مبدئياً صدق أو لا تصدق أنا شخص ضد الإسلام السياسي، ضده عشان أسباب دينية قبل ما تكون ثورية، لأن شئنا أم أبينا أخطاء تيار الإسلام السياسي بتشوه الإسلام نفسه واللي شفناه في سنة ونص منهم بيدل إنهم لا مستعدين فكرياً ولا أخلاقياً ولا دينياً إنهم يبقوا واجهه الدين.
أنا صوتت ضد شفيق ومحبش حد يقول أني صوتت لمرسي لأنه غير مؤهل لحكم قريه من وجهه نظري… إمال صوتت ضد شفيق ليه؟؟؟؟؟؟؟
بمنتهي البرجماتية (التفكير في المصلحة)
-مش من مصلحة التيار الثوري نهائياً إن سواء (المجلس العسكري إو الإخوان) حد فيهم يهيمن علي كل حاجة أو يخلص منهم علي التاني، لأن ساعتها هيبقي الدور علي الثوار.
- الكلام الوجية عن تكويش الإخوان علي السلطات إنتهي بحل البرلمان، و مستحيل البرلمان اللي جاي ياخد فيه التيار الإسلامي حتي نص المقاعد اللي خدوها! المشكله إن الآيه دلوقتي إتقلبت و بقت إن لو شفيق كسب هيبقي المجلس العسكري هو اللي هيكوش علي كل حاجة.
-الثوره الرومانية: لما نائب الرئيس ليسكو (شفيق بتاعهم) إختاره الشعب في إنتخابات بعد الثورة، ليسكوا قتل 10 آلاف ثائر وتحول لديكتاتور أكتر من الرئيس المخلوع تشاوتشيسكو.
- شفيق مستعين برجال الحزب الوطني، وتمن دعمهم ليه لازم هيكون حصانة وإمتيازات، عشان يديهم الحصانه لازم يفضل مسيطر علي القضاء والنائب العام وعشان يديهم امتيازات من أراضي وتعيين معارف وفرص شغل مع الحكومة لازم يسيب فاسدين في اجهزة الدولة عشان يعرف يمرر الكلام ده… يعني باختصار شفيق حتي ولو نيته حسنة مضطر يعيد دوله مبارك الفاسدة. وأخيرا إستمرار الجيش في وضعه الاقتصادي معناه ضعف فرص الاستثمار وإسأل فيها أي إقتصادي. يعني شفيق جاي ومعاه أسباب فشله.
- شفيق وعد بإسقاط ديون الفلاحين، و ديون أصحاب التاكسي الأبيض و أخيراً وعد اللي تعدوا بالبناء علي الإرض الزراعيه إنه هيسامحهم!!!! غير أنه كده حول ميزانية الدولة للصرف علي حملته الانتخابيه، فالمصيبة الحقيقية إن ده معناه ترسيخ لانعدام المسؤليه وهيخلي المصريين يستلفوا ويقولوا إن شاء الله في موسم الانتخابات ديونا تتلغي!
الوعود دي مسمار آخر في نعش الإصلاح الاقتصادي
- لو مرسي مكسبش و مسك شفيق و فشل (ودة أمر مفروغ منه إنه يفشل) بعد نهاية فترته هيشغل الإخوان إسطوانه إنتوا مجربتوناش والإعلام ظلمنا و هنتلاقي نفسنا بدل ما بنأجل الثوره ٤ سنين بتوع شفيق هنستنى الـ4 سنين اللي بعده بتوع الإخوان واللي برضه لأسباب كتيرة مش هينجحوا من وجهه نظري … فإنهارده لو مرسي كسب ممكن بعد فتره الرئاسه اللي جايه نخلص من العسكر والإخوان في ضربه واحدة.
- لو مرسي كسب غالباً أجهزة الدولة مش هتقدر تستحمله وهيخترعوله مخرج قانوني ودستوري من اختراعهم وغالباً مدته حكمه لن تستمر سنة أو سنتين بالكتير (مثال: رئيس مجلس الدولة صرح بالفعل إن حكم حل مجلس الشعب يعني إعاده إنتخابات الرئاسة)… أما شفيق فهيستخدموا كل التلاكيك القانونية عشان يخلوه يقعد الأربع سنين.
- أنا بدين قيادات الإخوان وشايف إنهم السبب في الموقف السيء اللي إحنا فيه، وبتمنى من كل إخواني نيته حسنة (وهما النسبة الغالبية في الإخوان) إنه يراجع كل اللي حصل من أخطاء إخوانية فادحة هتأخر الثورة سنين، ويفكر إنه هيتكتب في التاريخ إنه كان جزء من أخطاء الإخوان بتبريره قرارات هو مش فاهمها أو بيردد مبررات حفظوهاله.
وشهاده حق بشهدها مِن تعامل مع قيادات إخوانيه وأصدقاء إخوان في أماكن اتخاذ القرار…. والله العظيم بيضحكوا عليكوا لما بيقولولكوا هما فاهمين اللي بيحصل وقارينه، قيادات الإخوان تايهه والقرارات متخبطة وإنت يا غلبان مينفعش تعرف الكلام ده عشان لو شكيت في تقديرهم للأمور هتناقش وتعترض ويبقالك رأي حقيقي وساعتها مش هيبقي فيه سمع وطاعة.
- هييجي يوم لما تعرف الحقائق هتفهم إن استمرارك في الإخوان جريمة إخلاقية، وإن أفضل خدمة يقدمها الإخوان للثورة إنهم يبتعدوا عن السياسة ويخلوهم في الدعوة.
- أخيراً محترم قرار كل إنسان والموضوع مش أبيض وأسود الموضوع رمادي لأقصي درجة ممكنة.
ريم مصطفى تتألق بفستان أسود يبرز رشاقتها في حفل "جوي أووردز"
منذ 9 ساعات
في أجواء رومانسية وتورتة عليها صورها … مي عز الدين تحتفل بعيد ميلادها مع زوجها
منذ 10 ساعات
#شرطة_الموضة: نسرين طافش بفستان أحمر مكشوف الصدر في جوي أووردز … سعره 50 ألف جنيه
منذ 10 ساعات
مها أحمد وأمير شاهين بين الحضور … لقطات من حفل مصطفى حجاج في القاهرة الجديدة
