20 تصريحا لطه دسوقي في ABtalks: مكنتش معترف بمشروع الجواز واتجوزت عشان بخاف من الوحدة والوقت مش مناسب "للخلفة" ومليش أصدقاء كتير في المجال ودخلت كلية "حقوق" بسبب أحمد عز في "ملاكي إسكندرية"

نهال ناصر | فى حياة المشاهير

طه دسوقي

الأربعاء , 26 أغسطس 2026 - 13:52 | اخر تحديث: الأربعاء , 26 أغسطس 2026 - 13:52

حل الفنان طه دسوقي ضيفا على الإعلامي الإماراتي أنس بوخش في برنامجه ABtalks.

وخلال الحلقة كشف طه دسوقي عن جوانب مختلفة من حياته واستعاد ذكريات الطفولة، كما تحدث عن خطوة الزواج وفكرة الإنجاب وما يتمناه في حياته.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وفي السطور التالية نستعرض أبرز تصريحات طه دسوقي:

نرشح لك: فيديو - أميرة أديب: الناس مش هيتفقوا على أميرة أديب .. اختلفوا على ربنا والرسول

- بحاول طول الوقت أبقى أحسن، بحب الدنيا تبقى رايقة وأكون مرتاح ومبسوط ومطمن على الناس اللي حواليا مفيش دراما.

- أنا شخص بيتوتي يبان إني اجتماعي لكن بحب أقعد في البيت.

- أنا طول الوقت عندي أزمة إني محتاج أسلي اللي حواليا وببقى ممل لو مش الحالة دي.

- أنا أصغر واحد في إخواتي ودا خلاني براقب عشان مغلطش غلطات إخواتي، كنت شقي بس مش باين عليا.

- أكتر موقف محرج اتعرضت له ممكن حاجة في الستاند أب كوميدي، أنك تقف على مسرح وتقول حاجة والناس متضحكش دا بيحتاج منك تواضع أن عادي تقول حاجة والناس متعجبش وأنك تتخطى دا.

- أكتر كلام جارح اتقالي ومنستوش هو موقف بيضحك، كنت بعمل أول حاجة في حياتي متصوره كان برنامج كوميدي وأنا اللي كنت بكتب الحتة اللي فيها مونولوج وحظنا كنا بنصور جنب نادي الصيد، كل جملة أقولها نسمع صوت ضرب نار فنوقف ومهندس الصوت يطلب مني نعيد تاني، وبعد ما خلصنا جالي وقالي أنت أول مرة تعمل دا؟ قلتله أه، قالي متعملش كده تاني.

- جبت مجموع مش كويس في ثانوية عامة ومكنش قدامي غير 3 كليات اخترت "حقوق" عشان كنت حابب فكرة المحاماة والمرافعة إني أقف أقول في المحكمة دي كانت بالنسبالي حاجة لذيذة وإني أطلع حد من مشكلة وكنت متأثر بأحمد عز في "ملاكي إسكندرية"، بس الموضوع طلع مش كده دا قوانين وحاجات صعبة.

- بداية دخولي "الستاند أب كوميدي" كان في شخص عامل حفلة "أوبن مايك" أن تقف تقدم نفسك في 5 دقايق، وكتبت حاجة عن الإنجليزي وإني مش بعرف اتكلم بسبب مدرسة الإنجليزي بتاعتي زمان، كنت واقف ركبي بتخبط في بعض ودي كانت بداية إني أعرف طريقي.

- الستاند أب كوميدي لازم يكتب لنفسه، وبحب حب الناس مش الشهرة.

- أنا ضد التعامل مع الفنان باعتباره قدوة، الفنان بني آدم بيغلط، ونجاجه فنيا لا يعني إنه نموذج يحتذى، الشهرة لا تحمي صاحبها من الغلط.

- مليش أصدقاء كتير في المجال بس بحب الحقيقيين، بقصد الحقيقي معايا، في ناس بتبقى راسمه لنفسها طريقة معنية بيكلم الجمهور منها بس هو حقيقي بين الناس معنديش مشكلة معاه، بس بحب الناس الحقيقة يبقوا أصحابي اللي بيكون قدامي وورايا بنفس الشكل.

طه دسوقي من برنامج ABtalks

- أبويا كان أمين شرطة وعشان ولاده يبقى أبوهم ظابط راح قدم في كلية حقوق وعمل معادلة وبقى ظابط شرطة، وكان دايما بيقولي "متفتكرش أبوك ظابط شرطة أبوك موظف" عشان أنا كطفل مقولش هعمل اللي عايزه وأبويا يساعدني.

