أعربت الفنانة إنجي وجدان، عن استيائها الشديد، ممن يتهمونها بأنها دخلت إلى عالم الفن من خلال "الواسطة"، مؤكدة أنها من أسرة لا تنتمي بشكل أو بأخر إلى الوسط الفني.

نشرت "وجدان" عبر حسابها الشخصي على موقع twitter، عدة تدوينات كتبت فيها: "أرجع تاني أقول والله ما ليا واسطة مدخلاني الوسط الفني، أبويا وأمي دكاترة، وأصلا كانوا ضد الفكرة تماما، قرايبي كلهم بعيد عن الوسط، دخلت والحمد لله عملت شغل حلو، وجت فترة مش أحسن فترة واتبهدلت واتحاربت من كذا اتجاه، وكنت كل مرة أقول خلاص كفاية ربنا يبعتلي حاجة كويسة".

تابعت: "عمري ما جيت على مبادئي ولا كرامتي علشان أشتغل، مش باخد ملايين برضه على فكرة والحمد لله أنا بعرف أعيش كويس سواء معايا ٥ جنيه أو ٥٠٠ جنيه في المحفظة، عمري ما كنت بشتغل علشان الشهرة والفلوس، لو كنت بشتغل لسبب منهم كان زماني في حتة تانية".

أردفت: "بحب التمثيل بجد هو فعلا الحاجة الوحيدة إللي بتبسط وأنا بعملها، متعب وبيخلي الواحد بعيد عن عيلته لفترة طويلة، ولكن بصحى كل يوم عايزة أروح الشغل علشان بحب الشغل"، "عمري ما أذيت حد، ولا بحب أذي حد، يمكن يكون في شوية خلافات أو حصل شوية خلافات ما بيني وبعض الزملاء، لكن مبحبش أقعد أعمل منها حوارات وخناقات على السوشيال ميديا".

أوضحت: "يمكن مشكلتي الكبرى إني صريحة بزيادة، ومش بعرف أنافق، وده ساعات بيسبب لي مشاكل من غير ما أخد بالي، لكن بجد لما مش بحب حد مش بعرف أبقى لذيذة، وبيبان عليا جدا و لما بيبقى حد من إللي المفروض أصدقائي وياخد رأي في حاجه هو عملها ومعجبتنيش بقول كده، ساعات بيتقبلوها وساعات لا".

وعن آخر أعمالها الفنية، كتبت: "الحمد لله طلعت روحي، أقدر أقول عليه إنه أكبر نجاح ليا وإنه هيفضل دايما في قلبي ليه مكانة خاصة، مبسوطة الحمد لله من رد الفعل في كل حته، سوشيال ميديا أو في الشارع، وحابة بجد أشكر كل إللي اشتغلوا على العمل ده لأنهم بجد كلهم كانوا حابينه جدا جدا"، وإن شاء الله العمل إللي جاي هيبقى حلو جدا إن شاء الله، الواحد بيحاول دايما يفضل متفائل علشان الحاجات الحلوة تحصل، وده أنا متاكدة منه إن شاء الله"، وعارفة إن اليومين دول يمكن يكون الدنيا مش ماشية بسرعة، ولكن زي ما بيقولوا في التأني السلامة وفي العجلة الندامة".

يشار إلى أن إنجي وجدان، قد شاركت مؤخرًا في بطولة مسلسل "طلعت روحي" الذي عُرض على شاشة cbc، والذي حققت من خلاله نجاحًا كبيرًا، وهو من بطولة نيقولا معوض وهبة عبد العزيز، وإسلام إبراهيم، وأحمد فريد، وميار الغيطي، وإنعام سالوسة، ومن تأليف السيناريست شريف بدر الدين، ووائل حمدي.

اقرأ أيضا:
إنجي وجدان تعترف: "فكرت أسيب التمثيل واشتغل بشهادتي"

صورة- هكذا تعاملت إنجي وجدان مع رسالة تنمر وصلتها