عفاف شعيب: بسبب وقف الاستيراد مش لاقيه البدل الألماني اللي كنت بجيبها

نهال ناصر

نهال ناصر تاريخ النشر: السبت، 24 سبتمبر، 2022 | آخر تحديث:

عفاف شعيب

كشفت الفنانة عفاف شعيب عن معاناتها في اختيار الملابس المناسبة التي تخص المحجبات خاصة بعد قرار وقف الاستيراد.

وقالت عفاف شعيب خلال لقائها في برنامج "كلام الناس" من تقديم ياسمين عز عبر قناة mbc مصر: كنت بسافر كتير وبجيب لبسي كله من برا ودلوقتي مفيش استيراد والواحد في حوسه بالذات علشان الذوق اللي بيعجبني، في محل بتعامل معاه من زمان كنت باخد ملابس حتى قبل الحجاب، بطل دلوقتي يجيب حاجة، كنت بجيب من عندهم كل البدل المستوردة كلها ألماني.

عفاف شعيب من برنامج كلام الناس

وتابعت: أنا لازم ألبس حاجة حلوة الناس متقولش إيه الحجاب ده المحجبة لازم تهتم بشكلها ولبسها وأناقتها وتكون منظمة، ببذل مجهود وبقلب الدواليب وأقول يارب اخترلي.

نرشح لك: شيرين عبد الوهاب في وصلة رقص بسهرة خاصة بالإسكندرية (فيديو)

تألقت عفاف شعيب خلال فترة الثمانينات وقدمت العديد من الأعمال في السينما والتليفزيون

وعن قول الجمهور عنها أنها تصرف أموالها على ملابسها قالت: دي نعمة، وربنا بيحب إن النعم تظهر علينا، وأنا لازم أمتع نفسي وألبس واتشيك ومش بهتم بالتحويش إيدي سايبة.

على جانب آخر، كشفت عفاف شعيب خلال الحلقة عن محاولة إحدى صديقاتها لخطف زوجها رجل الأعمال طارق العريان منها.

وقالت: واحدة عملتلي عمل علشان تاخد جوزي مني، ووقتها انفصلنا وحاول يرجع تاني لكن أنا رفضت، قسما بالله ما في حد جيه عليا وبقول يارب إلا وربنا بياخد لي حقي، واللي عملتلي العمل قولت يارب أنت وكيلي وحسيبي، العربية اتقلبت بيها وعايشة عاجزة لغاية دلوقتي.

الفترة الماضية انتشرت شائعات عن وفاة عفاف شعيب أزعجتها كثيرا

كما تحدثت عن فترة زواجها من رياض العريان وما قيل وقتها أنه يشتري لها هدايا باهظة وقالت: أنا عمري ما طلبت منه جنيه، كنت عاوزة اشتري عربية مرسيدس سنة 1988 وقالوا مفيش تقسيط كان كاش وتمنها كان 45 ألف جنيه، طلبت من رياض يسلفني 5 آلاف جنيه، رفض وربنا بعتلي شغل واشتريت العربية.

آخر أعمال عفاف شعيب كان مسلسل زي القمر

يذكر أن عفاف شعيب شاركت مؤخرا في مسلسل "زي القمر"، الذي عرضت آخر حلقات موسمه الثاني في ديسمبر من العام الماضي، وشاركت في بطولته مجموعة من النجمات ضمت درة، صابرين، آيتن عامر، مى كساب، سوسن بدر، وداليا مصطفى.