شيرين تتحدث عن كواليس أغنيتها "الحضن شوك": كنت عايزة أقول الكلام دا عشان أكمل ... لو فضل جوايا هيكسرني

مي جودة | فى حياة المشاهير

بوستر أغنية الحضن شوك

الأحد , 26 أبريل 2026 - 01:18 | اخر تحديث: الأحد , 26 أبريل 2026 - 02:26

كشفت النجمة شيرين عبد الوهاب عن كواليس أغنيتها "الحضن شوك" التي طرحتها مؤخرا، راوية لحظات تسجيلها وكيف مرت عليها.

قات شيرين عبد الوهاب: "عزيز وتوما خدوني وسمعوني أغنية، ودي كانت قديمة مش جديدة، عزيز الشافعي عامل زي الدادا، بياخدني من البيت ويرجعني البيت، صحاب وحبايب وأخوات، ودايما بقول له انت عزيز عيني، وتوما فاتح لي بيته وجربنا غنينا غنوتين، والتانية هتعجبكم أكتر بكتير عشان هي فرحانة، الكلام دا كنت عايزة أقوله عشان اقدر اكمل، عشان لو فضل جوايا هيفضل كاسرني ودابحني، فقولت أقوله عشان الناس تسمعني واتكلم بقول ايه، بس أنا بومب مايتخفش عليا"، حسب تصريحاتها في مداخلة هاتفية لبرنامج "الحكاية" الذي يقدمه الإعلامي عمرو أديب.

وتابعت شيرين عبد الوهاب: لحظة دخولي الاستدويو ايدي كانت متلجة ونبضات قلبي زيادة، لأنها حاجات نفسية بتؤدي لحاجات عضوية لما بتكون لسه محتاج تأهيل، واقفة أمام المايك بغني ودني صفرت ومش سامعة حاجة، وبصيت لقيت نفسي مغمضة عيني خالص وغنيت الاغنية كلها وانا مغمضة عينيا، لأني لو فتحت في حاجة هتشتتني، وأنا دلوقتي حساسة جدا، يعني لو قولت لي صباح الخير بصوت عالي أو طريقة حادة ممكن اقعد طول اليوم بعيط، بس انا حلوة بيكم وليكم وعشانكم.

أما عن جديدها، قالت شيرين عبد الوهاب: قد الغياب في حضور، كل أسبوعين هنزل أغنية لحد ما الصيف يخلص، واحشني الغنا أوي، الغنا هي الحياة والماية اللي بشربها والهوا اللي بتنفسه، دار بيني وبين ستات اصحابي بيقولوا لو معنا فلوس كتير اوي هنقعد في البيت، قالوا لي وانتي؟ قولت لهم ومين قال لكم إن أنا لو معايا فلوس كتير هقعد، قولت لهم هو الغنا بالنسبة لي شغل؟ دا حياة، دا كيان.

يذكر أن شركة "سوني ميوزك" الشرق الأوسط أحدث أغاني النجمة شيرين عبد الوهاب "الحضن شوك" من كلمات وألحان عزيز الشافعي، وتوزيع توما.

وكانت شيرين عبد الوهاب تعاقدت مؤخرا مع ناصر بيجاتو لتولي الإدارة الكاملة لأعمالها الفنية خلال المرحلة المقبلة، في عودة للتعاون بينهما بعد سنوات من النجاحات المشتركة.