فيديو- أحمد علاء الدين لرامي جمال: عندك عقدة محمد حماقي

ولاء مطاوع | فى موسيقى وحفلات

رامي جمال- أحمد علاء الدين- محمد حماقي

الخميس , 30 أبريل 2020 - 00:41

كشف الشاعر أحمد علاء الدين عن اعتزاله لكتابة الأغاني وذلك عبر منشور على Facebook، بسبب ما واجهه من ضغوطات ‏وصعوبات في التعامل مع بعض رواد المجال الغنائي.‏
‎‎

شارك علاء الدين مع متابعيه مقطع فيديو اتهم فيه الفنان رامي جمال بأنه يحب التسويق لشخصيته على أنه شخص طيب وشهم وهو ‏عكس هذه الشخصية تمامًا.‏

قال علاء الدين خلال الفيديو: "رامي جمال في نظري هو أوحش مطرب اتعاملت معاه من ناحية التعامل، معرفش إزاي ده ملحن ‏بيغني مفروض يكون فاهم قيمة التعامل، أنا كتبت له أغنية اسمها وبعدين، في الألبوم قبل اللي فات، وخدت التنازل وروحت له قالي ‏معلش أنا هدفع مبلغ رمزي".‏

أضاف: "اتفاجنا قبل نزول الألبوم قال مودي سعيد في فرح تامر عاشور قاله وحياة أمي الأغنية معانا وهتنزل، فقولنا للناس إننا ‏نازلين ووقت نزول الألبوم فوجئنا مالقيناش أسامينا، ومودي كلمه قاله رامي أسامينا مش موجودة في الأخبار ليه فمردش، قاله مودي ‏عيب يا رامي بكلمك متردش عليا راح عامله بلوك، نفس نقطة الهروب".‏

تابع أحمد علاء الدين: "عدى سنة سنتين سمعت كلام الناس بتاع هو حر، لحد ما يوم صحيت لقيته حارق كلام الأغنية على النت، ‏لأنه نزل الكلام بطريقة يا ترى دي كلام مين؟ فالناس بقت تتوقع ونسبوها لشعراء تانيين".‏

أكمل علاء الدين: "كلمه صديقي أحمد المالكي ورامي قال له أنا حر دي أغنيتي أنا شاريها بفلوسي اللي هو فلوسه دي قال معييش ‏بدجيت، ونزل الألبوم من غير الأغنية وبقى مصيرالأغنية جملتين على النت".‏
استطرد أحمد علاء الدين: "كل واحد بيمثل شخصية غير شخصيته مسيره يتكشف، أنا مش عايز حاجة أنا خلاص برة اللعبة، لما حد ‏تاني يتعامل معاك يارامي متعملش معاه كده الرجولة مش في البلوك، والفويس نوت اللي عندي إنك خدت الأغنية عشان رايحة ‏لحماقي عندي، ومش هنزله غير لو أنت كدبتني، وأنت خدت الأغنية دي يا رامي عشان حماقي ما ياخدهاش ودي لا نجومية ولا ‏شياكة وأنت عندك عقدة محمد حماقي خلينا نتكلم بصراحة".‏

أردف: "إحنا طول ما قاعدين معاك بتقول حماقي وحش حماقي حماقي، دي غلطتي إن معرفناش نوصل لحماقي نسمعه الأغنية ‏وغلطتي إني وثقت فيك وادتهالك".‏

أكد علاء الدين أنه قبل 3 سنوات تعرض لحادث بسبب اتصال هاتفي من صديقه الملحن أخبره أن رامي جمال حظره ولم يرد عليه ‏بخصوص الأغنية ففقد أعصابه وتعرض لهذا الحادث. ‏
‎‎
أحمد علاء الدين هو شاعر غنائي كتب لعديد من المطربين منهم مصطفى قمر، هيفاء وهبي، رامى جمال، فريق واما ، آدم، محمد نور، ‏كما كتب مجموعة من تترات المسلسلات مثل "الميزان"، "بنات سوبر مان"، "أنا شهيرة أنا الخائن".‏

اقرأ أيضا:

ليس جديدًا... حقيقة فيديو بكاء رامز جلال

على مسئوليتها... مي العيدان تنشر صورة زوجة رامز جلال