عبير صلاح الدين: محمد صبحي حاربني

مي جودة

مي جودة تاريخ النشر: الجمعة، 9 سبتمبر، 2022 | آخر تحديث:

عبد الله مشرف ومحمد صبحي وعبير صلاح الدين

كشفت الممثلة عبير صلاح الدين التي اشتهرت بدور "عبلة" في مسلسل "عائلة ونيس" عن سبب ابتعادها عن الفن وهجرتها لكندا.

قالت عبير صلاح الدين: "رفضت استكمال تصوير باقي أجزء مسلسل ونيس، شعرت أني لا أقدم جديد، من حقي كممثلة أرفض الدور لو مش حاسة أني هقدم جديد، وأنا مش هحرق الشخصية بعد نجاحها، لأني فنانة بحب فريق العمل والمصداقية عندي أهم شيء، وما كنتش قادرة أعمل كده لأن الممثل مش آلة هتدوس على زراير يشتغل لأ لازم يكون في إحساس"، حسب تصريحاتها لبرنامج "كلام الناس" الذي تقدمه ياسمين عز الدين.

عبير صلاح الدين

وتابعت: زملائي الفنانين حذروني، قالوا لي كده مش هتشتغلي وهتعقدي في البيت، لكن أنا قلت الرزق بتاع ربنا وحاولت كتير لكن كل البيبان كانت متقفلة، لحد ما جالي اكتئاب خمس سنين من 2010 حتى 2015 وكل المحطات بتتقفل في وشي.

وأضافت: من هنا حاربني محمد صبحي لأني قلت لا، هو حارب نجوم غيري كتير ولو لاحظنا هتلاقي إن الناس اتغيرت في مسلسل عائلة ونيس من أول جزء حتى الجزء السابع، ودا لأن اللي بيقول لا أو بيزعل محمد صبحي بيموته في الموسم اللي بعده وبيسفره.

عبير صلاح الدين

واستكملت حديثها قائلة: نصحوني اعتذر لمحمد صبحي عشان ما أقعدش في البيت، ولكني مش ندمانة ومش هعتذر لأني مغلطتش ودا حقي كممثلة إني أقول لأ، وبدأت أحس بحاجة من نوع أنا االلي عملتك من غير ما تحسي.

عبير صلاح الدين

يذكر أن مسلسل "عائلة ونيس" قُدم منه 8 أجزاء، تم عرض الجزء الأول منه عام 1994، والأخير في 2013، وشارك في بطولته كل من محمد صبحي وسعاد نصر وجميل راتب وعبد الله مشرف وسامح الشجيع وهدى هاني وهادي خفاجي وريم أحمد ومن تأليف مهدي يوسف ومحمد صبحي وإخراج أحمد بدر الدين ومحمد صبحي.