بيومي فؤاد لجمهور الزمالك: نفسي تعترفوا واسمعكم مرة تقولوا "إحنا كنا وحشين" واللي يزعل يزعل

نهال ناصر | فى حياة المشاهير

بيومي فؤاد

الأحد , 16 يوليو 2023 - 11:04 | اخر تحديث: الأحد , 16 يوليو 2023 - 11:04

رد الفنان بيومي فؤاد على الانتقادات التي وجهت له خلال الفترة الماضية من جمهور نادي الزمالك والاتهامات أنه أهان الفريق.

وخلال مداخلة هاتفية مع برنامج "حضرة المواطن" من تقديم سيد علي عبر قناة "الحدث اليوم" وجه بيومي فؤاد رسالة لجمهور الزمالك طالبهم فيها بالاعتراف في حالة الهزيمة في أي مباراة أن الفريق لم يكن في أحسن حالاته وعدم البحث عن أسباب أخرى غير منطقة لتفسير الخسارة.

وقال بيومي فؤاد: "فرصة كويسة أني أصالح جمهور الزمالك سواء من جمهور أو غير جمهوري، إن كانوا بيكرهوني أو بيحبوني أنا شخصية عامة وربنا خلقني أهلاوي ودا العيب الوحيد بالنسبة لجمهوري من الزمالك، أنا عمري ما غلطت أو قليت أدبي أنا كلامي واضح لما بقوله في البرامج على لساني وبقولها للمرة المليون واللي عاوز يزعل يزعل، فريق نادي الزمالك وجمهوره لو اتغلب من ريال مدريد هيدوروا على أي سبب غير أن هما كانوا وحشين، أنا نفسي مرة اسمع كلمة إحنا كنا وحشين".

مبارة الأهلي والزمالك

نرشح لك: أحمد السبكي لـ"في الفن": تصريحي ضد تامر حسني مفبرك.. دا ابننا ومينفعش أغلط فيه

وتابع: "الزمالك لما أخد الدوري السنتين اللي فاتوا كان يستاهل لأنه أحسن من أي فرقة تانية هو دا اللي قولناه، كابتن شيكابالا لما استضافة الأستاذ عمرو أديب السنة اللي فات وبيقوله تفتكر الزمالك هياخد الدوري السنة الجايه قاله لو بقت كورة، يعني إيه كورة؟ هو إحنا بنلعب بلي، الأهلي بيتجامل والزمالك بيتجامل، الأهلي بيتظلم والزمالك بيتظلم طول عمر اللعبة فيها كده، أمتى يا جماعة هتقولوا إحنا اتغلبنا النهاردة عشان كنا وحشين، لو قولتوا دا أقسم بالله هتروحوا في منطقة تانية".

بيومي فؤاد

وأكمل: "هي دي قلة أدبي اللي أنا قولتها والناس بتشتمني عليها في كل حتة، لما لعبنا الماتش بتاع كأس مصر والزمالك كسبنا 2/1 أنا من بعد الجون التاني مستنتش الأهلي يجيب جون، وقولت إحنا النهاردة غلابة والزمالك أحسن، سهلة يا جماعة".

وأكمل بيومي فؤاد: "الموضوع ببساطة فرقة بتلاعب فرقة، الفرقة دي كسبت يبقى الفرقة التانية مكنش يومها، لو كان في توفيق كانت كورة زيزو دخلت، أو كانت كورة أفشة دخلت، دا ماتش 6/1 بيقولوا كورة مين لو دخلت كان الماتش اتغير، يا جماعة إيه دا، أبقى مغلوب 3 صفر وأدور على كورة مدخلتش، يا جماعة أنتم فرقة كبيرة عيب الزمالك طول عمره هيفضل ند للأهلي".

وكان الأهلي فاز على الزمالك في المباراة التي جمعت بينهما الخميس 13 يوليو بنتيجة 4 أهداف مقابل هدف واحد.

يشار إلى أن بيومي فؤاد يعرض له فيلم "مستر إكس" في دور العرض السينمائية.

بوستر مستر إكس

فيلم "مستر إكس" بطولة أحمد فهمي، هنا الزاهد، أوس أوس، بيومي فؤاد، محمد أنور، محمود حافظ، رحاب الجمل، أمير شاهين، قصة أماني التونسي، وفكرة محمد سويلم وفادي أبو السعود، إخراج أحمد عبد الوهاب.

وتدور أحداث "مستر إكس" حول أحمد فهمى الذي يمتلك شركة يساعد من خلالها الرجال لكي يطلقوا زوجاتهم، ويحافظوا على حقوقهم كاملة في نفس الوقت.