محمد هنيدي: هبقى رابر وفيه تراك هدس فيه السين كله من أول مروان موسى لأبيوسف

نهال ناصر | فى حياة المشاهير

محمد هنيدي

الأحد , 13 مارس 2022 - 11:58 | اخر تحديث: الأحد , 13 مارس 2022 - 11:58

تواصل الفنان محمد هنيدي مع جمهوره بشكل مختلف وقرر الإجابة على أسئلتهم ولكن بطريقة كوميدية.

وعبر صفحته الرسمية على Facebook أعلن محمد هنيدي أنه سيجيب على أسئلة جمهوره لمدة 47 دقيقة، وتلقى العديد من الأسئلة.

نرشح لك: أحلام تعتمر مع مدبرة منزلها بعد دخولها الإسلام ( فيديو)

وتلقى محمد هنيدي سؤالا عن إن كان لديه موهبة أخرى غير التمثيل ليجيب قائلا: "رابر ... وفيه تراك قريب هدس فيه السين كله من أول مروان موسى لـ أبيوسف".

وأضاف مؤكدا أنه يحب مطرب الراب شاهين قائلا: ومش هقرب لشاهين عشان شاهين حبيبي.

وكان هناك سؤال معتاد عن طوله، وبطريقة كوميدية أجاب محمد هنيدي قائلا: في الصيف بيوصل لـ 199 .. في الشتا بكش شوية ويمكن الناس واخده فكرة غلط عني بسبب أن كل أعمالي بصورها في الشتا.

وحكى محمد هنيدي للجمهور السبب الحقيقي وراء قصر قامته: زمان كان نفسي أبقى ضابط وقبل اختبارات الكلية رحت جيم جنب البيت ... الجيم كان معمول في الشارع وكان عم سعد المدرب ربنا يسامحه بيشيلني أوزان تقيلة أوي وأبويا كل مايعدي علينا يقوله حرام عليك الواد مش هيبان من الأرض، وعم سعد يقوله أنا عارف أنا بعمل إيه، وأنا أقول لعم سعد سيبك منه أبويا متغاظ عشان اخيرا هكسر سلو العيلة وهبقى أول واحد طويل في العيلة، المهم جيت اختبارات الكلية وعم سعد اقنعني أني بقيت طويل جدا .. والمشكلة أني ماكنتش بشوف أي بشر غير عم سعد فمكنتش عارف أطوال البشر وصلت لفين، لغاية يوم التقديم لما رحت الاختبارات ورفضوا يدخلوني وقالولي مفتحناش التقديم لخريجي الابتدائية.

وعن اللحظة التي شعر فيها أنه أصبح نجما قال: كنت عامل دور زمان أوي أول ماطلعت في مسلسل ومشهدي اتعرض وبعديها بيومين كدة كنت واقف على البحر في اسكندرية ولقيت واحد بكاميرا جاي ويقولي لازم أخدلك صورة وعينيه مليانه فرحة، افتكرته معجب أو صحفي وعايز ياخدلي فوتوسيشن ولمدة نص ساعة قعد يصورني على البحر وبعدها بيديني الصور قولتله أنت بتدهملي ليه ما أنت اللي هتنشر في المجلة هي مجلة ولا جرنال؟ شوية ولقيت كل صحابه متجمعين حواليه، طلع مصور متجول على البحر وحلف ما يمشيني إلا مادفع 20 جنيه، أديته الساعة والشبشب ورجعت عند خالتي الساعة 2 بليل حافي عشان متسألنيش وديت الشبشب فين.

على جانب آخر، انشغل محمد هنيدي الفترة الماضية في تصوير فيلمه "الجواهرجي" من تأليف عمر طاهر وإخراج إسلام خيري ويشارك في بطولته منى زكي ولبلبة وتارا عماد وعارفة عبد الرسول وأحمد صلاح حسني.

وكان آخر أعمال محمد هنيدي فيلم "الإنس والنمس" قصة وإخراج شريف عرفة وبطولة محمد هنيدي، منة شلبي، عمرو عبد الجليل، صابرين، بيومي فؤاد، سليمان عيد، عارفة عبد الرسول، دنيا ماهر ومحمود حافظ.

لا يفوتك: أغنية "مع نفسي" لرامي صبري في ميزان "عمك البات"