محمد سامي يرد على تصريحات طارق لطفي: لو أنت ترفض تقديم دور الشاذ فأنا قبلك أرفض أخرجه!

مي جودة | فى حياة المشاهير

محمد سامي وطارق لطفي

الخميس , 6 مارس 2025 - 11:54 | اخر تحديث: الخميس , 6 مارس 2025 - 12:01

رد المخرج محمد سامي على تصريحات الفنان طارق لطفي حول رفضه لتقديم دور "الشاذ" في مسلسل "كلام على ورق".

قال محمد سامي في بيان: "ردًا على كلام طارق لطفي المنتشر اليومين دول، أولًا طارق ممثل محترم وإنسان جميل واشتغل معايا مرتين، مرة في مسلسل (مع سبق الإصرار)، ومرة تانية في مسلسل (حكاية حياة)، وأعتقد الدورين كانوا مهمين ومحترمين جدًا وحقق فيهم نجاح مهم، بعدها عرضت عليه دور في مسلسل (كلام على ورق) وحصل خلاف إنتاجي على الأجر تقريبًا، وعلى مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة 2014 يعني من 11 سنة"، حسب موقع صحيفة "المصري اليوم".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع محمد سامي: فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شاذ جنسيًا، وبدأ يتكلم عن المجتمع والناس وخوفه على الجمهور وكلام غريب جدًا بحالة من المبالغة والاسترسال لكسب ود الجمهور واللعب على الحالة الدينية والمتحفظة عند الجمهور العربي، ولكن فاته حاجة مهمة إنه بيتكلم عن دور في عمل مصور وموجود والناس تقدر تتفرج عليه، والدور مش دور شاذ ولا ليه علاقة بالشواذ.

undefined

طارق لطفي: رفضت دور "الشاذ" في مسلسل محمد سامي لأنه كان بدون هدف

وأضاف محمد سامي: مش فاهم طارق قال كده ليه واخترع الموضوع ده إزاي وكمان عمل حكاية غريبة جدًا أنا مش فاهمها، وإنه خاف على عيلته وأسرته وطلعني بروَّج لشئ غريب جدا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأن لو طارق عنده عيلة فأنا كذلك.

واستطرد محمد سامي: ومع احترامي ليك يا طارق كلامك مختلق وغير صحيح، والدور موجود ينفع الناس تشوفه، وكان حسين الإمام رحمة الله عليه طالع بيحب روجينا، وهي حبيبة عُمره وأنتيمه ماجد المصري وأحمد زاهر وأشرف زكي، كان جدع مايع وصاحب كباريه وده اللي كان عاجبك في الدور وعملت معايا بروڤة أداء عليه وعلي مياعته وكان عاجبك.

واختتم محمد سامي بيانه بـ: "راجع نفسك يا صديقي قبل إلقاء قنابل تزعل زميلك منك، ومعلش إني رديت بالشكل ده ولكن لا بد من الرد للتوثيق، كلامك كان لازم يترد عليه وكل سنة وأنت طيب وأسرتك الكريمة بخير ولو أنت ترفض تقديم دور الشاذ فأنا قبلك أرفض أخرجه!".

undefined

وكان طارق لطفي صرح خلال حواره مع الإعلامية أسما إبراهيم في برنامج "حبر سري" المذاع عبر قناة القاهرة والناس: "رفضت الدور بسبب عائلتي بالكامل، أنا كنت موجود من البداية قبل كتابة ورقة واحدة من المسلسل، وكنت باني الشخصية مع محمد سامي بطريقة مختلفة، إن هذا الشخص مش شاذ، لكنه يمثل الحكاية دي لأنه صاحب كباريه وبسبب طبيعة وظيفته".

وأضاف طارق لطفي: "لقيت اللي اتكتب غير كده، وخفت جدا واستشرت مراتي وأولادي وأمي لأن كل ده يمسهم بشكل أو بآخر، وفي الآخر قررت إني مش هعمل كده".

محمد سامي ومي عمر

وتابع طارق لطفي: "اللي قرأته كان بدون هدف لتقديم هذه الشخصية، وإحنا جمهورنا العربي أصعب جمهور، لأنه يصدق ويتأثر إلى درجة كبيرة جدا، وخفت على الناس من إن الموضوع يتشاف كحاجة لطيفة وعادية".

يذكر أن مسلسل "كلام على ورق" شارك في بطولته هيفاء وهبي وحسين الإمام وأحمد السعدني وأحمد زاهر وماجد المصري وروجينا ومي عمر، ومن تأليف أحمد محمد وائل ومحمد سيد بشير ومصطفى جمال هاشم، وأشرف على الكتابة أحمد شوقي.