شاهد عيان: العسيلي مظلوم والمعجب تعمد استفزازه

ولاء مطاوع | فى حياة المشاهير

محمود العسيلي

الجمعة , 19 يوليو 2019 - 14:35 | اخر تحديث: الجمعة , 19 يوليو 2019 - 14:35

تتواصل ردود الفعل حول أزمة الفنان محمود العسيلي الأخيرة، حيث رفض التصوير مع معجب أراد التقاط صورة معه، لينتقد ‏الجمهور رد فعله الذي جاء متعاليًا.‏

أعاد محمود العسيلي نشر ما كتبه صديق له، وشاهد عيان من حضور الحفل الذي جاءت به الأزمة، عبر خاصية القصص المصورة ‏على انستجرام، كشف فيه الشاهد عن حقيقة ما شاهده خلال الحفل، موضحًا أن الفيديو لم يعرض المشهد بالكامل، وأن العسيلي قد ‏تعرض للاستفزاز من قبل المعجب الذي طلب التصوير قائلًا: "بمناسبة موضوع محمود العسيلي والناس الصيادة اللي بتاخد الأمور ‏مش كاملة وبمزاجها، وكمية العسل والسكر اللي نزل على الفيديو، أنا مليش في كتابة البوستات، بس أنا كل شويه أشوف حد عامل ‏شير للفيديو وكاتب كلام بمزاجه ملوش أي أساس من الصحة، فشهادة حق أنا كنت حاضر الحفلة دي بحكم شغلي".
‏
أضاف: "عايز أوضح حاجة بسيطة جدا، كلنا عارفين الشخص اللى بيبقى في السينما، اللي بيحرق إفيهات في الفيلم عشان الشلة اللى ‏معاه يضحكو، وكلنا عارفين الشخص اللى بيبقى وسط الشلة بتاعته فى أى مكان عام ويرمي إفيهات عشان صحابه يضحكو، هو ده ‏نفس الشخص اللي كان موجود فى الحفلة طول الوقت كان عمال ينادي بصوت عالي ساخر ويعمل أصوات تشتت التركيز والناس ‏اللى جنبه عمالين يضحك، فهو كده شايف إن دمه خفيف جدا ما شاء الله عليه وصحابه طبعا شايفينه صايع أوي وإن صاحبنا مسك ‏عسيلى قعد يسف عليه في الحفلة وعلى فكرة الفيديو مش كامل عشان كان فى حاجات تانية بس طبعا لازم عشان الناس تمارس ‏هوايتها المفضلة في التضليل والتشويه نزلت الفيديو مقصوص بطريقة دي".
‏
تابع شاهد العيان: "وعسيلي حاول يسيطر على أعصابه واكتفى بالرد اللى كان فى الفيديو اللى هو مش كامل أساسا، اللي كمان كان ‏بيوضحله إنه أكيد مش هايسيب الحفلة، ويتصور معاه هو بس ما بقيت الناس بتبقى عايزه تتصور كمان فمفيش حد بيسيب حفلته ‏ويتصور مع حد غير لو حد اقتحم المسرح وطلع من ورا الجارد".‏

اختتم: "ممكن يكون كان اختيار عسيلي للكلام مش صح، بس كل واحد ليه قدرة تحمل وبعدها يفقد أعصابه وكل واحد ليه رد فعل ‏غير التاني، فلما عسيلي اتعصب من سخافته رد الرد ده بتلقائية، اللي هو عايز يستفزه زي ما بيعمل معاه الولد الجامد ده".‏

يشار إلى أن محمود العسيلي تعرض لهجوم شديد بسبب موقفه من أحد المعجبين ورفضه التقاط صورة معه اثناء حفله الغنائي‎.‎

وكان العسيلي نشر علي حسابه بموقع‎ Instagram ‎اعتذارًا رسميًا للجمهور، عن تصرفاته تجاه هذا الشخص، كاتبًا: "أي فنان عارف ‏إنه من غير جمهوره ولا حاجة وصفر عالشمال، وإن من تواضع لله رفعه.. بعتذر بشدة لكل الناس اللي اتضايقت من الفيديو اللي ‏انتشر وبعترف إني كنت غير موفق تماماً في اختيار الألفاظ، ولكن الصورة والله ناقصة وكان كل نيتي عدم تمييز حد عن حد أثناء ‏الحفلة. أنا اسف مرة تانية‎"‎
تابع: "النقطة التانية إني حاولت أقول للشخص اللي بكلمه إن ماينفعش عشان الناس دي كلها لازم تتصور ٣ مرات برا المايك، ولكن ‏هو كان لحوح جدا وكان مصمم وكان صوته عالي جدا وبيزعق وأنا مش عارف اغني، فللأسف قلتله كدة بحسن نية وللأسف كل ‏الكلام دة مش باين في الفيديو".

فاهمين الموضوع غلط.. العسيلي يرد على انتقادات فيديو "الواسطة"

اقرأ أيضا:

بالفيديو- أصالة تشارك عمرو دياب غناء "دا لو اتساب"

والد حسام حبيب يرد على التصريحات المنسوبة له