أول تعليق لرامي جمال بعد إعلان إصابته بالبهاق: خلصتوني من السجن

ولاء مطاوع | فى حياة المشاهير

الثلاثاء , 12 نوفمبر 2019 - 19:51 | اخر تحديث: الأربعاء , 13 نوفمبر 2019 - 16:44

وجه الفنان رامي جمال رسالة إلى من دعموه وساندوه بعد إعلانه عن محنة المرض الأخيرة التي يمر بها منذ ‏أكثر من عام.‏

نشر رامي جمال عبر حسابه الخاص على Instagram صورة كُتب فيها: "الحمد لله أولًا وأخيرًا، أنا عاوز أقول ‏كلام كتير عن اللي شوفته منكم، كلمة شكرا قليلة على مشاعركم وعلى رقي كلامكم وعلى الوقت اللي ‏ضيعتوه علشان تحسنوا الصورة المظلمة اللي كانت في عيني أنا بقيت شايف الابتلاء ده هدية من ربنا علشان ‏أشوف الحب ده والله دموعي مبتقفش وأنا بشوف كلامكم".‏

تابع: "إوعوا تبخلوا على أي حد بدعم نفسي زي اللي دعمتوني بيه، إحساس الحب بينور الدنيا، بيرجع الروح ‏والأمل اللي أنتم عملتوه ميتقدرش، ثانيًا عاوز أشكر زملائي الفنانين على كل كلمة حلوة وكل دعم شفته هي ‏دي الروح اللي نفسي تفضل موجودة مش بس بعد المرض ولا الوفاة، الكلام الحلو قولوه على طول ليا ‏ولغيري بيفرق جدًا".‏

أضاف رامي جمال: "الحب بيغير الضلمة لنور ثالثا لكل القنوات اللي بتحاول تتواصل معايا من امبارح علشان ‏تطمن عليا، بشكركم جدا بس أنا كتبت البوست ده علشان أنهي حمل على قلبي مش علشان أبقى تريند، ‏بشكركم طبعا، بس أتمنى لما تقرروا تستضيفوني يبقى على عمل فني مش مرض، مقدر شغلكم طبعا بس أنا ‏مش قابل فكرة مريض، أنا الحمد لله اتأكدت بكلام الناس اني مش خايف ومش هترفض فبلاش أي حاجة تتفهم ‏غلط شكرا على اهتمامكم ومقدره".‏

أكمل جمال قائلا: "أشوفكم في لقاءات فنية بعد نزول ألبومي ده أفضل نفسيا كتير ليا، ومفيش مانع ساعتها نتكلم ‏عن إني إزاي اتعايشت بيه وهتعايش بيه، لو ليا عمر الحمد لله على الابتلاء الحمد لله على حبكم ودعمكم ده ‏دين هعيش بيه، خلصتوني من سجن كنت عايش بيه كنت بصحى قبل ما أغسل وشي أعد البقع وأشوفها زادت ‏ولالا، النهاردة صحيت نزلت وحبيت المحنة اللي ورتني قلوبكم وجمالها، شكرا من قلب قلبي". ‏

View this post on Instagram

A post shared by Ramy Gamal (@ramygamalmusic) on Nov 12, 2019 at 9:15am PST

كان رامي جمال كتب عبر حسابه الخاص على‎ Facebook، إيضاحًا حول حالته الصحية، قائلًا: "الحمد لله ‏الذي أحبني ‏فابتلاني، وأقدرني على الصبر من فترة ظهرت بقع بيضا في جسمي وبالكشف عرفت إنه البهاق، ‏وجربت ‏انواع علاج كتير ودكاترة كتير ومفيش فايدة، رضيت وسلمت أمري لله علشان عرفت إن الزعل ‏بيزوده وكفاية ‏شغلانتي وصعوبتها والقلق الدائم من المستقبل".‏‎
‎
تابع: "وفعلا بقى بيزيد لدرجة لفتت نظر ناس كتير اللي بقى يقولي هتتعامل إزاي وأنت فنان واللي يخاف ‏يسلم ‏واللي يسألني هو ده معدي، أنا بقالي سنة فعلا لو عندي حفلة أو تصوير بتعب على ما أشوف طريقة ‏أخفيه بيها ‏لدرجة خلت ناس تقول لي شوف بيزنس تاني أعمله علشان الناس مش هتقبلك كده".‏‎
‎
أضاف رامي جمال: "فكرت في كلامهم بصراحة ولقيت إن عندي حلين يا فعلا شكرا لحد كده على ‏الشغلانة ‏دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي بنا ‏ابتلاهم بيه ‏من نظرة إن شكله غريب الحمد لله على نعمة الأهل لأنهم الوحيدين اللي بيقبلوا الواحد زي ما هو، ‏طولت ‏عليكم بس قولت أشرككم في حياة فنان"‏‎.‎

‎‎

اقرأ أيضًا:

رسالة زوجة رامي جمال للفنان الشاب بعد اصابته بالبهاق

صورة- بصحبة أنغام ... الظهور الأول لرامي جمال بعد إعلان إصابته بـ"البهاق"