رانيا محمود ياسين لمهاجميها بعد طردها ملحدا على الهواء: لما أترمي في حفرة ماحدش هاينفعني

خالد طه | فى حياة المشاهير

رانيا محمود ياسين

الأربعاء , 4 نوفمبر 2015 - 18:30 | اخر تحديث: الأربعاء , 4 نوفمبر 2015 - 18:30

اعتذرت الفنانة رانيا محمود ياسين عما بدر منها في برنامجها "صباح العاصمة"، بطردها لأحد الضيوف على الهواء.

وبررت رانيا موقفها عبر حسابها الشخصي على Facebook قائلة: "أنا آسفه جدا للناس عن طرح هذا الموضوع والفقره من أساسها، أولا عايزة أوضح بخصوص حلقة الملحد النهاردة، أولا دي رؤية رئيس تحرير البرنامج، ولازم تُحترم بصرف النظر عن رأيي الخاص في استضافة ملحدين، ثانيا الظاهرة في تزايد وكان يجب طرحها حتي لا تزيد".

وتابعت: "أما بالنسبة لانفعالي فمش فجأة لا الجزء المعروض من الحلقه مجتزأ منه الجزء الأول من الفقرة، وبعدين حضرته بدأ يستفزني من قبل بداية الفقرة، علشان قلتلوا إني شفته قبل كده في حلقة أخرى، وإنه كان سلفي واتعصب جدا، وقالي أنا مش جاي أتكلم في موضوع شخصي قلتوا لا أنا سمعتك في برنامج تاني قلت كده، وبدأ يحتد علي، وأنا علشان هو ضيفي مردتش عليه وأكبّر الموضوع لأنه أتكلم معايا انا وشريف بطريقة غير لائقة، وهدد إنه هيمشي، بصراحه كان خايف من المواجهة وحسيت إنه بيعمل حيل دفاعية لنفسه قبل الحلقة".

وأردفت: "بعدين بعد ما بدأنا المناظرة مكنش عايز الضيف الباحث الإسلامي يرد، وكل ما يتكلم يسكته، وكمان كان رافض أن تدخل مداخلات تقاطعه، يعني من الآخر كلنا نمشّي الحلقه على كيفه، بالتالي أنا كنت احتراما للمهنية لازم أدي فرص متساوية للضيفين، أما ديني فأنا غيورة عليه وده مزعلش حد، لأن ده مش موضوع سياسي يجب أن تتحكم المهنية في حواري وأكون حيادية، دي ثوابت واحد بيلعب بأفكاره المسمومة على الناس، ورفض الرأي الآخر إنه يعبر عن نفسه".

واختتمت رانيا محمود ياسين تصريحاتها قائلة: "اختلفوا زي ما انتو عايزين، لكن أي تجاوز لا وأنا تعملت بمنتهة المهنية في الحلقة دي، واللي موجود علي النت جزء مجتزأ من الفقرة مش الفقرة كاملة، وعلي أي حال بشكر كل الآراء الإيجابية وبحترم الآراء المختلفه طالما محترمة، وعلى أي حال حتي لو في ناس مش عاجبها بقولهم يوم ما اترمي في حفرة وابقي أمام الله عز وجل وربنا يقولي ما دافعتيش ليه عني وعن سيدنا النبي مش هينفعني حد لما ارد علي ربنا عز وجل وأقول معلش كنت بتعامل بمهنية!! طيب استضفنا ليه سؤال منطقي دي رؤيه رئيس التحرير ولازم احترامها، إلي جانب الظاهرة في ازدياد ويجب طرحها، مع الاعتبار إني لا بحب إعلام الفرقعة ولا أميل ليه شكرا".

وكانت رانيا محمود ياسين تعرضت لانتقادات من جانب بعض المشاهدين، بعد أن خرجت عن شعورها أثناء تقديمها لبرنامج "صباح العاصمة" عبر شاشة "العاصمة"، وذلك أثناء استضافتها لأحد الشباب الملحدين. (بالفيديو- رانيا محمود ياسين تطرد ملحدا على الهواء)