حمو بيكا: أنا عمرو دياب الغلابة

مروة لبيب

مروة لبيب تاريخ النشر: الثلاثاء، 4 أبريل، 2023 | آخر تحديث: الثلاثاء، 4 أبريل، 2023

حمو بيكا

قال مغني المهرجانات حمو بيكا إن ما يقدمه أداء وليس غناء ورغم ذلك حاز على مشاهدات بالملايين وأن حسن شاكوش لا يغني بل يصرخ بينما يعتمد عمر كمال على الآلات التقنية.

وخلال لقائه في برنامج "العرافة" مع الإعلامية بسمة وهبة قال حمو بيكا أنا اللي ساعدت عمر كمال وحسن شاكوش اللي كنت بوجهه قدام الميكروفون هو اللي جه يقولي عايز أغني معاك ومكنتش أعرفه، وأنا كنت عمرو دياب الغلابة وعندي الدليل".

نرشح لك - حاتم صلاح لـ"في الفن": ارتجلت "كريز كريز" وأحمد السقا فاجأني برده والناس بتسألني في الشارع "إيه حصل في جمصة"

وأضاف حمو بيكا "حسن شاكوش في واحد عرفني عليه وقالي ساعده ومكنش عنده استوديو وهو بيحط ممول عشان أغانيه تجيب مشاهدات.. أول أغنية عملتها لحسن شاكوش جابت 15 مليون مشاهدة.. وأنا اللي طلعته للنور ولما اتشهر والغرور خده مني بقى يعمل أغاني لوحده".

وخلال الحلقة تحدث حمو بيكا عن أزمته مع نقابة الموسيقين خلال فترة النقيب هاني شاكر.

وقال حمو بيكا "كل اللي هاني شاكر عمله معايا إنه قعدنا في البيت وهو كل شوية عمال يتكلم إنه جابلي سنتين حبس، وأنا راضي بالقانون بس كل اللي هو عمله معايا ظلم لما يخلي كل بتوع المهرجان يغنوا وأنا لا.

وتابع حمو بيكا: ربنا جابلي حقي وجابلنا نقيب ربنا يخليه لينا، والمجلس القديم جايبنلي مدرس يقولي لا ليه لا، وهاني شاكر على دماغنا وكل اللي هو عمله إحنا عملناه برضو.

وأضاف حمو بيكا: النقيب مصطفى كامل نقيب الموسيقيين على دماغنا من فوق وهو اللي جابلنا حقنا.. والمهرجانات اسمها أغاني وليست مهرجانات ونقيب الموسيقيين لا يرغب في تسميتها مهرجانات.

واختتم حمو بيكا: وافقنا على رغبة مصطفى كامل وأصبحنا نطلق على المهرجانات اسم أغاني ولا نشعر بالحزن مطلقا، الأغاني الخاصة بنا لا نطلق عليها أغاني شعبية.