ياسمين عز معلقة عن تصريحاتها حول علاقة الأخ والأخت: المفروض تجيبي له جرس في البيت لما يرن تحضري الشاي

مي جودة | فى حياة المشاهير

ياسمين عز

الخميس , 3 نوفمبر 2022 - 22:11

علقت مقدمة البرامج ياسمين عز على الانتقادات الموجهة لها بسبب تصريحاتها حول خدمة الأخت لأخيها.

قالت ياسمين عز: "بعد تصريحاتي عن ضرورة خدمة الأخت لشقيقها، الدنيا اتقلبت، لدرجة أن كوباية الشاي وصلت لأنها أصبحت من أكثر الكلمات بحثا على جوجل مصر خلال الأيام اللي فاتت".

ياسمين عز

وتابعت: انا مابتكلمش غير في الأصول واللي اتربينا عليه، واللي بقوله أدامكم على الهوا هو اللي بعمله في بيتي، ومش مضطرة اني اغير قناعاتي، مع أنه من السهل والأريح لي إني أقول زي المثل الشعبي (أريح الزبون)، وأشوف الجمهور عايز يسمع ايه واقول له، ولا هبقى راضية عن نفسي واحس ان انا بوشين.

وأضافت: عايزة اعرف يا جماعة إيه المشكلة لما اقول أن الأخ لما يطلب من أخته كوباية شاي تقوم جري تعملها له، ايه الغريب في الكلام دا يا جماعة؟ أنا عايشة معكم على الكوكب، انا بنيتي الصافية وبكل عفوية، والكلام جاب بعضه، أنا تخيلت اني لما أقول كدة، هتقولوا دا لو جاب جرس يرن بس وانا اقوم جري اعمل له الشاي، معروفة أن الأخت حبيبة أخوها، وهو بيعتبرها أمه الصغيرة، أنا مش بتكلم عن الضراير ولا عن الزوج، أنا بتكلم على أخوكِ.

واستكملت: انا بتكلم عن مبدأ التعاون، ومافيش أنانية، ايه المشكلة لما تبقوا في البيت مع بعض وتعملي له، هو مش محتاج يزوق الكلام دا أخوكي، هو كمان بيعمل لك، هو اللي بيجيب لك الشيبسي ويرجعك من الدرس، ولو انتِ متجوزة هو اللي بيرجعك انتِ وولادك لبيتك، لو عربيتك عطلانة هو اللي بيجي لك، هو اللي بيوديكي للدكتور.

ياسمين عز

واختتمت: وانتِ كمان هاتي له جرس ورني له والعبوا وافرحوا.

وكانت ياسمين عز صرحت في مساء السبت الماضي، قائلة: "الأخ وعماد البيت من بعد الأب، المفروض الأخت من قبل ما يطلب يعملها حاجة هي المفروض تعمله، مينفعش هو يقوم يعمل الشاي لأنه الراجل المفروض اخته تقوم على خدمته، أنا بتمنى أخويا يقولي اعمليلي كوباية قهوة بقوم أجري حبا وإجبارا وإجلالا لقيمته كرجل في البيت".