الظهور الأول لمحمد يسري بعد تعرضه لجلطة في القلب

مي جودة

مي جودة تاريخ النشر: السبت، 30 يوليو، 2022 | آخر تحديث:

محمد يسري

طمأن الفنان الشاب محمد يسري جمهوره على حالته الصحية بعد تعرضه لجلطة في القلب مؤخرا، وخضع لعملية قسطرة وتركيب دعامة في القلب.

وقال محمد يسري، في فيديو نشره عبر حسابه الشخصي بتطبيق Instagram: "أنا مبسوط إني بعمل الفيديو ده بالذات بعد التجربة اللي عديت بيها، والحمد لله إني قادر أطمن الناس، أنا تعرضت من أسبوع فجر يوم الأحد لوعكة صحية، حسيت بوجع شديد جدًا في صدري، وضغطي وطي جدًا وجسمي كان متلج، مكنتش أعرف ده إيه وكنت متخيل إنه حاجة وهتعدي، خاصة إن مفيش سبب إن ده يحصل".

وتابع: قعدت شوية في البيت لأني للأسف مش شخص ممكن يروح المستشفى طواعية، ودي طبعًا كارثة، وبعد شوية ربنا ألهمني إني لازم أتحرك، وروحت المستشفى، الناس استقبلتني على طول، وكانوا متخيلين إن الدنيا تمام لأني دخلتلهم على رجلي، لكن بعد ما بدأنا نعمل فحوصات طلع عندي جلطة في الشريان الأمامي في القلب، والجلطة دي عملت شبه انسداد كامل في الشريان، فالدم مش داخل بسهولة، فاضطريت في ساعتها إني أعمل قسطرة وأركب دعامة في القلب، واتحجزت يومين في العناية المركزة، وبعدها يومين في غرفة عادية، وخرجت الحمد لله، قدر ولطف.

محمد يسري

وأضاف: مفيش أي ضرر دائم أو أي حاجة أتأثرت بشكل دائم، ولكنها تجربة صعبة أوي، ارجوكم متتهاونوش في الصحة، لأن الحقيقة إن الدكاترة كلهم قالوا إن مكنش ينفع أتأخر أكتر من كدة.

وأشار يسري إلى أنه يخضع الآن لفترة نقاهة، قائلا: "أنا مكنتش عايز أقول إني في المستشفى لأني مكنتش عايز أقلق حد، أنا الحمد لله في بيتي وفي فترة نقاهة لمدة أسبوع، وهرجع تاني لشغلي وفي حاجات هعلن عنها قريب يارب تكمل على خير، حقيقي ربنا قدر ولطف، دائمًا في كل ابتلاء رحمة، لما طلعت من العناية المركزة وبدأت أجمع، كمية الناس اللي سألت وحابة تطمن عليا الحمد لله، وألف شكر وربنا يخليكم ليا.

محمد يسري

واختتم حديثه بتوجيه الشكر لنقابة المهن التمثيلية، قائلة: كل الزملاء والأصدقاء، ونقابة المهن التمثيلية، والنقيب دكتور أشرف زكي، ألف شكر، مسابنيش ثانية، والفنان عزوز عادل حبيبي، ربنا يخليكم ليا وألف شكر.