أمينة شلباية لـ"في الفن": اللي بيتريقوا على فيديوهات الاتيكيت جهلة وهخليهم ياكلوا بالمعلقة بدل إيديهم

مروة لبيب

مروة لبيب تاريخ النشر: الثلاثاء، 28 يونيو، 2022 | آخر تحديث: الثلاثاء، 28 يونيو، 2022

أمينة شلباية

ردت خبيرة الموضة والتجميل أمينة شلباية على حالة الجدل المثارة عبر مواقع التواصل الاجتماعي بسبب فيديوهات الاتيكيت التي نشرتها مؤخرا.

وعلى مدار أيام نشرت خبيرة الموضة أمينة شلباية العديد من مقاطع الفيديو تشرح فن الاتيكيت في تناول الطعام والجلوس وأثارت موجة من السخرية وتباينت ردود الأفعال ما بين مؤيد ورافض.

وفي تصريحاتها لموقع FilFan.com، قالت أمينة شلباية "بنبسط بردود الفعل لأن الفيديوهات بالشكل دا بتنتشر أكتر فالناس اللي عايزة تتعلم هتتعلم".

نرشح لك - مفاجأة غير متوقعة.. محامي أسرة شيماء جمال يكشف السبب الحقيقي وراء مقتلها

وأضافت أمينة شلباية "الاتيكيت كان في برامجي علطول لكن مكنتش بقدمه زي ما بقدمه دلوقتي عالسوشيال ميديا ولما قدمته عملي الناس ثارت لكن مش مشكلة هتتعلم، وجزء كبير من الناس مستمتع وعايز أكتر فاللي بيتريقو مش عايزاهم يوقفوه ولا بيهزلي شعرة ودا كويس عشان كل ما الفيديوهات تنتشر كل ما الناس تتعلم اكتر".

وتابعت أمينة شلباية "زمان في برامجي كنت بقدم نصايح للموضة والعناية بالبشرة والناس كانوا بيقولوا دي فاضية بس دلوقتي كل الناس بيعملوا فيديوهات من النوع دا".

وأوضحت أمينة شلباية "عمري ما هوقف فيديوهات وكل التعليقات باسطاني لأني واثقة من اللي بقدمه وكل اللي بيتريقوا يإما عايزين يركبوا التريند يإما مش واثقين في نفسهم أو جهلة مش عارفين فاللي مش عارفين دول هيتعلموا واللي بياكل بإيده هيمسك معلقة وبعد كدا يمسك شوكة وبعدها ياكل صح والموضوع بالتدريج".

وأشارت أمينة شلباية إلى أن ما أثار الجدل هو تقديمها لفن الاتيكيت بشكل عملي مضيفة "لسة في بلاوي هتنزل".

وتابعت شلباية "الستات دلوقتي بتسألني عن الروتين اليومي للبشرة وزمان مكانوش يعرفوا يعني إيه أنا اللي حفظتهم وكم البرامج عن العناية بالبشرة أنا مصدرها".

وأشارت شلباية إلى أن هناك الكثيرون ممن يدعمونها ومعجبين بما تقدمه ويطالبونها بالمزيد لافتة إلى أن السخرية منها نابعة من جهل أو ركوب التريند وهي تراها بشكل إيجابي لأنه يدل على الانتشار.