمزي من مسلسل خالد نور وولده نور خالد

وكشف شريف رمزي لنا أن كل المحيطين به يسألونه عن نهاية المسلسل وهو بالطبع يرفض الكشف عنها قائلا: "في البيت الأولاد بيفتحوا المسلسل قبلي وسألوني عن النهاية، أنا بتسئل عن النهاية من مصر كلها لو نزلت كافية أو أي مكان في الشارع ناس بتوقفني تسألني، المسلسل عامل جدل جميل سعيد بيه، أنا في ممثلين كلموني سألوني قالولي قولنا ومش هنقول لحد، لكن رفضت لو عرفوا النهاية مش هيكملوا المسلسل".

وفي نهاية حديثنا أعلن شريف رمزي أنه لن يغيب عن الجمهور كما حدث وسيتواجد بفيلم جديد قائلا: "أنا مبطلتش كان عندي ظروف شخصية معطلاني إني اشتغل ومش لاقي حاجة أتواجد بيها ترضي الناس وترضيني أنا شخصيا، أنا مكنتش متوقف بالقصد أنا في عز ظروفي دي لو كان جالي حاجة حلوة كنت هوافق، بحب أعمل حاجة تسيب انطباع حلو الناس تفتكرني بيها، عندي فيلم جديد مش كوميدي بيدور عن قضية الاغتصاب، من بطولة 4 ممثلين في موقع تصوير واحد، لسه إحنا في مرحلة الكتابة أول ما نخلص بعد العيد هنبدأ نرشح المخرج وهو اللي هيرشح الأبطال".