خاص إلهام صفي الدين: أقبل تقديم المشاهد الجريئة طالما موظفة في السياق الدرامي

نهال ناصر | فى حياة المشاهير

إلهام صفي الدين

الاثنين , 21 نوفمبر 2022 - 17:45 | اخر تحديث: الثلاثاء , 22 نوفمبر 2022 - 16:20

خطوة جديدة ومهمة في مشوار الممثلة الشابة إلهام صفي الدين بمشاركة فيلمها "صاحبتي" في مسابقة الأفلام القصيرة بمهرجان القاهرة السينمائي الدولي الـ44.

إلهام صفي الدين هي ابنة أخت الفنانة إلهام شاهين ويبدو أنها تسير على خطى خالتها، صريحة مثلها وتكشف عن أرائها بكل قوة.

وكشفت إلهام صفي الدين عن رأيها في مصطلح "السينما النظيفة" وتقديم المشاهد الجريئة وقالت: ما معنى السينما النظيفة، في كل مجتمع ثقافة محددة وكل شعب تربى على أفكار وممنوعات هذا طبيعي عندما يكون الشخص مقتنعا بشيء وكبر عليه لن يستطيع تغييره، لكن أنا لا أخاف، مضيفة: ومينفعش الفن يبقى متقيد، الفن إحساس أحنا كبشر بنتحكم في تفكيرنا لكن معندناش تحكم في إحساسنا، مينفعش تقولي أنا عاوز الحالة دي لكن في ممنوعات، لازم الدنيا تكون متفتحة الفن دوره أن يفتح دماغ الناس بدل ما الناس تقفل عليه، بالنسبة لي حابه أعمل كل حاجة، ولو أنا شايفة أن في مشهد أو حاجة في السياق الدرامي وفي الكتابة والرسالة هقدمها لكن لو هي ملهاش لازمة مش هعمله.

إلهام صفي الدين دخت مجال الفن على خطى خالتها

إلهام صفي الدين من فيلم "صاحبتي"

وعن علاقتها بخالتها الفنانة إلهام شاهين ورأيها في تصريحاتها التي تثير الكثير من الجدل قالت إلهام صفي الدين: بكلمها كتير وبتخانق على مواضيع هي بتناقشها أنا بعمل دا خوفا عليها لأن مش كل الناس بتتقبل كل حاجة أنا شخصيا شايفة أن كل واحد ليه وجهة نظرة طالما مش بتأذي حد، أنا بحب فيها أنها متمسكة بحريتها وقوتها ووجهة نظرها لكن في نفس الوقت مش لازم كل حاجة تتقال ومش كل الناس بتفهم صح، هي وصلت لمرحلة في حياتها أن كلمتها بتتسمع في كل مكان ودا مسئولية هي قدها لكن في حاجات أنا لو ليا كلمة هقولها بلاش تتكلمي فيها ولو أني حاسة أني كمان 10 سنين هبقى نسخة منها.

إلهام صفي الدين وخالتها إلهام شاهين

وكشفت إلهام صفي الدين عن الفيلم الذي تحبه كثيرا لخالتها الفنانة إلهام شاهين وإذا سمحت لها الفرصة لإعادته وقالت: فيلم "خلطة فوزية" كان دور حلو وفيلم مختلف لو يوما ما أعيد عمل ليها أتمنى يكون ده.

إلهام صفي الدين وإلهام شاهين

وعن رأيها في مواقع التواصل الاجتماعي قالت إلهام صفي الدين: مليش علاقة بالسوشيال ميديا أوي مع أن دراستي ديجيتال ميديا وفاهمة أنها مهمة للفنان بس حاسة أني لو بقيت بظهر كتير في السوشيال ميديا هبقى بمثل في حياتي وأنا مش عاوزة دا مش عاوزة أمثل على الناس اللي بتحبني وتتابعني أنا مش بتصور كتير ولا بشارك حياتي مع البشر بنزل صور ومشاهد بحبها من الأعمال اللي شاركت فيها ومش حاسه أني عاوزة أغير الوضع دلوقتي وفي العموم بتجاهل التعليقات المزعجة وبتضحكني، لأن طالما بقف قدام نفسي في المراية وقدام ربنا وأحس أني تمام مش بتفرق معايا اللي يتقال.