- أبويا الله يرحمه كان كاتبلي ورقة، بعد وفاته بـ 4 سنين الورقة دي ضاعت وانهرت عياط، وقتها حسيت إن أبويا مات حسيت بندم رهيب وشعور بالذنب لا ينتهي إني ملحقتش يبقى عندي علاقة مع أبويا، ملحقناش نقعد مع بعض ونتكلم في أمور الحياة وآخد رأيه، ملحقتش أبين له أد إيه بحبه وبحترمه.

- مكنتش معترف بمشروع الجواز خالص من الأمثلة اللي بشوفها لحد ما قابلت نادين. هي كمان شايفة الجواز مشروع فاشل فاتفقنا واتجوزنا هي مقتنعة زيي إن الجواز شركة اتنين هيعملوا مجهود في إنهم يمشوا الشركة وأديها الفضل لأنها دايما بتساعدنا نشوف أصل المشكلة فين، أنا اتجوزت عشان بخاف من الوحدة.

- نادين أكبر مني بـ5 سنين، بس هي مش أكبر مني سنا يعني إحنا بنتكلم في حاجات حاسس إني لو مع حد في سني مش هيبقى الحوار ده خالص، حوارنا أنضج وحاجة حلوة نتناقش مش في شكليات .. شركتنا فيها مساحة للغلط والاعتراف بالغلط، وأهم حاجة نعرف نتخانق من غير ما نؤذي بعض.

طه دسوقي وزوجته نادين

- فكرة أنك تبقى أب وعندك شيء صغير جدا جميلة بس مسئولية كبيرة جدا ومعتقدتش الوقت مناسب دلوقتي، وحاسس إني دلوقتي لسه بربي نفسي.

- بخاف أكون فترة وحشه في حياة حد يفتكرني ويزعل، أنا معملتش حاجة وحشة بس عشان مش طول الوقت مركز أكون كويس، ممكن أكون قابت حد وأنا نفسيا مش كويس فحسسته بشعور وحش، حد قالي أن لو قابلت شخص في الشارع من الجمهور هو بالنسبالك دقيقة في يومك بس بالنسباله قصة هتفضل عايشة معاه، محبش أبقى قصة وحشة، مش طول الوقت هبقى قصة لذيذة لأني مش نبي عادي ممكن أبقى خارج من حتة ومتدربك وأقابل حد أبقى بالنسباله قصة وحشه بس محبش دا بصراحة.

- أسعد لحظة في حياتي لما لقيت ورقة أمي مجمعة خواطر كنت بكتبها على Facebook لأنها أكتر شخص شجعني، أنا بالنسبة للأسرة من برا فاشل، إخواتي البناتمدرسات وأخويا ظابط جيش وأنا كنت بسقط في الجامعة.

طه دسوقي ووالدته

- من أصعب اللحظات إني بعد ما خلصت جامعة وجيش، قدمت في معهد فنون مسرحية كان عمري 26 سنة ودي كانت آخر فرصة أقدم عشان في سن معين للتقديم وسقطت.

- نادين مراتي هي أول شخص يشوف جوهري، هي معايا من قبل ما أعمل أي حاجة مشافتش طه الممثل، هي رمانة الميزان لو بفكر في حاجة تقولي لا مش أنت فترجعني، وهي مرايتي في الحياة وآماني.

اقرأ أيضا:

من "أشرب خمور وحشيش" إلى "أنا الشيطان السالك" .. عمر كمال على عرش إثارة الجدل بكلمات أغانيه

#شرطة_الموضة: بوسي بفستان "إيزابيلا" مكشوف الكتفين مطرز بالترتر الذهبي وكورسيه من Nadine Merabi في أحدث حفلاتها … سعره 55 ألف جنيه

قبل "بنج كلي" ... خمس مسلسلات أثبت بها دياب أنه "عو" التمثيل

التركي مراد يلدريم يرزق بطفله الثاني

لا يفوتك: عاوز تعرف مين هو أغنى ممثل في العالم خارج هوليوود؟ 😉تعالى نقول لك ✋

عاوز تعرف مين هو أغنى ممثل في العالم خارج هوليوود؟ 😉تعالى نقول لك ✋ pic.twitter.com/ezqjmkRUYs

— FilFan.com (@FilFan) August 13, 2026

لا يفوتك: لو فيلم تايتانك اتعمل منه نسخة مصرية مين يبقى الأبطال

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz>