خناقة وقسم شرطة وضرب أمام النادي وأمن مركزي... قصة تعارف عمرو سلامة على أحمد فهمي وهشام ماجد وشيكو

مي جودة | فى حياة المشاهير

عمرو سلامة

الخميس , 22 مايو 2025 - 17:58

روى المخرج والسيناريست عمرو سلامة قصة تعارفه عن الثلاثي أحمد فهمي وهشام ماجد وشيكو، أثناء دراستهم في جامعة القاهرة.

قال عمرو سلامة: "في البداية تعرفت على كريم فهمي، في أولى جامعة، حد عرفني عليه وبقينا أصحاب، كنت في كلية تجارة وهو في طب أسنان ولكن أول سنة بيدرسوها في علوم، كريم قال لي أخويا وأصحابه بيعملوا أفلام، ووراني الحاجات اللي هما بيعملوها، هم مايعرفونيش بس أنا اتفرجت على الأفلام دي، وبتضحك أوي وهم عاملينها بكاميرا صغيرة، قولت له تعالى احنا كمان نعمل فيلم زيهم، وأنا بتعمل جرافيكس فنحط فيها جرافيكس، قال لي يلا، وشوفنا بيعملوا إيه وحاولنا نقلدهم"، حسب تصريحاته في بودكاست "فايق ورايق" الذي يقدمه إبراهيم فايق.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع عمرو سلامة: جيه في يوم من الأيام بليل بيكلمني كريم، بيقول لي إنت فين، قولت له في إيه! قال لي أنا في القسم أخويا اتخانق خناقة كبيرة أوي هو وأصحابه، قولت له اتخانقوا مع مين؟ قال لي مع أصحابي! تعالى لنا عند القسم.

وأضاف عمرو سلامة: رحت عند القسم، وأصحاب كريم دي عيال جامدة، وولاد ناس جامدين أوي، فالخناقة معقدة، طب نتقابل أدام النادي نتصالح، وأنا رايح معه عشان أخوه بيتخانق يعني، اتغدر بينا وخدنا علقة بنتضرب ضرب، من أصحاب كريم، وكريم مش عارف يسيطر ومش عارف يعمل ايه وبيحاول يحوش، وأنا نفسي أثبت نفسي كالعادة ودخلت فدائي، وهما مش عارفين مين الشخص اللي داخل يتضرب معنا دا، وهدومي اتقطعت، والخناقة دي تحت بيت وزير مهم جدا، ودخل علينا أمن مركزي، وأنا معايا عربية، قمت بسرعة لافف على العيال وركبتهم وهربتهم، وهم مايعرفونيش، وهم قعدوا مين دا في شخص أنقذنا مانعرفهوش، جيت بليل قاعدين على القهوة، قالوا مين دا؟ دا اللي انقذنا، ودي كانت بداية العلاقة، وخدت صيت إني واد جدع.