اسمحوا لي أن أشارككم معي يا أعضاء "في الفن" الأعزاء في عرض بعض مما أعجبني وأحببته فيما عاصرته خلال رمضان الماضي، وما لم أحبه و"كرهته" فيه، بالإضافة إلى ما كان "عادي" ومر أمامي مرور الـ"ترام".
-"حبيت" أداء الولد اللي في الإعلان مع أحمد مكي بتاع "بيبسي" بتاع "هادي"، والحتة اللي بيقولوا فيها "بنفسكّّ؟!" ، وكمان "وحوي يا عمو .. وحوي يا حبيبي" دول جامدين أوي :)
-عجبني جدا أداء أحمد عز في "الأدهم"، وسيناريو محمود البزاوي كان جامد كمان.
-"حبيت" أداء ليلى علوي العالي جدا جدا في مسلسلها "حكايات بنعيشها"، وبالأخص الجزء الأول منه "هالة والمستخبي"، اللي بصراحة مقدرتش أفوت منه حلقة واحدة من كتر "وجع القلب" اللي عشنها فيه، أما الجزء الثاني "مجنون ليلى" فلم أتابعه بنفس شغف الأول، ولكني تحمست لأداء خالد أبو النجا في الحلقات الأخيرة عندما اكتشفت الفرق بين شخصيتيه مع الانفصام في الشخصية اللي حصل له، برافو يا "ليلى" وبرافو خالد كمان.
-"حبيت" احساس جنات في تتر المسلسل ده، الكلام جامد أوي يا أيمن، "عن نفسي أعصابي سابت من الناس واللي جرالهم" .. و"طالع عين اللي جابونا"، برافو لكل فريق العمل فيها جنات وأيمن بهجت قمر ومحمود طلعت والمنتج أحمد الدسوقي.
-حبيت جدا أداء النجم خالد صالح في "تاجر السعادة"، لإنه قدر يعمل بصمة خاصة بيه وتحمل اسمه لدور الأعمى "الدجال"، رغم أن المسلسل نفسه لم ينل إعجابي.
-حبيت أوي أداء البنت الصغيرة آية رمضان اللي عملت دور ليلى مراد في مسلسل "أنا قلبي دليلي"، البنت ديه إن شاء الله ليها مستقبل حلو أوي في الفن.
-كرهت أوي تقليد أحمد فلوكس لحركات أنور وجدي اللي بتوتر، لما كان بيقعد يودي وشه يمين وشمال زي المجانين، رغم أن فلوكس لما كان بيعمل لحظاته كأنور من غير توتر كان تمثيله جامد بس أنا مش طايقة إنه كان بيعمل زي ما أنور كان بيعمل في أفلامه، مستحيل يا جدعان حد يتقمص شخصية فنان تاني من أفلامه، عشان لو أنور الله يرحمه بيعمل كده في الحقيقة كنا عرفنا من التاريخ إنه كان مريض بالتوتر الجسدي المذمن ده في حياته الطبيعية!
-وكرهت أوي صوت صفاء سلطان الرفيّع عشان تقلد ليلى مراد، وكرهت أكتر إنها شكل شادية أكتر من ليلى مراد.
-حاجة كمان كرهتها في المسلسل ده قبل ما أسيب سيرته، صوت المطربين كان مزعج جدا لكل المطربين، مافيش حد فيهم قريب من الصوت الحقيقي للفنانين دوول، وأولهم طبعا صوت المطربة إيمان عبد الغني اللي بيقولوا إن صوتها قريب من ليلى مراد، قريب من أنهو ناحية يعني!
-بس حبيت في المسلسل فكرة سرد التاريخ والأحداث بشكل صادق وغير مفبرك، وحبيت أوي كمان الملابس، خصوصا لبس راقية إبراهيم قبل ما تخش المجال السينمائي، ولبس ليلى مراد كان مميز برضه.
-ماحبتش إن فريق عمل مسلسل "ليالي" كانوا مصرين على أنهم ينفوا إن المسلسل بيحكي قصة الفنانة الراحلة سوزان تميم ورجل الأعمال هشام طلعت مصطفى، أنا كان أهون عليا من كل الصداع اللي حصل ده والدعاية اللي ببلاش "المضللة"، اللي الإعلام خد الطعم بتاعهم وعملها، كان فريق العمل قال إن القصة مشابهة عن طريق الصدفة وخلاص، لا هما يأكدوا إنها قصتها ولا ينفوا إنها مش قصتها، وكانت القصة خلصت على كده!
-حبيت أداء يوسف الشريف في "ليالي" اللي ظهر أكثر كلما مرت الحلقات عليه، برافو يوسف.
-بس أداء زينة كان "عادي" بالنسبة لي، حسيت إن أداءها كان يمكن محتاج حوار أجمد من كده عشان هى تقدر "تبدع"، هى محتاجة فرصة كمان عشان تثبت إنها تقدر تشيل بطولة لوحدها بجد، وهى تقدر .. وهاتشوفوا.
