الملخص - نيللي كريم في "يوم ليك": مقصرتش مع أي شخص تزوجته.. وفاتن حمامة قالتلي إنتي فنانة قديرة

محمد أحمد

محمد أحمد تاريخ النشر: الجمعة، 24 سبتمبر، 2021 | آخر تحديث: الجمعة، 24 سبتمبر، 2021

سمر يسري ونيللي كريم

حلت الفنانة نيللي كريم ضيفة أمس ضيفة على برنامج "يوم ليك" من تقديم الإعلامية سمر يسري عبر قناة "الحياة".

كشفت "نيللي" الكثير عن حياتها الشخصية والمهنية وأمور أخرى كثيرة سنرصدها إليك في الملخص التالي:

نرشح لك: ياسمين عبد العزيز تعود إلى مصر بعد رحلة علاج في سويسرا

- بحب الطبخ وبعرف أعمل سلطة روسي ورنجة بالبنجر.

- أنا بشوف نظرة المجتمع محترمة أو دى النظرة اللى بشوفها، ولما بشوف تعليقات سخيفة على Instgram بلاقى التعليقات الكويسة أكتر بكتير.

- بحب كل حاجة لها علاقة بالفن سواء رقص أو تمثيل أو غناء، ليا ذكريات حلوة في الأوبرا وساعات بندم إني مكملتش مسيرتي بها، لأن المسرح له رونق خاص.

- دخلت التمثيل من خلال فوازير "حلم ولا علم" سنة 2000، ودخلت التجربة عشان كنت بحب الرقص والغناء كان أدائى على مقدار الفزورة، ومفيش بنت في مصر مكانتش بتحب نيللي وشريهان، ولما اتعرض عليا أعمل فوازير اتبسطت ولما دخلت التجربة الموضوع صعب جدا.

- أنا قليلة الكلام عموما وفي البرامج مكنتش واخدة راحتى وكنت بجاوب على قد السؤال، ساعات بتفرج على حواراتي القديمة بحس إني هبلة أوي بس بتفرج بابتسامة.

- عشت 10 سنين من عمري في روسيا، ومعرفتي بالأفلام والثقافة في مصر كانت من خلال أفلام الأبيض والأسود.

- وأنا صغيرة في موقف لا أنساه وأنا عندى 5 سنين كانوا بيقولوا عليا بنت كيوت ولما يسألوني اسمك إيه وأقولهم نيللي يتريقوا عليا ويقولوا نيللي بتاعة الفوازير.

- والدي توفى وعمري 16 سنة، وولادي لهما تأثير كبير في حياتس، وبتكلم عن والدتي لأنها شالتني وشالت أولادي ولو لم تقف بجانبي لم أكن أصل لما وصلت له.

- في موقف لا أنساه لما رجعنا مصر، وكنت بروح أكاديمية الفنون معهد الباليه، ووقتها عملت "ألف ليلة وليلة"، وفاكرة إن في خبر كان في الجورنال نيللي محمد السيد عطالله، لقيت والدى مقصقص الجزء ده ومحتفظ بيه.

- الشغل جزء منى ومن كياني وشخصيتي ولو قصرت في حاجة هاكون قصرت مع ولادي إنى مقعدتش معاهم فترة كافية، ولكن أنا لم أقصر مع أي شخص تزوجته، ولو رجع بيا الزمن عمري ما كنت هضحي بشغلى وكياني.

- علاقتي بطليقي كويسة وبينا بنتين، واحدة عندها 13 سنة والتانية عندها 9 سنوات، ومحبش حد منهم يسمع إني أقول كلمة وحشة على والدهم ولا هو يقول كلمة وحشة على والدتهم، حتى لو في مشاكل بيننا لازم الواحد ميتكلمش عنها.

- انصح بنتي الاهتمام بنفسها وكيانها ولما تلاقي الشخص المناسب تبقي تتجوزه ولكن الأهم إنها تسعد نفسها ولكن لو على الحب فالحب بعدين لكن لازم أحب نفسى الأول وفي بنات كتير بتتجوز وهى معندهاش كيان ومش عارفة هي عاوزة إيه.

- أنا قولت أن علاقتي بزوجي السابق هاني أبو النجا كانت "11 سنة نكد" بعد شهر واحد من الانفصال وكنت على خلاف معه في ذلك التوقيت، ولكن دلوقتي علاقتنا جيدة وإيجابية للغاية.

- تصريحي ضد زوجي السابق لم يزعج بناتي عشان مشافوش البرنامج وقتها بسبب صغر سنهما، وأنا مش عاوزة أحسسهم أن فيه خلافات أو أراء سلبية بينا أحنا الاتنين.

- دايما بيجيلى حلم بحلمه إن عندي عرض في الأوبرا وأنا متأخرة والعرض راح عليا.

- مش بحب الأماكن المغلقة، ولا الارتفاعات، وبخاف من الاكتئاب ومش بحب أكتئب وبهرب من فكرة ان مودي يبقى وحش، وابعد عنها تماما، واسمع حاجات إيجابية واسمع مزيكا.

- بحب الفن والناس الموهوبة على كل المستويات، والحياة تستوعب كل حاجة بما فيها أغاني المهرجانات وكل فنان الجمهور بيبص له حسب شغله.

- مسلسل "بـ 100 وش" هيتعمل فيلم سينما وجاري التحضير لذلك، وهو العمل الأحسن والأنجح ولكن مسلسل "لأعلى سعر" كان ناجحا وكذلك "ضد الكسر".

- ممكن أقدم دور فتاة ليل، زلو خيروني تقديم فيلم للفنانة هند رستم هيكون فيلم "إشاعة حب".

- قدمت لأول مرة دور الست القوية في مسلسل "ضد الكسر" وأنا قلبي جمد في الحياة، وبنسبة كبيرة بطلت أعيط ومش حساسة زيادة عن اللزوم، وأصبحت أكثر هدوءًا في المواقف.

- لما اشتغلت مع كاملة أبو ذكري في فيلم "واحد صفر" فهمت يعني إيه الشغل مع مخرج بجد وحقيقي، وفيلم "سحر العيون" كانت تجربة حلوة، ولكن مش ده اللي كنت عاوزاه.

- جمعتني صداقة بالفنانة فاتن حمامة وكانت بتتفرج على أعمالي وتقولي رأيها، مثل مسلسل "سجن النساء" و"ذات" وكان عاجبها جدا، وقالت لي "بقيتي فنانة قديرة".

لا يفوتك: تعذيب ومخدرات ودعارة وسياسة ... 36 نجما خلف القضبان