حسام حبيب يرد على شيرين عبد الوهاب: بتهددني علشان اسمع الكلام (تسجيل صوتي)

نهال ناصر | فى حياة المشاهير

شيرين عبد الوهاب وحسام حبيب

الأربعاء , 20 يوليو 2022 - 00:30 | اخر تحديث: الأربعاء , 20 يوليو 2022 - 01:38

رد الفنان حسام حبيب على التصريحات التي قالتها الفنانة شيرين عبد الوهاب عنه وكشفت من خلالها تفاصيل جديدة في أزمتهما واتهمته أنه سرق سيارتها.

وقال حسام حبيب في تسجيل صوتي لـet بالعربي: هيبقى في إجراء قانوني أنا عمري ما دافعت عن نفسي أو اتكلمت دا كلام كله مرسل لكن اللي الكلام اللي هرد بيه هيكون بالمستندات، كل حاجة بحضرها.

نرشح لك: شيرين عبد الوهاب: تامر حبيب لما شافني عيط وياسمين عبد العزيز قالت عاوزة أديكي قلم

وتابع: كنت حفاظا عليها وعلى سمعتها وعلى بيتها مكنتش بتكلم لكن دلوقتي هضطر اتكلم لأن الكلام زيادة مش هطلع أقول كلام مرسل هطلع بحقايق ومستندات، مش هفتري على حد، هرد على كل حاجة قالتها بمستندات تثبت أن الكلام دا كله تهديد علشان اسمع الكلام وبتهدد دايما بجمهورها وهي بتحاول تعمل كده وإجراءاتي وردي في الإعلام هيكون بالحقائق علشان كده مش مستعجل بظبط أزاي هرد كل حاجة قانونا وبالمستندات.

View this post on Instagram

A post shared by ET بالعربي (@etbilarabi)

وكشفت شيرين عبد الوهاب عن أزمة جديدة بينها وبين حسام حبيب في مداخلة هاتفية مع الإعلامية لميس الحديدي، وقالت: أنا ست قاعدة في أمان الله مع عيالي بقالنا 4 سنين شايفين الويل سافرنا الساحل لمدة أسبوع علشان ننبسط بناتي نفسيتهم تعبانة وأنا كمان بناتي مبيعرفوش يقعدوا معايا، ظروفي كانت ظروف صعبة عايشة مع زوج مبيشتغلش ومبيخرجش كنت محبوسة 24 ساعة في أوضة نومي مبعملش حاجة قاعدة بس أنا غلطت في حق نفسي في حق شيرين عبد الوهاب، بس مش عيب أن الست المشهورة تبقى إنسانة متجوزة وتحاول تحافظ على بيتها زي أي ست، كنت فاكرة أني بحافظ على بيتي بس مكنش بيت، دا كان عشة فران، فار دخل المصيدة وأكل الجبنة لحد ما يموت أنا كنت عايشة العيشة دي.

حسام حبيب وشيرين عبد الوهاب

وتابعت: قاعدة في الساحل لقيت تليفون جالي بسرقة عربية مرسيدس بتاعتي وكانت مكتوبة باسم حسام، سرق العربية وهي بأسمه، أنا عندي عربية عاليا أي حد عنده عربية عاليا بيجيب عربية للخروجات الكلاس، جبت عربية مرسيديس قولت يركبها حسام علشان عيب لو وقفه سيادة الضابط في الشارع يوريله الرخص يلاقيها باسم مراته فكان لازم تبقى باسمه جتني ستين نيلة على خيبتي، اتفق معايا بشهود أن في نفس الوقت هيعملي توكيل بالبيع علشان يضمن حقي، وكله طلع كلام في الهواء، دلوقتي بيهددني أن هيعمل محضر ضدي بسرقة العربية.

وكشفت شيرين عبد الوهاب عن تفاصيل الأزمة التي حدثت وبسببها قامت بحلق شعرها وقالت: أحنا أطلقنا لما قصيت شعري طلاق بائن، وبعد ما هديت من الكارثة اللي حصلت حسيت أني لسه مش قادرة استغنى عنه وأني بحبه وليه مديلوش فرصة تانية، ليه ميبقاش في رحمة علاقة الجواز علاقة مقدسة لازم نشتغل ونحافظ عليها كنت بحبه وفكراه ابني مش جوزي، اهتميت بيه وعملت الاستديو علشان شغله واشتريت له كل الأغاني اللي تعجبه بشيكات باسمي علشان متروحش منه، في الآخر يتهمني اني تخينت وبقيت شبه أمي وعاوز واحدة حلوة افتخر بيها دا غير الخناقات اللي فيها ضرب وسحل على الأرض وشتيمة مفيش إنسانة تستحملها.

طالع أيضا: شيرين عبد الوهاب: خناقاتي مع حسام حبيب كان فيها ضرب وسحل وشتيمة مفيش إنسانة تستحملها

يذكر أن أخبار الخلاف بين شيرين عبد الوهاب وحسام حبيب خرجت للنور في نوفمبر الماضي عندما نشرت الإعلامية نضال الأحمدية فيديو كشفت فيه ما وصفته بتفاصيل طلاق شيرين عبد الوهاب وحسام حبيب عبر حسابها بموقع التواصل الاجتماعي Instgram.