التقى FilFan.com مع الفنانة يسرا اللوزي للحديث عن مسلسلها "صلة رحم"، الذي حصل على إشادات نقدية فور عرضه في النصف الأول من رمضان 2024، والقضايا الإنجابية التي يناقشها.
عبرت يسرا اللوزي عن سعادتها بالآراء عن المسلسل قائلة "مبسوطة قوي بردود الافعال وإنني شاركت في العمل دة لأنها تجربة حلوة رغم صعوبتها".
وحكت يسرا اللوزي عن فترة التحضير لدور "ليلى" التي تضمن انفصال الممثلة التام عن عالمها الخاص، إذ قالت "قفلت على نفسي في الأوضة 10 أيام تحضيرا للدور، بعد ما قريت أول كام حلقة وقعدت مع استاذ تامر نادي واتكلمنا في تفاصيل الشخصية وشكلها، طلبت إنني محتاجة أسافر وأبعد عن بيتي وعن مصر 10 أيام قبل ما أقف أدام الكاميرا، كنت محتاجة أرمي مسئولياتي وأنسى كل حاجة وأحط تركيزي في الدور، وفرق معايا قوي إنني مرجعش البيت. حياتي كلها كانت جيم وأكل ونوم".
تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا
وقد يلاحظ المشاهد شيئا مشتركا بين "صلة رحم" والمسلسل الرمضاني السابق ليسرا اللوزي، "جميلة"، وذلك لوجود صراع حول سرقة بويضات مجمدة، وعلقت الممثلة: "مخدتش بالي من التشابه بين صلة رحم وجميلة غير لما كتبتوا عن دة من يومين و حاسة إن هو كان مختلف كنوع مسلسل، وبيتم التناوي باختلاف، فمخدتس بالي إنني ناقشتها السنة اللي فاتت، بي هي صدفة، دة تأجير أرحام ودة سرقة بويضات".
وثم أبدت يسرا اللوزي رأيها في القضايا التي يتناولها "صلة رحم" وقالت "أنا عارفة إن الدين بيقول إن تأجير الأرحام غلط، بس زي ما حسام بيقول، كتير قوي الفتاوي بتتغير لما يحصل تطور في الطب. بس لو مش قادرة أخلف أو مش عندي فرصة يبقى عندي ولاد، أفضل أتبنى طفل، لأن في أطفال كتير قوي موجودين في الكوكب معندهمش حد يرعاهم، فممكن الابتلاء دة يخليني أعمل خير. الواحد ميقدرش يحكم غير لما يتحط في الموقف".
وأوضحت: "أنا كواحدة جربت الحمل مرتين، شايفة إن تأجير الرحم حاجة ظالمة للأم البديلة لأنها بتنمي علاقة مع الطفل وفي الشهر الرابع بيبدأ البيبي يتحرك وبيبقى في بينهم تواصل لكن هي مش بتفكر في دة في البداية".
وعن اللقطة الختامية التي تضمنت يسرا وأسماء أبو اليزيد معا ينظران إلى المولود الجديد، قالت: "أنا حسيت إن الطفل ليهم هما الاتنين، مينفعش واحدة منهم تتحرم منه".
وأبدت يسرا اللوزي برأيها في قضية أخرى ناقشها المسلسل وهي الإجهاض: "أنا رأيي إن الست ليها حق الاختيار لو عايزة يبقى عندها طفل ولا لأ، مش بس الست اللي غلطت او اتضحك عليها، بس ممكن يبقى أسرة عندهم 5 ولاد ومعندهمش مقدرة يصرفوا على طفل سادس. وممكن واحدة تتجوز واحد بيضربها ومش عايزة تخلف منه. بس أنا عارفة إنني هتهاجم على دة".
وفي يناير الماضي، شاركت يسرا اللوزي في الفيلم السينمائي "ليلة العيد" بالاشتراك مع يسرا وريهام عبد الغفور ولكنها انشغلت عنه أثناء تصوير "صلة رحم"، وأضافت: "مشوفتش لحد دلوقتي وهموت وأشوفه لأنني كنت بصور في لبنان".
وعن سرعة سحب الفيلم من دور العرض، قالت يسرا اللوزي: "حاسة إنه متعملوش دعايا كفاية، كان مركون 3 سنين ورغم إن في نجوم كتير وموضوعه مهم، المشكلة كانت في الدعايا، بس أنا برضه مكنتش متابعة قوي لأنني كنت مسحولة في دور ليلى فكنت بحاول مقعدش أهتم بسوشيال ميديا بس كل الممثلين دول كان ممكن يتعملهم حملة دعائية أكتر من كدة".
اقرأ أيضا:
والد ياسمين صبري يرد على تصريحاتها مع عمرو أديب: أحيانا يطلع عيل من عيالك براوي وناكر للجميل
بسمة بوسيل عن دعائها عن فتاة ليلة فرحها: أقل حاجة وتستاهل.. أفعى
لا يفوتك: يسرا اللوزي تكشف تفاصيل تحضيرها لـ صلة رحم : قفلت على نفسي الأوضة 10 أيام .. وهذا رأيي في الإجهاض
حمل آبلكيشن FilFan ... و(عيش وسط النجوم)
جوجل بلاي| https://bit.ly/36husBt
آب ستور|https://apple.co/3sZI7oJ
هواوي آب جاليري| https://bit.ly/3LRWFz5