نجل إبراهيم يسري ناعيا والده: عاش بأخلاق الفرسان وتعلمت منه هذا الدرس

خالد طه | فى حياة المشاهير

محمد مع والده الراحل إبراهيم يسري

الثلاثاء , 28 أبريل 2015 - 21:04

بكلمات مؤثرة عكست مدى قوة ارتباطه به وحبه له، نعى محمد نجل الفنان إبراهيم يسري والده الراحل، والذي لاقى وجه ربه الكريم الأسبوع الماضي.

وكتب محمد إبراهيم يسري عن والده الراحل عبر حسابه الخاص على Facebook: "الفراق صعب علي اللي عايشين بس" جملة سمعتها من واحد قاعد في المستشفي لما شافني شايل أبويا وداخل أغسّله ومن ساعتها وهي بترن في ودني.. ممكن ناس كتير تشكك في مصداقيتي لو اتكلمت عن ابويا لكن بصراحة دي آخر حاجة ممكن أفكر فيها لأن ربنا وحده اللي عالم إن كل كلمة بكتبها دلوقتي مش هتوفي الراجل ده حقه".

وتابع: "وأنا مش بتكلم عن الفنان، لأنه زي أي فنان بيمتهن الفن لا يمكن الناس كلها تجتمع عليه وأكيد هتتفاوت درجات حبهم ليه.. أما الإنسان فده موضوع تاني خالص.. و من نعم ربنا علينا إنه الحمد لله حبب ناس كتير فيه وكلهم بيشهدوا بأخلاقه حتي لو علاقتهم بيه بس من خلال التلفزيون".

وكشف نجل إبراهيم يسري عن أبرز سمات والده الراحل: "كل اللي يعرفوني كويس عارفين إننا عيلة صغيرة أوي وعلاقتنا قوية أوي ببعض و ده كله بفضل أبويا وأمي برغم إن والدي فقد والديه وهو طفل صغير واللي ربته كانت أخته الله يرحمها.. وكانت نتيجة ده إنه كبر هادئ الطباع، بيحب خصوصيته جدا، عاشق للقراءة، بيكره الصوت العالي وبيحافظ دايما علي حدود الاحترام في التعامل مع أي حد بغض النظر عن مكانة الشخص ده سواء في الوسط الفني أو في الحياة العامة".

كما أفصح محمد إبراهيم يسري عن درس هام تعلمه منه وهو في مرحلة الطفولة: "وأنا طفل عندي ١٤ سنة كنت واقف في المطبخ وأبويا الله يرحمه كان موجود وسامعني وأنا باتكلم في التليفون وأنا أهلي كانوا معودني إني أتكلم وأقول اللي أنا عايزه قدامهم عادي ومخافش لأَني لو خفت أبقي بغلط، المهم إنه سمعني وأنا بقول علي واحدة معانا في المدرسة إنها سخيفة أوي وبعد ما قفلت التليفون جابني وقعد يتكلم معايا وطلب مني إني عمري ماتكلم علي حد من ضهره وإني حتى لما أكبر وأتعرف على حد عمري ماتكلم على أسراره أو عنه أبدا مهما كان غلطان فيا".

واختتم نجل إبراهيم يسري رثاؤه لوالده قائلا: "كانت هي دي أخلاق ابراهيم يسري.. عاش رجلا بأخلاق الفرسان النبلاء حتي وإن لم تكن تلك سمات زمنه ورحل عنا تاركا سيرة طيبة.. الفراق فعلا صعب على اللي عايشين بس.. بس لما بيكون حد ربنا محبب فيه الناس بالشكل ده بيبقي الفراق صعب أوي".

وتوفي إبراهيم يسري في الاثنين ٢٠ إبريل، بعدما ساءت حالته الصحية خلال الأيام الأخيرة عن عمر ناهز ٦٥ عاما. (شاهد- غياب الممثلين الشباب عن جنازة إبراهيم يسري)

وأقيم عزاء إبراهيم يسري في 21 إبريل الجاري، وحضره كل من محمود ياسين وهادي الجيار وأشرف عبد الغفور وأحمد ماهر وبسام رجب وكمال أبو رية ونبيل نور الدين وشريف رمزي ومظهر أبو النجا وسيف عبد الرحمن، أحمد صيام، والمنشد محمد الكحلاوي.

ومن الفنانات حضرت سميرة سعيد والفنانة المعتزلة شهيرة وابنتها رانيا محمود ياسين ونرمين الفقي ومنال سلامة ورجاء حسين وفادية عبد الغني. (شاهد- سميرة سعيد ومحمود يس وعشرات الفنانين في عزاء إبراهيم يسري)