أحمد زاهر عن مرض ابنته ملك: يارب نفهم عندها إيه عشان الدكاترة يعرفوا يعالجوها

مي جودة | فى حياة المشاهير

ملك أحمد زاهر ووالدها

الجمعة , 13 يونيو 2025 - 16:06 | اخر تحديث: الجمعة , 13 يونيو 2025 - 17:06

غادرت الفنانة الشابة ملك أحمد زاهر المستشفى بعد حجزها لمدة 5 أيام، وسط حيرة جمهورها وأسرتها من طبيعة مرضها.

قال أحمد زاهر: "ابنتي ملك غادرت المستشفى رغم أن حالتها الصحية لم تتحسن، ولم يكشف الأطباء السبب الرئيسي وراء مرضها، يارب نفهم هي عندها إيه عشان نعرف نعالجها"، وذلك حسب تصريحاته لبرنامج "ET بالعربي".

ملك أحمد زاهر

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

يذكر أن ملك كشفت عن مرورها بوعكة صحية من خلال منشور على تطبيق Instagram، كتبت ملك أحمد زاهر منشور على "استوري حسابها على إنستجرام": طيب أنا عمري ما كنت بنزل غير الحاجات اللذيذة أو الهزار أو أي حاجة إيجابية من الآخر ولما كنت بحب أنزل حاجة سلبية كنت باخدها بهزار وبنزلها close friends وبهزر بيني وبين أصحابي.

إطلالة ملك أحمد زاهر - 30 مايو 2025

وأكملت لتوضح أنها تعاني من وعكة صحية منذ ثلاثة أيام، وإن كانت لم تكشف تفاصيلها واكتفت بالقول بأنها "حاجة مش فاهمة سببها": بس بجد حاسه الفترة الأخيرة بيجيلي كومنتس كلها مانتى عايشة ومبسوطة واحنا مش عايشين وايه كل اللي انتوا فيه، وحاسه ان في ناس باصه على اتفه الحاجات اللي ممكن تكون عندي أو بتبسطني، زي مثلا إني أنزل اروح الجيم، أو أخرج مع أصحابي، أو يكون شكلي حلو وأنا رايحه إيفنت، حبيت بس أقول لكم إن الحياة مش وردي وأنا بقالي 3 أيام تعبانة شوية وعندي حاجة لحد دلوقتي مش فاهمة سببها، وجت فجأة وفي حوالي نص ساعة قبلها كنت زي الفل ومن ساعتها مش عارفة أنزل أو حد يشوفني باللي أنا فيه ده، ونفسيتي وحشة أوي.

ملك أحمد زاهر

وأوضحت ملك سبب كاتبتها هذه الرسالة ومشاركتها مع جمهورها قائلة: أنا بحكي الكلام ده عشان تعرفوا بس إن حياتي فيها الحلو والوحش والله زي أي حد، بس أنا بحب دايما أشير الحلو بس، وغالبا ده غلط فقررت أشارككم كمان الوحش، ومع إن اللي بيحصلي دلوقتي أنا بحمد ربنا عليه وعارفة إنه بإذن الله هيكون حاجة بسيطة وإن شاء الله هاخف وكله هيكون تمام، بس هو مخلي نفسيتي وحشة أوي.

جلسة تصوير ملك أحمد زاهر - 20 مايو 2025

وواصلت: حقيقي كل اللي طالباه انكم ماتحكموش على حد من السوشيال ميديا أو من ظهوره في أي حاجة لأنها بتوري بس يمكن 20% من حياته، وادعولي أخف بسرعة وشكرا.

وفي نهاية رسالتها طمأنت ملك جمهورها قائلة: والهدف من الاستوري ده مش إن أي حد يقلق لأن الحمد لله أنا كويسة وإن شاء الله اللي عنده ده ليه حل وأنا تمام مافيش حاجة مقلقة أنا بس حسيت إني محتاجة أشارك الوحش زي ما بشارك الحلو مش أكتر.