أكرم حسني يحكي كواليس كتابة "تيجي نسيب" لأنغام: اتكتبت واتلحنت في 5 ساعات واستهلكت نص كيلو بن وسط محوج

أحمد حتحوت | فى حياة المشاهير

أكرم حسني يحكي عن كتابة أغنية تيجي نسيب لأنغام

الخميس , 19 سبتمبر 2024 - 13:09

كشف الفنان أكرم حسني لأول مرة عن كواليس كتابته أغنية "تيجي نسيب" للمطربة أنغام، في منشور طريف على انستجرام تضمن قصة مضحكة ومفصلة.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

نشر أكرم حسني مقطعًا للملحن إيهاب عبد الواحد يغني "تيجي نسيب" على الجيتار ويسجلها على محموله، وكتب الممثل "يوم التلات 2 نوفمبر 2021
الساعة اربعة الفجر : قام ايهاب عبد الواحد عشان يمشي بعد سهرة طويلة عندي في البيت ايهاب مسابش فيها الجيتار من ايده هو بيغني و كلنا بنغني معاه".

أنغام وأكرم حسني

وأضاف "بعد ما كله مشي جاتلي فكرة أغنية " تيجي نسيب " ف كتبتها و خلصتها علي الساعة ستة الصبح ، و هموت و اكلم ايهاب عشان يجيلي يسمعها و يلحنها بس مكسوف اكلمه .. الراجل لسه ماشي من عندي من ساعتين و اكيد ملحقش ينام. الساعة سبعة صباحا بعد ما قدرت امسك نفسي لمدة ساعة كاملة اتصلت بيه ف رد بصوت غرقان في النوم".

ودار الحوار بين أكرم وإيهاب كالآتي:

أكرم : صباح الفل يا بوب .. صحيت ؟ ( سؤال فيه كمية استهبال مش طبيعية )
ايهاب : لا لسه .. انا نايم من ساعتين بس .. في حاجة ؟
أكرم : لا يا حبيبي مفيش .. خلاص اصحي و كلمني

أكرم حسني

الساعة سبعة و ربع اتصلت تاني

أكرم : ايه يا بوب صحيت ؟
ايهاب ( بعصبية مكتومة قدرت احسها ) : اكرم انت كويس ؟
أكرم : اه يا معلم تمام بس اصلي كتبت حاجة كده و حاسس انها حلوة ف عايز اسمعهالك
ايهاب ( بحماس ) : لا ان كان كده هفوق و البس و اجيلك
أكرم : يالا مستنيك

الساعة سبعة و نص اتصلت بيه

أكرم : بوب قهوتك ايه ؟
ايهاب ( بعصبية ) : اكرم .. و الله العظيم بفوق و هاجي
أكرم : ماشي يا حبيبي مستنيك

الساعة تسعة ايهاب وصل

أكرم : بوب انا كتبت اغنية فرحان بيها اوي
ايهاب : طب مش كنت بتسألني قهوتي ايه ؟
أكرم ( بتجاهل ) : بص يا بوب الاغنية بتقول " تيجي نسيب .. تيجي نجيبها في النصيب .. تيجي نقول محناش لبعض و يبقي بعد تغيب و اغيب ............ "
ايهاب ( باندهاش ) : مين اللي كاتب الكلام ده ؟
أكرم : انا
ايهاب ( بنفس حالة الاندهاش ) : انا قهوتي سادة
أكرم : حالا

وتابع أكرم: "من الساعة تسعة للساعة اتناشر ايهاب مبيعملش حاجة غير انه ماسك الجيتار و عمال يجرب جمل لحنية في دماغه و يطلب قهوة سادة. الساعة اتناشر و عشر دقايق كان خلص اللحن و بيسجله ( بصوا الساعة اللي ورا عشان تتأكدوا ) و مكانش يعرف اني لما قولتله و هو ماشي الفجر عايزين نكررها قريب انها هتبقي قريب أوي كده".

View this post on Instagram

A post shared by Akram Hosny (@akramhosny)

وأكمل القصة: "الاغنية راحت للموزع الكبير صاحب اللمسات السحرية حسن الشافعي عشان يحط بصمته عليها و تطلع بالشكل اللي انتوا سمعتوه. اغنية تيجي نسيب اتكتبت و اتلحنت في خمس ساعات و استهلكت نص كيلو بن وسط محوج ، بس عشان طالعة من القلب و لحنها ملحن عبقري بيحس بكل كلمة و يترجمها ل لحن ربنا كرمنا بأن اللي يغنيها تبقي فنانة معجونة احساس و فن و حلاوة صوت و حضور طاغي و مكانة كبيرة في قلوب جمهورها في كل حتة في الوطن العربي .. انغام".