شادي شامل: تامر حسين حذف أغنيتي والأخير يرد: مش مقتنع بيك كمطرب

نهال ناصر

نهال ناصر تاريخ النشر: الأحد، 23 مايو، 2021 | آخر تحديث:

شادي شامل وتامر حسين

أزمة جديدة في الوسط الغنائي، بين المطرب شادي شامل والشاعر تامر حسين.

بدأت الأزمة بمنشور كتبه شادي شامل، بعدما حذف موقع الفيديوهات YouTube أغنيته الجديدة "يا معود قلبي"، وأوضح أن تامر حسين وراء حذف الأغنية وكتب: "تامر بيدعي اني ما دتوش فلوس الاغنيه مع انه عاملي تنازل من سنتين علي الاغنية في المصنفات الفنيه ومختوم بختم الجمهورية وواخد اجره المادي الكامل باعتراف منه و معترف بذلك في التنازل وقالي بعد ما عمل التنازل الاغنيه ملكك يا شادي انت تعبت وتستاهل".

نرشح لك: "ناس فاضية"..أول تعليق من تامر حبيب بعد الهجوم عليه

وتابع "بيقول عليا حرامي واني سارقته هو عامل التنازل بكامل ارادته وكلمني وبعتلي رسايل وهو في المصنفات الفنيه عشان ابعتله صوره جواز سفريوعندي بالدليل برده حظه الوحش ان كل حاجه عندي متوثقه بالدليل وكان بيجيلي الاستوديو ويشهد علي ذلك الموزع مهاب سامي وتامر كان في الاستوديو بيوجهني مع اني ملحن الاغنيه بس ما حبتش اكسفه ورفع عليا قضيه في المحكمه الاقتصادية بعد سنتين من التنازل و يطلب من المحكمه بالغاء التنازل و المحكمه ادته حكم بعدم الاختصاص و هذا هو قضاء مصر المحترم ولم يصدر حكم رسمي بعدم نزول الاغنيه ووقف الاغنية".

ورد تامر حسين على ما كتبه شادي شامل وقال عبر حسابه على Facebook: " الحقيقة انى والله ما باحب أرد على بوستات المشاكل دى تماماً وعلى عينى بس قدرنا والحمد لله وعندى صحة كلامى ب مسجات و واتس أب وأساتذتنا فى المصنفات الفنية الزملاء المحترمين
وحاجات مايصحش تظهر ف العلن ذوقياً وكرم أخلاق منى اه والله العظيم ما خفى كان أعظم بس حاكتفى ب الرد على نقطتين محتاجين توضيح المُقابل المالى وعدم إقتناعى التام بالشخص كمطرب".

وتابع: "لإن واضح ان الناس مؤخراً فاهمه البجاحه تريند أعمِل ايه عشان أكسب تعاطف الناس ؟؟؟ اه أقول دى كانت اغنيتى وكان حايدوها لمطرب كبير وكلمتين مؤثرين مُستقبلى وحرام فا يتعاطف الناس اللى ماتعرفش الحقيقة والله يسامحه اللى بدعها".

وحكى تامر حسين ما حدث بينهما قائلا: "الأخ كلمنى ف 2019 على كلام الأغنية اللى المفروض يغنيها (مُطرب) أو أى فنان له جماهيرية يضيف للعمل ويشهره يشهر لحن الأستاذ ويشهر كلامى ونستفاد كُلنا ان قُدر لها النجاح والجمهور حبها والحقيقة مش الأغنية دى تماما، قالى مراتى قررت تعملى الأغنية دى (للشاب خالد )وقالى أنه يغنيها الشاب خالد دويتو معاه قولتله أفيدلك تخلى الشاب خالد يغنيها لوحده لان صوتك جنبه حايبقى على قدهأنت توصل اللحن أوك انما ديو دى حاسسها تعملك مشكلة أكتر ما تفيدك وفر فلوسك، المهم دخلنا ف الجد قالى عايز التنازل عشان أطمن خالد ومراتى تتأكِد من جدية الموضوع لا تفكرنى بهزر معاها بكُل حُسن نية وذوق منى (سّبقت وخلصت) الورق المطلوب منى عشان انقذله الموقف ويطلع صادق".

وتابع: "فجأه بعد حماسه والشاب خالد وحلم الأحلام اللى عايز يأكده للمقربين منه إختفى لا جاب سيرة مقابل ولا خدت منه مليم والله العظيم وحياة أولادى ما خدت (منه مليم )وهيبقى عنده مليون طريقة إثبات رقم حساب بنكى اى ايصال تحويل مسج بيقولى بعتلك كذا أى أمارة حتى يقول للمدام ان فلوسها مارحتش ف الهوا ويثبت صحة كلامه كل ده ماخدتش أصل التنازل فوجئت بمكتب المُصنفات وانا براجع معاهم ورق قالولى أنه جه يطلع أصل التنازل من الصورة عشان الأصل ضاع منه طب ده حضرتك تسميه ايه(سرقة والا نصب والا بجاحه والا هبل) إختاروا انتوا المُسمى المُناسب".

وأكمل: "كتفيت انى أعمله بلوك لكل أرقامه وفضلِ من 2019 لـ 2021 لحد من 3 شهور بيوسط أى حد أعرفه وقريب منى انه بيعتذرلى وانه غلطان وعرف غلطته وقالهم خلونى أقابله وانا رافض رفض تام وزمايلنا اللى وسطهم يشهدوا فضِل ورايا قد ايه ؟؟؟؟ يعتذر ويتأسِف لحد من 3 شهور كلمنى من رقم غريب رديت قالى بالنص (والنبى ماتقفل السكة فى وشى انا اسف) وغلط وعايزك تسامحنى إتحرجت وقلت عفى الله عما سلف، بس لا تكلمنى فى فن ولا تبعتلى الحان والاغنيتين تلاته اللى عاملهم معاك انسى كلامهم قالى حاضر انا ماشفتش منك غير كل خير وحقك عليا يا أخويا وصفحة جديدة، قابلت صديق لينا مُشترك بيقولى لسه شايف فيديو اغنيتك مع الشخص ده قولتله لاء ده انا مش مديله تنازل بيها وكنت عامله محضر وبعتلى رسايلى أرجوك انا صرفت اللى ورايا وقدامى ع الفيديو خليك جدع معايا وسيبهالى أسيب اللى سرقنى؟ ونصب وكدب ؟ واسيب لك ليه ؟ وانا مش مقتنع بيك كمطرب أنا فوق راسى أحلامك انت والمدام بس ماليش علاقة بيها نفذها بشرف مش على أكتاف ناس مُحترمة، راح صور الكليب دون علمى دون دفع مقابل مادى واستحل حقوقى وقال يعنى بيحطنى قدام الأمر الواقع وهو عارف انى والله لو كان دفعلى مال الدنيا ماكنت هشتغل معاها بعد الإنطباع السىء اللى سابهولى".

وأغنية "يا معود قلبي" كلمات الشاعر تامر حسين وتوزيع مهاب سامي ومهندس الصوت محمد صقر.