يسرا تكشف كواليس جديدة عن مسلسل "رأفت الهجان"

FIlFan | فى حياة المشاهير

يسرا

الجمعة , 9 أكتوبر 2026 - 12:12 | اخر تحديث: الجمعة , 9 أكتوبر 2026 - 12:23

حلت النجمة يسرا ضيفة على برنامج "بحب الإذاعة" الذي تقدمه الإعلامية شافكي المنيري على "نغم إف إم"، للحديث عن كواليس دورها في مسلسل "رأفت الهجان".

ومن أبرز تصريحات يسرا:

- وقت ما اتعرض عليا دوري في "رأفت الهجان"، كنت فرحانة جدا لأنها المرة الأولى اللي أشوف بطولة حقيقية لشخص قام بخدمة كبيرة جدا لبلده.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

- جوا كل واحد فينا، جزء بيحب بلده ويخلص ليها، عامل زي الألماظة اللي كل فترة محتاجة تتلمع، ووقت ما تتلمع بتصحي الوطنية جوانا

- وقت ما جيت أصور رأفت الهجان، ما كنتش أعرف إن عمي رجل من رجال المخابرات، وهو كمان اللي قام بزرع رأفت الهجان في إسرائيل، وعرفت ده بعد تصوير الجزء الأول من المسلسل

- وإحنا بنمثل رأفت الهجان كنا بنتخض من فكرة إنه إزاي بنزرع حد في وطن مش وطنه وبحياة كاملة، والواحد لما بيسافر برة شهر ولا إتنين بيحس بالغربة

- لما قعدت مع الشخصية الحقيقية اللي كنت بجسدها بمسلسل رأفت الهجان وهي زوجة رأفت، كانت قلقانة جدا إن اللي تأدي دورها ما تعرفش تمثلها صح، وقالت لو معرفتش تمثلني صح مستعدة أمثل انا

- زوجة رأفت أحبته حب غير عادي،

- كواليس المسلسل مع الفنان الكبير محمود عبد العزيز رحمة الله عليه كانت رائعة، وكنا مبسوطين حقيقي فيها، وده خلانا وقت التمثيل بنمثل بمحبة وفخر

- مشهد البداية وهو مشهد موت رأفت الهجان، كان أصعب مشهد بالنسبالي أثناء المسلسل

- رأفت الهجان ما حبش بجد غير زوجته اللي كنت بجسدها في المسلسل، وكل النساء الأخريات كان بيرتبط بيهم لأهداف معينة محتاج يحققها فقط

- مفيش حد من فريق عمل مسلسل رأفت الهجان من أصغر اسم لأكبر اسم، ما كانش شاعر بمسؤولية دوره في المسلسل ده، وما كانش فرحان وشاعر بالفخر لكونه جزء منه

- الإنسان بيحب وطنه حب أغلى من حبه لأمه، فالوطن يعني أمان وحب وتضحية ومجموعة معاني كبيرة جدا وسامية جدا

- أستاذ يحيى العلمي رحمة الله عليه كان قائد المسلسل، وعمري ما حسيت معاه بإجهاد الشغل حتى لو مطبقة، من كتر ما هو شخصية مريحة وبيحتفي بأداء الجميع

- أتمنى ألاقي الموضوع المناسب اللي يخليني أقدم من جديد عمل وطني زي مسلسل رأفت الهجان.