فريدة سيف النصر غاضبة من تعليقات الجمهور: الفنانين فاتحين بيوت 14 مليون مصري

محمد أحمد | فى حياة المشاهير

فريدة سيف النصر

الخميس , 18 أغسطس 2022 - 13:08

أبدت الفنانة فريدة سيف النصر غضبها من بعض التعليقات على مواقع التواصل الاجتماعي بسبب الهجوم على الفنانين.

وكتبت فريدة سيف النصر عبر صفحتها بموقع التواصل الاجتماعي Facebook: "أنا زعلانة علينا كلنا أوي، المصريين أحلى وأطيب وأجدع من كده بكتير، خفة دم وكرم وذوق، إيه اللي حصل؟ ليه بنستخبى ورا شاشات وننزل نحر رقاب بعض".

نرشح لك - النجوم يدعمون محمد عبد الرحمن في عرض "الدعوة عامة".. أبطال مسرح مصر في المقدمة

وأضافت: "الكلمة القاسية بتذبح بقينا نكديين مانعرفش نفرق بين جد وهزار كله عايز يتخانق مع كله، إيه ده؟ وكل يوم يعاملوك بوش أو حسب المصلحة".

وتابعت: "في إيه بعض الناس ماسكين الفنانين وكأن في تار بلا أسباب دي عجزت ودي كرمشت ودي غيرت دينها وده دمه تقيل وده كبر في السن لكن بيغني وده بيرقص كونغرو وده اتكسح ودي روحي موتي كفاية مالكم في إيه بجد هما الناس دي ماأسعدتكمش أعمالهم فترات من الزمن، طيب بلاش إنت مابتحبيش فلان غيرك بيحبه، في إيه يا جماعة تحسوا مخطط لهدم الفنانين، القوى الناعمة اللي فاتحين بيوت 14 مليون.. متخيلين".

وواصلت فريدة حديثها قائلة: "كل المهن شغالة معانا تحت إيديهم كام عامل وأسطى كل واحد فيهم عنده أهل وزوجة وأطفال وفي اللي جوز ولاده وعندهم بيوت مفتوحة، بتحاربوا تمن عدد البلد في أكل عيشهم".

واختتمت: "اقروا كدة المسلسل ببكتب ناس قد إيه عماله في العمل شوفوا وقولولي، كفاية هدد في الفن، الوحش انقدوه بأدب والكويس شجعوه، إنما تهزئوا فنانين كبار ليه يعني، على فكرة أنا عارفة إنها لجان مستهدفة الفن المصري والفن عموما ما هو العربي بيصب هنا، هاه قرروا إيه، هانشتم من ورا الشاشة ولا هنقول كلام نصح حلو يا باشا".

يذكر أن الفنانة فريدة سيف النصر شاركت مؤخرا في مسلسل "موسى" الذي عرض ضمن سباق دراما رمضان 2021 بطولة: محمد رمضان، سمية الخشاب، عبير صبري، سيد رجب، رياض الخولي، عارفة عبد الرسول، هبة مجدي.