"عملنا اللي علينا".. هل تتشابه قصيدة "المترو" التي كتبها عمر طاهر مع أغنية شيرين الجديدة؟

محمد سلطان محمود | فى موسيقى وحفلات

شيرين عبد الوهاب

الأربعاء , 17 أغسطس 2022 - 18:04

كشف الكاتب عمر طاهر عن كتابته قصيدة حملت اسم "المترو"، لحنها الراحل يوسف ونس، وذلك تزامنا مع استعداد الفنانة شيرين عبد الوهاب لطرح أغنية بنفس الاسم.

وأعاد عمر طاهر نشر ما كاتبه الكاتب حسام طنطاوي حول الأغنية التي كان من المقرر أن يغنيها محمد عدوية، وتشابه فكرتها مع أغنية شيرين عبد الوهاب التي كتبها الشاعر أمير طعيمة.

نرشح لك- "الأول مش بتاع مسئولية والتاني ضعيف جسديا والتالت خاين".. تصريحات صادمة من صفوة حول أزواجها السابقين

وكتب طنطاوي: " الكلام ده هقوله لإن غالباً الأستاذ عمر طاهر هيترفع يقوله، بمناسبة أن فيه غنوة جديدة هتنزل لشيرين اسمها المترو".

وأوضح: "عاوز أقول إن المترو نص كتبه الأستاذ وصدر فى أحد كتبه ولحنه صديق عمرى الراحل يوسف ونس، كلمة المترو مش دارجة ولا استخدامها فى الأغانى شىء طبيعى، ده غير أن لحن يوسف كان بيغنيه محمد عدوية في كل مكان، ومعظم الوسط سمع الغنوة اللى كنت شاهد عيان على تلحينها وإعجاب محمد عدوية بيها".

وتابع حسام طنطاوي: "أ نا مش كاتب البوست ده عشان اتهم أى حد بالسرقة أو الاقتباس، أنا كاتب البوست ده لإثبات ريادة الأستاذ عمر، وأن أول مترو طلع من محطة عمر طاهر للإبداع، ولإنى بحب الغنوة حب شديد خلانى مش متخيل أن ممكن يبقى فيه مترو تانى غير مترو عمر طاهر ويوسف ونس الله يرحمه".

وتابع: "الغنوة حافظها صم عشان كدة هكتبلكم نص الأستاذ عمر طاهر

فيه ناس نازلة بتضحك
م المترو وناس طالعين
وع الشباك الفضى
فيه ناس كتير نايمين
وإيدين حاضنة إيدين
وإيدين متعلقين
وولاد واقفة بتضحك
لبنات متزوقين
وطفل فى الزحمة
راجع
من مدرسته مبسوط
وبنت مش عاوزة
تسرح
خايفة المحطة تفوت
وناس ساكتة ولكن
ملامحها مش ساكتين
وناس رايحة تجرّح
ومجروحين راجعين
والمترو
ماشى ماشى
واخد قلبى البرىء
المترو
ماشى ماشى
ومركز فى الطريق"

واختتم حسام طنطاوي حديثه عن الأغنية قائلا: "آسف للأستاذ عمر لو غلطت ف أى كلمة لإنى بكتب من الذاكرة، وبكتب بتأثر شديد عشان افتكرت صاحب عمرى اللى مش هعوضه أبداً".

من جانبه علق عمر طاهر على ما كتبه حسام طنطاوي قائلا: "هارد لك يا يوسف، عملنا اللي علينا".

يذكر أن مترو الأنفاق، تم ذكره كذلك في أغنية بلاك تيما الشهيرة "زحمة المترو" التي صدرت في ألبوم "بحار" عام 2010، وهي من كلمات رامي يحيى، ألحان أحمد بحر، توزيع أسامة الهندي.