تامر حسني يرد على حلا شيحة : صورتي بارادتك وتقاضيتي أجر كبير وموعدتكيش بحاجة

نادين يوسف | فى حياة المشاهير

تامر حسني

الخميس , 15 يوليو 2021 - 14:38 | اخر تحديث: الخميس , 15 يوليو 2021 - 14:42

نشر الفنان تامر حسني رده على منشور حلا شيحة والتي قامت فيه بالهجوم عليه بسبب عرض كليب يجمع عدد من مشاهدهما من فيلم "مش أنا"، وذلك على حسابه بموقع التواصل الاجتماعي أنستجرام.

نرشح لك: حلا شيحة تهاجم تامر حسني بعد عرض كليب من فيلم "مش أنا"

قال تامر حسني"نهاركم جميل يا أغلى الناس لحقيقه عمري ما بتخيل إني أدخل في نقاش بالشكل دا مع زميل بحترمه و كان في بينا كل خير للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً و نتناقش بيني و بينك ، فا أنا مضطر أرد هنا برضو"

تابع حسني موجهًا حديثه لحلا شيحة وقال "أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد و أخلف….. الحقيقه اني إحترمت كلامي معاكي و وعدتك أشيل مشاهد تانيه طلبتيها و شيلتها بالفعل و شكرتيني عليها و لو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده ، و بعدين الفيلم بقاله ٣ اسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا ، و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!!!!"

وأضاف تامر قائلًا " هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك ؟!!!!!! و للتوضيح للجمهور الكريم أنا و المخرجه الأستاذه ساره وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها ، ماكنتيش بتردي علينا و تليفوناتك كلها كانت بتقفل في وشنا ،، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب إنما إنتي فجأه أختفيتي و مكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع !!! و بقيتي تقفلي تليفوناتك و تكنسلي علينا كلنا و بعدين أي فيلم بيبقى ليه خطه مسبقه في الدعايه و انتي عارفاها كويس و وافقتي عليها و دا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل ؟؟!!!!!"

اختتم حسني حديثه قائلًا "أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين"

يشار أن حلا شيحة هاجمت تامر حسني على حسابها بموقع انستجرام وذلك عقب نشر كليب من فيلم "مش أنا" وأعلنت توبتها وندمها على تصوير الفيلم.

اقرأ ايضًا:

إلهام شاهين ترد على تصريحات حلا شيحة: كل واحد يخليه في حاله

راندا البحيري تهاجم حلا شيحة: باب التوبة مش على "انستجرام"

راندا البحيري تهاجم حلا شيحة: باب التوبة مش على "انستجرام"

من طائرة هليكوبتر.. نسرين طافش توجه رسالة لجمهورها (صور)