مروان موسى: عيطت في الشارع لما عرفت بمرض أمي والدكاترة قالوا مش هتعيش غير سنتين وجدي كان عايز يوديها دار مسنين

نهال ناصر | فى حياة المشاهير

مروان موسى ووالدته

الأربعاء , 9 سبتمبر 2026 - 14:01 | اخر تحديث: الأربعاء , 9 سبتمبر 2026 - 20:36

حكى الرابر مروان موسى بتأثر كبير عن أصعب فترة عاشها في حياته فترة مرض والدته وكيف تلقى الخبر والسنوات التي أمضاها في رعايتها.

وحكى مروان موسى خلال لقائه مع الإعلامي الإماراتي أنس بوخش في برنامجه ABtalks كيف تلقى خبر مرض والدته قائلا: "سنة 2016 كان عندنا شقة في المعادي متأجرة، وكان المفروض أروح أشوف الشقة دي وأنا هناك بتصل بجدي عشان أعرف تفاصيل حاجات عن الشقة جدي رد عليا وقالي هتسأل عن كذا بس في حاجة كمان، أنا جدي ألماني والألمان مش عاطفيين زينا فقالي الخبر زي الـAI مامتك عيانة وجالها مرض وفي السنين اللي جايه هيحصل كذا أنا بكلمة وبعيط وأنا في الشارع ومن كتر ما هو بيتكلم بهدوء مبينتلوش حاجة".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع مروان موسى: "ركبت العربية وراجع البيت الدنيا مطرت جامد وأنا بعيط طول الطريق ومش شايف عايز أوصل بس البيت ورجعت عملت أغنية اسمها "بالمناسبة" ونزلت ألبوم باسم الأغنية دي".

نرشح لك: أجواء حماسية من حفل محمد رمضان في مهرجان "روك إن ريو" بالبرازيل

وأكمل مروان موسى حكايته: "الدكاترة ألمان فقالوا أن مامتك قدامها سنتين، في ألمانيا دا العادي جدي قالي هتاخد مامتك لدار مسنين في ألمانيا والدنيا هتكون تمام، قلت أنا هروح مصر وبحلم أكون مغني راب وكل يوم أصحى أقولهم أنا جامد ومفيش شبهي وأنا من جوايا عارف إن أمي عيانة في دار مسنين وسايبها حسيت الموضوع مش منطقي، رحت لماما قلتلها إني عايز أبقى مغني ولازم أبقى في مصر وعايزك تيجي معايا ونرجع نقعد في البيت وأنا ههتم بيكي وعارف أن مفيش علاج لأنه مرض في الأعصاب والعلاج إننا نكون مبسوطين وفي ناس حوالينا في الأول مكانتش عايزة ترجع وبعدها وافقت، في شهر 11 سنة 2017 بدأت مشواري في مصر وبعمل مزيكا وكل شوية أقول أنا قاعد في البيت واخد بالي من مامتي وفي الأوضة التانية الاستديو بعمل مزيكا، لما الضغط بيزيد كنت بقول مش هعرف أعمل مزيكا هركز مع ماما فيحصل نجاح، ساعات كنت أقولها مش عارف أوزن تقولي لأ أنت كويس، في 2019 كانت سنة مهمة للراب المصري كنت بعمل أغنية "البوصلة ضاعت" الأغنية دي كل كلماتها نابعة من مكالمة لأبويا 4 ساعات كنت بقوله مش عارف أكمل وعايز أركز مع ماما وأراعيها كويس، وهو بيقولي أنت بتعمل دا بقالك 3 سنين كويس وكمل كتبتها ونجحت وجالي إعلان بس كنت بزعل لأنها بتتعب".

مروان موسى في صورة مع والدته الراحلة

وأضاف مروان موسى: "في سنة 2017 قلت لأمي أنا إن شاء الله هخليكي تشوفيني وأنا ناجح وهي قالتلي مش فارق معايا المهم نقضي وقت مع بعض، قبل وفاتها بأسبوعين وصلت 3 جوائز أفريقية كنت كسبتهم كنت واخدهم من بداية السنة بس مرحتش الاحتفال سبحان الله الجوايز وصلت قبل وفاتها وشافتهم وأنا حسيت إن دي الحاجة اللي قلتهالها أن هتشوف نجاحي، بس بعد ما توفت حسيت أن الجوايز مش مهمة وبفتكر اليوم اللي خرجنا فيه وضحكنا كتير ".

وعن حالته بعد وفاة والدته قال مروان موسى: "بعد ما مامتي اتوفت قعدت 5 شهور موقف الموسيقى، هي توفت في سنة 2023 كنت معاها في سويسرا ولما رجعت شلت الاستديو بتاعي من البيت كنت عايز أجرب إني أعيش من غير مزيكا لحد ما أعرف أنا ليه عايز إيه، بعد وفاتها مكنتش قادر اتأقلم، قعدت 6 شهور قاعد في البيت مش عايز أعمل أي حاجة، حسيت أن مفيش سبب للحياة، أمي آخر سنتين كانت زي بنتي أنا مسئول عن كل تفصيلة في حياتها، اللي اتعملته من فترة مرض أمي أن أهم حاجة في الحياة الذكريات البسيطة اللي بنعملها".

اقرأ أيضا:

رنا سماحة تشعل حماس أكثر من 15 ألف متفرج في المهرجان المصري القبطي بكندا .. وحميد الشاعري مفاجأة الحفل

ماذا لو؟! شارك نجوم الزمن الجميل في تريند صور الثمانينيات؟

#شرطة_الموضة: هيفاء وهبي بفستان من الترتر اللامع قصير وضيق سعره 49 ألف جنيه وحقيبة Hermès Kelly يصل سعرها لـ 2 مليون جنيه في عيد ميلاد المخرج جو بو عيد

لا يفوتك: الفنانة شهيرة عملت إيه في رحلة علاج الإعلامية آيات أباظة؟ اسمع القصة كاملة والاشاعات اللي طاردتها

الفنانة #شهيرة عملت إيه في رحلة علاج الإعلامية #آيات_أباظة ؟ اسمع القصة كاملة والاشاعات اللي طاردتها pic.twitter.com/JubGPc06ti

— FilFan.com (@FilFan) September 8, 2026

لا يفوتك: نهايات جديد لأفلام أيقونية ... إيه اللي هيحصل في نهاية تايتانيك ولالا لاند وإبراهيم الأبيض

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5