خاص سحر رامي لـ"في الفن": مكنتش متوقعة رد فعل الجمهور على "اتنين غيرنا" ومعنديش شروط للأدوار اللي أقدمها

نهال ناصر | فى سينما وتلفزيون

سحر رامي

الاثنين , 2 مارس 2026 - 12:52 | اخر تحديث: الاثنين , 2 مارس 2026 - 12:52

من مكاسب رمضان 2026 إطلالة الفنانة سحر رامي على الجمهور من خلال مسلسل "اتنين غيرنا"، بعد فترة من الابتعاد.

"فوتا" الشخصية التي تتمنى لقائها والجلوس والحديث معها، شخصية حنونة محبة لكل من حولها تعطي طاقة إيجابية للجميع.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تواصل FilFan.com مع الفنانة سحر رامي للحديث معها عن الدور وكواليس العمل وتعليقات الجمهور عليه.

نرشح لك: فيديو - طارق الشناوي: رحمة محسن في منطقة المستحيل في الأداء .. ومحتاجين لرحمة منها

في البداية سألنا سحر رامي عن عودتها بعد فترة من الغياب وقالت: "أنا مسبتش الفن أنا مقعدتش كتير بشتغل بس الإقبال عليا مش كتير زي الأول والأعمال اللي بتنجح ممكن الواحد يعمل عمل أو اتنين في السنة بس اللي بينجح حاجة واحدة وتوقيت العرض، والنجاح بتاع ربنا وفي ميعاده".

سحر رامي

يتفاعل الجمهور بشكل كبير مع مسلسل "اتنين غيرنا" معبرين عن إعجابهم بأجواء العمل وقالت سحر رامي عن هذا الأمر: "مكنتش متوقعة أن يبقى عليه الإقبال دا من كل الناس وجميع الأعمار والمستويات فدي نعمة من عند ربنا، هو مسلسل لطيف ونجح لأن العناصر كلها اللي حواليه تنجحه المؤلفة والمخرج والأبطال دا ساعد أكتر على النجاح والرومانسية والرقة والشياكة والأداء الهادي في وسط كل حاجة فيها صخب دا كان رقيق والناس كانت عايزة الرقة شوية".

وتحدثت سحر رامي معنا عن شخصية "فوتا" وقالت عنها: "الشخصية شبهي كتير أنا هادية وبسيطة كده وبتعامل مع أولادي كده وأرملة برضو فيها شبه كتير من شخصيتي الحقيقة".

وتظهر "فوتا" في المسلسل بإطلالات مختلفة، ولأن سحر رامي مصممة أزياء فسألناها إن كانت ملابس الشخصية من تصميمها وقالت: "هو طبعا في ستايلست للمسلسل بس اللبس كله تقريبا أنا اللي عملاه وأنا اللي مخيطاه، هو مختلف عشان مش حاجات معروفة معظمها حاجات عملاها أغلبها بسيطة والحمد لله إننا اتوفقنا في الحاجات دي".

سحر رامي في بوستر مسلسل اتنين غيرنا

وعن أكثر المشاهد التي تحبها في العمل قالت سحر رامي: "بحب كل مشاهدي في المسلسل، كان في مشهدين اتشالوا وكانوا لذاذ، هو الكواليس كلها كانت رائعة أنا أكتر واحدة كنت زعلانة أن المسلسل خلص".

وكشفت سحر رامي عن أكثر ردود الفعل التي تلقتها عن دورها في مسلسل "اتنين غيرنا" وقالت: "أكتر حاجة بتتقال سحر لذيذة أوي أنا مبسوطة جدا من التعليقات حتى اللي مش بيحبني شكر فيا، المسلسل كله حلو والناس بتشكر في كل الناس وأنا تريند، أنا مكنتش متوقعة، وأولادي مبسوطين وكل اللي يعرفوني وقرايبي شايفني إني طبيعية أوي في المسلسل".

وتابعت: كل الناس عايزة تعيش في البيت دا في ناس بتسألني أنتوا عايشين هناك بايتين فاكرين أنها حياة يومية وقت التصوير، هو البيت حلو أوي ولايق على المسلسل وكلنا لايقين على بعض".

وسألنا سحر رامي عن شروطها للمشاركة في المسلسلات وإن كانت ستغيب عن جمهورها مجددا وقالت: "أنا عمري ما حطيت شروط وعمري ما قلت لأ لكن لازم الحاجة تكون حلوة وتناسبني أنا بختار أدواري كده، لما بيتعرض عليا أعمال كويسة وربنا بيوفقني فيها ببقى مبسوطة أوي لكن مش مخططة أوي".