-كرهت بطء أحداث مسلسل "حرب الجواسيس"، وإزاي ضغطوا الأحداث الجامدة في آخر حلقتين بس!
-ده غير التهريج اللي كان ظاهر خلال الأحداث، زي مثلا إنك تلاقي عربية عليها "ملاكي القاهرة" في مطار روما! أو إنك تلاقي الإعلان عن تخفيضات صيف 2009 في محلات روما، وشوية حاجات من هذا القبيل، واللي كنت ألاقي الرد المقنع الوحيد "والساخر" ليها ممن حولي هو إن "دوول مخابرات يا ستي ويقدروا يعملوا أي حاجة"!
-بس كان أداء هشام سليم جامد جدا، برافو برافو يا أستاذ هشام.
-حبيت أوي حوار مسلسل "خاص جدا" بتاع يسرا اللي كتبه الفنان الجميل تامر حبيب، الراجل ده فنان بجد ومبدع.
-بس ده ميمنعش رتم الأحداث البطئ اللي أحيانا كان يفصلني عن إعجابي بالحوار وبالشخصيات الثانوية اللي ظهرت في الأحداث.
-مثل دور كارولين خليل وبسمة وفلوكس، حتى تامر حبيب نفسه عندما ظهر وكان مريض نفسيا، كلهم أداءهم كان مبهر ومثير للاهتمام جدا.
-أما إيمي سمير غانم فهى اكتشاف فعلاً ، ما شاء الله يا أستاذ سمير عندك بنتين فيهم موهبة وطاقة مرعبة، أحييك على إبداعك فيهما وأهنئك عليهما.
-نيجي للجميل الأرندلي "الداهية" الفخراني، الراجل ده في مسلسله "ابن الأرندلي" كان بديع زي اسمه فيه (هو كان عبد البديع)، أداءه يتحب بدون استئذان أو مقدمات.
-وحبيت دلع نانسي في أغنية تتر بداية المسلسل كان اختيار موفق وجامد جدا، الأغنية حلوة برضه أوي، برافو نانسي وأيمن بهجت قمر ومحمود طلعت برضه، بس محستش صوتها في أغنية تتر النهاية، فيه بهجة مش مطلوبة مع الكلام!
-حبيت قناة طارق نور "القاهرة والناس"، وحبيت طريقة تفكيره المبتكرة و"الصايعة" جدا في كثير من الأحيان التي ترغمك على الإعجاب بـ"دماغه" دون مجهود يذكر، وزعلت جدا لما اكتشفت أن قناة بالدماغ ديه هتبقى في رمضان بس .. خسارة!
-على سيرة "القاهرة والناس"، شكرا جدا جدا للقناة عشان عرضوا مسرحية "قهوة سادة"، بجد كانت "عيدية" حلوة أوي علينا.
-أداء رولا جبريل كان عادي للأسف، بس أنا شايفة إنها طاقة إعلامية مرعبة، محتاجة إعداد أقوى من اللي كان معاها في "باب الشمس"، وشايفة إنها لسه قدامها فرصة كمان هنا في مصر ، يعني لسه في أمل إنها تبقى جامدة وتسيب بصمة هنا زي ما أنا متوقعة ، بس "تتبروز" صح.
-طوني خليفة مذيع محنك وذو خبرة، واضحة أساليبه في المحاورة التي أهمها سلاح مقاطعة الضيف لإثارة غضبه واستفزازه، ولكن كان صعبان عليا جدا في حلقة الإعلامي النجم عمرو أديب، لأن موقفه كان صعب جدا، ففي حالة مواجهة ضيف بقوة وصعوبة و"صياعة" أديب، تكون النتيجة ما بين اثنين دون ثالث، إما مواجهة هذا الخوف والقلق بإثبات التفوق على هذا الخصم الـ"عنيد" وإخضاعه والسيطرة على الحوار، وإما الفشل بشكل ذريع لـ"يركب الضيف فوق المذيع ويدلدل رجليه"، وطبعا كلنا شاهدنا المعركة التي كسبها أديب في الجولات الأولى.
-ساندرا نشأت كانت جميلة فوق العادة في دورها الجديد كمذيعة في برنامجها "المخرج"، حبيت أوي إني اتفرج عليها وهى قاعدة تاخد وتدي في الحوار مع الضيف بعيدا عن قوانين المذيعات أو حتى مبادئها، وده اللي خلاها تقدر تطلع من الوزراء اللي كانوا معاها جوانب إنسانية فاجأت الناس وأثارت اهتمامهم أكثر من لقاءتها مع الفنانين أصدقاءها.
