راندا البحيري عن مشهدها الصعب في "الأب الروحي": المخرج أفتكرني ميته

نهال ناصر | فى حياة المشاهير

راندا البحيري

الجمعة , 9 نوفمبر 2018 - 12:55 | اخر تحديث: الجمعة , 9 نوفمبر 2018 - 12:55

انتهت أحداث الحلقة الـ 56 من مسلسل "الأب الروحي" في موسمه الثاني بنهاية شيقة، فالجمهور ينتظر الحلقة القادمة بفارغ الصبر لمعرفة هل ستموت "حنة"؟

تجسد شخصية "حنة" الممثلة راندا البحيري التي أدت مشهدا صعبا خلال هذه الحلقة، في الأحداث يحكم "نوح" ويجسده محمد محمود عبد العزيز على "حنة" بالموت، ويضعها في صندوق زجاجي به ماء وسمك زينة ويربط يديها، ويأمر بأن تفتح الماء عليها لتموت غرقا.

ومن أجل تصوير المشهد نامت راندا البحيري في الصندوق الزجاجي وفتح الماء عليها، في مشهد صعب.

كشفت راندا عن كواليس المشهد ونشرت عبر حسابها على Instagram فيديو لها داخل الصندق الزجاجي لحظة انتهاء التصوير وما حدث مع المخرج وفريق العمل بعدما ظنوا أنها أغمي عليها.

يظهر في الفيديو أن المخرج تامر حمزة ذهب وطرق على الزجاج وبدأ ينادي على راندا لكنها لم تجب، ليفزع ويجري هو وفريق العمل ليفتحوا الصندوق ويخرجوها.

View this post on Instagram

صباح الفل. و جمعه مباركه عليكم ان شاء الله. ال ١٨ ثانيه دول. من كواليس تصوير مسلسل الأب الروحي. المخرج الأستاذ تامر حمزه قالي أنام في المياه. قفلت عيني ومكنتش سامعه أي حاجه بره علشان صوت المياه اللي بتنزل من فوق كان عالي جدااااا. ده غير ان البوكس الإزار ده مقفول علي من فوق. قفلت عيني علشان ياخدوا الشوط اللي عايزينه. خدوا الشوط اللي عايزينه. بعدها الأستاذ تامر بينادي. فتحي عينك يا راندا. فتحي عينك يا راندا. خلاص يا راندا خلصنا. وانا مبردش. أنا أصلا مش سامعه أي حاجه. الأستاذ تامر أفتكرني موت 😢😢😢😢😢 أو دايخه مثلا جدا. أو ان اي حاجه حصلتلي. و واترعب علي خاف علي خوف قسما بالله مشوفتهوش قبل كده جري و قعد يصرخ. و يزعق في كل الناس علشان يلحقوني وهو شخصيا جري و جاب السلم و اول ما عرف أني صاحيه و شافني قدام عينه بصلي. حط ايده علي وشه و عيط و بعدها فضل دقيقه قاعد علي الأرض بيجمع نفسه من الخضه. علي فكره أنا كان بقالي شويه قبل زمن الفيديو ده مبردش عليهم خالص علشان كده الخضه كانت كبيره. و انت يا استاذ تامر يومها كبرت في نظري اوي اوي اوي. و عرفت اد ايه انت بتخاف علي الممثل بتاعك و بتحبه بجد. ياريت البني آدمين كلهم طيبين زيك. وانا سعدت. و اتشرفت. ان في ال cv بتاعي اتكتب أني اشتغلت معاك. شكرا علي الروح اللي شوفتها في اللوكيشن بتاعك يا استاذ تامر و شكرا علي وقوفك جنبي و دعمك ليا. منساش أبداً اول يوم روحت فيه لوكيشن الأب الروحي وكم التعليقات الجميلة اللي قالها علي أدائي علشان يرفع روحي المعنوية و يحسسني أني مش داخله امثل الجزء الثاني و جديده عليهم. لا. حسسني اكني كنت معاهم من تحضير الجزء الأول. و احتضنوني كلهم. شكرا. و هيوحشني اوي الشغل معاك لحد ما نشتغل مع بعض تاني. ربنا يخليك للفن المصري ✌️. شكرا للإنسان تامر حمزه.

A post shared by Randa Elbehairy (@randaelbehairyofficial) on Nov 9, 2018 at 1:49am PST

كتبت تعقيبا على الفيديو لتحكي أن المخرج شعر لوهله أنها ماتت وقلق كثيرا وعاش لحظات رعب، لأنها لم ترد عليه، في حين أنها لم تسمع أو تشعر بأي شيء مما يحدث في الخارج لأن صوت الماء كان قويا.

ووجهت راندا البحيري التحية لتامر حمزة على ما فعله معها مؤكدة فخرها لعملها تحت قيادته.

يذكر أن الجزء الثاني من مسلسل "الأب الروحي" يعرض عبر قناة dmc، وهو من بطولة أحمد عبد العزيز وسوسن بدر ومحمد عادل ومحمد عز وميرهان حسين وكارولين عزمي وحسن حسني وسيمون وإيهاب فهمي ومحمد محمود عبد العزيز ومجموعة كبيرة من الفنانين.

اقرأ أيضا:

هذا ما اكتشفته راندا البحيري في وجهها بعد جلسة تصوير جديدة

13 صورة من أحدث جلسات تصوير لراندا البحيري.. إطلالات متنوعة وتعليق طريف على الغمازات