مخرج "صابر جوجل" عن سارة سلامة: "مواعيدها بايظة ومكياجها Over"

مي جودة | فى حياة المشاهير

سارة سلامة

الجمعة , 21 أكتوبر 2016 - 21:10 | اخر تحديث: الجمعة , 21 أكتوبر 2016 - 21:10

بعد تصريحات الممثلة الشابة سارة سلامة حول عدم رضاها عن تقديم فيلم "صابر جوجل"، قرر مخرجه محمد حمدي الرد عليها.

كتب حمدي عبر حسابه بموقع Facebook: "أصدقائي الصحفيين المحترمين حضراتكم ياما كلمتوني وسألتوني عن الممثلة سارة سلامة وأنا كنت متمسك بردودي المتحفظة والمحترمة، واعتبرت نفسي أكبر من الرد على تفاهات المدعوة سارة سلامة، لكن الحقيقة هي مصممة على الاستمرار في التفاهات والتصريحات المسيئة جلشخصي وللفيلم، ولذلك قررت أرد وأوضح بعض الأمور الخاصة بعمل الممثلة دي في الفيلم، وأهمها أنها بتدعي أن السيناريو اللي تعاقدت عليه مختلف عن الفيلم النهائي اللي أنا عملته، و بالمناسبة دي هقول أهم واقعة وأغرب واقعة ممكن يشوفها مخرج في حياته".

وتابع: "الممثلة بعد التعاقد واستلام نسخة السيناريو قبل معاد التصوير بثلاث أسابيع لم تقرأ جملة واحدة، وده باعترافها لما حضرت أول يوم تصوير لها وبعد محاولاتي لعمل جلسات عمل معها قبل التصوير ودايما مسافرة أو مشغولة أو مبتردش على التليفون خالص أو قافلة التليفون، و هكذا لمدة ثلاث أسابيع، و لما حضرت أول يوم سألتها عن قرائتها للسيناريو و كان الرد الصادم الآتي (بصراحة ملحقتش اقرأ بس أنا عارفة إني طالعة مرات رجب و أني مبخلفش ،،، ثم ضحكة طويلة هههههه)".

واستطرد: "طبعا أنا مضحكتش أنا اتخضيت واتصدمت وجالي ضغط وسكر وقلب وزغللة وكل أمراض الدنيا في لحظة واحدة، وقولت لنفسي روحنا فداهية يا حمدي وربنا يسترها بقى، ده الحقيقة أهم حدث في أول يوم، والحدث ده يلخص ببساطة هذه الشخصية".

وأضاف: "أما بقى عن مواعيدها البايظة و مكياجها الأوفر إلخ إلخ إلخ، دي حاجات مش هتكلم فيها لأن الكل عارفها كويس".

فيلم "صابر جوجل" من بطولة كل من محمد رجب وراندا البحيرى وإيهاب فهمي ومؤمن نور، ومن إخراج محمد حمدي وإنتاج إبراهيم إسحاق، وتم عرضه في عيد فطر 2016.