-حبيت أداء لميس الحديدي كمذيعة جرئية و"مذاكرة" في برنامجها "فيش وتشبيه". مع غياب منى الشاذلي خلال رمضان، ستحصل لميس على لقب "أفضل مذيعة في الشهر الكريم" بدون شك.
-حسيت إن سامح حسين اتسرع لما بدأ يعمل بطولات لوحده دلوقتي، كان عايز ياخد وقت أكتر من كده عشان "يستوي" أكتر مع الناس وبعدين ينطلق لوحده!
-كرهت أوي كمية السيت كوم الجديدة اللي طلعت لنا في البخت السنة دي، تحسوا إنها سبوبة للي عملوها وخلاص!
-حبيت ظهور حنان ترك على أغلفة مجلات أهم المجلات في السوق خلال رمضان بشكل أعطى للحجاب "شياكة" وطلّة مميزة، الصور على فكرة تصوير محمود عبد السلام.
-بس أنا مستفزَة إنهم يركزوا على حنان في رمضان بس لمجرد إنها محجبة وإنهم "مينفعش" يحطوا على الغلاف واحدة بشعرها، طيب ما هى موجودة طوول السنة، إيه اللي يمنع إنها تظهر في أي شهر تاني كمان؟
-استفزتني أوي الملابس القصيرة والمفتوحة اللي لبستها النجمات زي مثلا يسرا في خاص جداً (هى شيك أوي وتجنن بس مش over شوية؟)، ومشاهد الرقص البديعة اللي ظبطّت غادة عبد الرازق بيها الشعب الصائم في وقت إذاعة العرض الأول للمسلسل على كل القنوات تقريبا قبل الإفطار! طبعا لاحظت الموضوع ده لما كانوا زملائي في الموقع وموقع FilGoal يستغفروا ربنا عندما يجبروا على مشاهدة مثل تلك اللقطات أثناء متابعتنا لأحداث المسلسلات صباح أيام رمضان.
-حبيت أوي شعار "مافيش حاجة اسمها حصري كله التليفزيون المصري"، ده بالنسبة لي نجاح جديد يحسب للوزير أنس الفقي أمامي، وأنا أحييه بجد على التطور اللي حدث في الإعلام المصري فعلا منذ أن حل على الوزارة.
-الحملة الدعائية التي تبناها طارق نور الخاصة بـ"المصري اللي على حق يقول للغلط لأ" لي تحفظين عليها، الأول هى أنه في اعتقادي، أنا شايفة إنه كده بيشجع الناس إنهم يتخانقوا مع بعض في الأماكن العامة منغير ما يستنوا تدخل قوات الشرطة في الأمر، الموضوع ده ممكن يتسبب في مجارز منغير ما نحس، الحاجة الثانية هى إن الحملة الدعائية لتطور سكك حديد مصر مضللة بكل معنى الكلمة، فعربات سكك الحديد لم تجدد كما يقال في الإعلان ولسه الخدمة سيئة، أنا شخصيا استنيت مع والدتي لمدة ساعة إلا خمس دقايق تقريبا من 8.55 إلى 9.45 صباحا عشان تركب قطار القاهرة الإسكندرية آخر أيام رمضان، وده حصل وقت موسم العيد، يعني حتى مش في الأيام العادية! هى القطارات على السكة الحديد كانت عاملة زحمة مثلا بسبب ضغط العيد ولا قطار عطلان كان موقــّف السكة على الحديد؟؟!!
-عجبني أداء هبة الأباصيري الـ"صارم" في "مذيعة من جهة أمنية"، تنفع تحقق مع المتهمين بجد.
-"عودٌ أحمد" للنجم محمد صبحي مع "ونيس" هذا عام، عاد ليتربع في قلوب المشاهدين من جديد، فينك من زمان؟
- كانت متعة إني حضرت عرض فرقة "أيامنا الحلوة" خلال رمضان في بيت الهراوي، المكان نفسه ليه هيبة تليق برمضان، رغم إن الناس مش مهتمة بالهيبة ديه وريحة الزبالة كادت تعكر صفو الحاضرين لولا حماستنا مع غناء أفراد الفرقة بـ"مزاج" خليتنا ننسى أي حاجة وحشة في حياتنا أصلاً، بس عايزة أقول إن الحفلة ديه كان ناقصها مطربة جديدة اسمها "مها محمود" سمعتها في الحفلة اللي قبل ديه اللي اتعملت في مسرح الأوبرا المكشوف، البنت ديه بجد ما شاء الله عليها وعلى صوتها، لازم تسمعوها في الحفلة اللي جاية للفرقة اللي هتتعمل في أكتوبر بساقية الصاوي.
** هاطلب منكم طلب، أنا عايزاكم تشاركوني بأفكاركم في إيه اللي حبيتوه وإيه اللي ماحبتهوش في رمضان اللي فات؟ وإيه اللي انتوا موافقين معايا فيه ومعترضين على إيه منه؟