خاص غادة طلعت: شفت نجاح "لعبة جهنم" في الورق وتعاطفت مع "نوال" وخفت من جرأتها ومحمد فراج أهم موهبة في جيله

محمد عبد الخالق | فى سينما وتلفزيون

غادة طلعت تتحدث عن مسلسل "لعبة جهنم" ومحمد فراج والمخرج إسلام خيري

السبت , 29 أغسطس 2026 - 14:12 | اخر تحديث: السبت , 29 أغسطس 2026 - 14:15

"نوال" ... دورا جديدا يضاف إلى مشوار الفنانة غادة طلعت، نجحت في تقمصه فصدقها المشاهد وتفاعل معها وردد جملها وإفيهاتها، عن مسلسل "لعبة جهنم" من بداية ترشيحها وحتى عرضه، تتحدث غادة طلعت إلى قراء (في الفن) في هذا الحوار السريع.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

الأستاذ إسلام خيري المخرج هو اللى رشحني للدور ودي كانت أكتر حاجة شجعتني، لإني اشتغلت معاه قبل كده "جت سليمة" مع دنيا سمير غانم، وبعدين "جودر" مع ياسر جلال، وبعدين "قهوة المحطة" مع أحمد غزي ورياض الخولي ونخبة من النجوم.
إسلام خيري هو وش الخير عليا وبحب اشتغل معاه، وبجد أنا محظوظة إنه بيختارني لأعمال مهمة.

غادة طلعت ومحمد فراج في كواليس مسلسل "لعبة جهنم"

مسلسل "لعبة جهنم" كان بالنسبة لي فرصة حلوة قوي، لإنه مسلسل صعب وفيه قضية خطيرة، بمجرد قراءة الورق اتخضيت وشفت نجاحه على الورق، وثقتي الكبيرة في الأستاذ إسلام خيري خلتني متحمسة جدا للدور ده.

وأكتر حاجة حمستني لشخصية "نوال" إنها شخصية حقيقية من لحم ودم، وفيها طبقات مشاعر وصفات إنسانية متعددة، حبيت "نوال" جدا وشفتها ضحية وموجودة فعلا حوالينا وتعاطفت معاها.

شغلها غير طبيعتها الحقيقية، فهي في النهاية إنسانة كان نفسها تعيش حياة طبيعية لكن زوجها كان سببا فيما وصلت إليه، وده ظهر في أحداث المسلسل.

غادة طلعت في كواليس مسلسل "لعبة جهنم"

كنت خايفة من الدور بسبب جرأة الشخصية، خفت تتعرض لأحكاء سلبية وتصنيف سيء بسبب طبيعتها، وكنت خايفة من رد فعل الناس، وحسيت بتوتر قبل عرض المسلسل، لكن بعد عرضه الحمد لله شفت ردود الأفعال الحلوة، وترديد الناس لجمل للشخصية.

مشاهدي جمعتني بالفنان محمد فراج، والتمثيل قدام فراج كان أحد أهم الأسباب اللي حمستني للدور وفرحتني بيه، فراج ممثل كبير وموهوب وتقيل، بشوفه من أكتر وأهم الموهوبين في جيله، وبيعلي الممثل اللي قدامه.

محمد فراج في مسلسل "لعبة جهنم"

الأستاذ إسلام خيري قابلني بيه قبل بدء التصوير، اتخضيت جدا من شكله ومكنتش عارفه أقول له انت شكلك حلو ولا يخوف، ولا أنت عامل كده ازاي، كانت مفاجأة قوية، في اللحظة دي كل تركيزي راح على إزاي أطلّع الشخصية بشكل حقيقي، واهتمامه القوي بالتفاصيل انعكس عليا وبدأت أركز في "نوال" هتكون عاملة إزاى في كل لحظة، وده اللي بقصد بيه إن الفنان الموهوب بيعلي اللي قدامه.

فراج مريح جدا في التعامل وموهوب ومتفاهم وبيتناقش، وحريص على اللي بيمثل قدامه، والبروفات معاه بسيطة ولطيفة، وبيبان عليه جدا
إنه بيستمتع وهو بيمثل.

اللقاء الأول بين غادة طلعت ومحمد فراج في مسلسل "لعبة جهنم"

أجواء الكواليس كانت لطيفة جدا، لوكيشن الأستاذ إسلام هادئ ومحكوم بيمنحك فرصة للتركيز، بيحب الممثل ويوجهه من غير ما يوتره، مخرج متميز صاحب رؤية بيختار موضوعات متميزة، وبكون مطمنة وانا شغاله معاه وكنت متأكدة إن المسلسل هينجح بسببه.

المسلسل مهم جدا وتوقيته مهم، وقضية "الدارك ويب" قضية مهمة ومحتاجة نركيز الاضواء عليها لإن هذه الجرائم منتشرة حولنا، للأسف هناك البعض حاجتهم المادية تدفعهم للجرائم، ومن الجيد أن نبدأ في توعية الاهالي والاطفال والشباب، وكيف تكون نهاية هذه الجرائم مهما كان مرتبا ومخططا لها.

غادة طلعت ومحمد فراج في مسلسل "لعبة جهنم"

القضية متعالجة بصدق، سواء الشغل اللي عاملة سامح سند، أو الكاتبة نجلاء الحديني والورق العظيم اللي كتبته، فعلا كانت تجربة مهمة وممتعة.

اقرأ أيضا:

تارا عماد وإنجي كيوان وصبا مبارك وريا أبي راشد وتوبا بويوكستون من بينهم ... حفل "كارتييه" في تركيا يجمع النجوم

داليا البحيري تخطف الأنظار بأربع إطلالات ساحرة بعدسة مصور النجوم خالد فضة

عمرو يوسف يكشف قصة مسلسله الجديد "180" لرمضان 2027

أحمد مكي بطل "الفلكي" لأحمد مراد في رمضان 2027

لا يفوتك: عاوز تعرف مين هو أغنى ممثل في العالم خارج هوليوود؟ 😉تعالى نقول لك ✋

عاوز تعرف مين هو أغنى ممثل في العالم خارج هوليوود؟ 😉تعالى نقول لك ✋ pic.twitter.com/ezqjmkRUYs

— FilFan.com (@FilFan) August 13, 2026

لا يفوتك: لو فيلم تايتانك اتعمل منه نسخة مصرية مين يبقى الأبطال

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz>