بعد تعافيه من الإصابة.. 10 دروس مستفادة لـ أحمد أمين

إيمان مندور | فى حياة المشاهير

أحمد أمين

السبت , 6 يوليو 2019 - 20:16

أعلن الفنان أحمد أمين تعافيه من الإصابة التي تعرّض لها الشهر الماضي في الحنجرة، وبسببها توقف عن الكلام لمدة 3 أسابيع.

أوضح أمين عبر حسابه على Facebook، أن حالته الصحية تحسّنت، وسيعود لعمله قريبًا، حيث يخضع حاليًا لجلسات voice therapy، مشيرًا إلى أنه استفاد من تجربة الصمت التي مر بها، وتعلم دروسًا عديدة لخّصها في النقاط التالية:

1- أولا لقيت نفسي عايز اكتب زي زمان.. مش عشان عندي كبت.. لأ.. عشان المخزون بيزيد.. ما هو لما بتقلل وقت الإرسال وقت الاستقبال بيزيد.. أنا بقيت بسمع.

2- قريت كتير.. قريت حتى حاجات متعلقة عالحيطة في المكتب والبيت من زمان قدام عيني وماكنتش قريتها.. وتقريبا قربت اسمع الحاجات كمان.. قربت اسمع الزرعة اللي عندي في المطبخ.

3- وكنت بتواصل مع الناس بالكتابة واحتفظت بشوية ورق منه لقيت الكلام ورا بعضه في سياق مسخرة مش مفهوم بالمرة.. أما الورقة اللي كنت بكلم فيها مراتي لقيت فيها 3 جمل بس.. (ياااه...؟ / ما هي غلسة وتستاهل/ وحاضر يا حبيبتي) بس .. وبيتكرروا.

4- كنت بشاور لاولادي.. وفهموني.. وما اضطريتش ازعق في البيت.. والدنيا كانت ماشية.. معناه إن لو القانون إن بابا مش بيزعق هايترتب على القانون ده إن كلنا هانسمع الكلام منغير زعيق.

5- الصمت محتاج صبر.. وعدم التعبير بالكلام محتاج بلاغة.. مش في انك تعرف تشاور.. لأ.. محتاج بلاغة في اختيار الكلمة اللي هاتشاور بيها عشان تلخص كل كلامك والناس تفهم.

6- من العجائب مثلا اني أنا طلبت الأوردر في الكافيه بالاشارة وجه مظبوط.

7- فيه بلاغة تانية في الاستماع.. أنت ممكن تقول رأيك بتعبيرك وأنت بتسمع.. ممكن تعطل أفكار اللي قدامك.. ممكن تشجعه.. وممكن توصل حاجات كتير بطريقة استماعك بس.

8- اتفاجئت من الحاجات المشتركة بيني وبين ولادي وصحابي القريبين.. كانوا بيفهموني بأقل الاشارات.. واتفاجئت إن ولادي مبسوطين جدا اني بسمعهم بس.. منغير ما اقول حاجة.. فقررت إني لازم اقضي وقت طويل بس بسمعهم.. اكتشفت إنهم بس محتاجين كده.. مش عايزين معلوماتي العبقرية.. ولا أرائي في الحياة.. ولا حلولي الابداعية.. عايزينني مهتم.. بس.

9- ومن ألطف الحاجات اني لما كنت بشاور للناس كانت بتشاور لي حتى أصحابي اللي عارفين الموضوع.. حضرتك أنا بسمع.. أنا عندي مشكلة في صوتي بس.

10- من مصلحة أي انسان إنه يسكت لأن التعبير المستمر السريع الغير محسوب عن أفكارك بيخليك مش لاحق تكون رأي متكامل وناضج.. أنا كنت بسمع حاجة وبسكت بلاقي رأيي بيتحسن تدريجيا.. وف معظم الأحوال كنت بحس ان رأيي مالوش لازمة أوي.. بقول لك ايه.. اسكت احسن. اللي هو من الآخر كده.. فلتقل خيرا.. أو لتصمت.

اقرأ أيضا:
نصيحة نبيل الحلفاوي لأحمد أمين في فترة علاجه

بالفيديو- ريهام سعيد: هذا ما تفعله قناة "النهار" مع المذيعين بها.. دعاء عامر وأحمد أمين سبقوني في هذا الأمر