في رحلة لم تدم لأكثر من 30 ثانية داخل مصعد عمارة سكنية تبدو كأثر مصري بحي جاردن سيتي، جاء في ذهني رحلة سيدة احترفت الإعلام منذ أكثر من 40 عاما، من الاهرام إلى مونت كارلو، فالتليفزيون المصري، ثم أخيرا "ببساطة" عودة مرة أخرى إلى الراديو عبر نجوم FM في برنامج "ببساطة" خلال الشهر الكريم.
عندما أدخلني حارس بوابة "نادي جاردن سيتي" لملاقاة سلمى الشماع، كنت أتصور أن هذه السيدة المتأنقة بالعقد ذو اللون التركواز سيكون من الصعب إخراج ما بداخلها من أسرار وآراء مهمة في هذا الوقت الحساس الذي يمر به الإعلام المصري، ولكنها قررت تلخيص الوضع الحالي في ستة تصريحات نارية كعادتها دائما.
ما عرفوش يوقعوني
بعد رحلتي الطويلة بقى عندي تجربة مقاومة النجاح، لما تنجح أوي بتلاقي الناس كلها بتهجم عليك أوي، فاكتشفت إني قوية، لأني أقوم بعملي بحب متناهي وأحب مهنتي، فلما حاولوا يوقعوني ما عرفوش".
نجوم FM مش أقل من مونت كارلو
اتبسطت جدا بالعودة للراديو، لما رحت مونت كارلو، كان شيء متقدم جدا، ولكن نجوم FM نفس التركيبة، ولكن في بلدي، وسط احترافية من القائمين على المحطة.
طول ما أنا ماشية، الناس بتكلمني عن البرنامج، وطول ما انا ماشية بسمع جملة "البرنامج جامد جدا".
نجوم FM إذاعة شبابية، ولكن عندما يعرف المستمع أن هناك برنامج لسلمى الشماع، يفكرون في أنه سيكون أتقل.
مشروع جديد
هناك مشروع قناة جديدة مع د. مأمون فندي قائم بالفعل، والإجراءات بتاعتنا ماشية، وفيها فكر ومستقبل، ولو مش هقدم حاجة مختلفة، يبقى الأفضل إني ما اعملش.
وانتقدت الشماع فكرة عمل الصحفي أو الإعلامي في أكثر من مكان، مؤكدة "لا يمكن أعمل حاجتين شبه بعض أو عكس بعض".
حجاب التليفزيون بعد الثورة
التليفزيون المصري بعد الثورة كان يحتاج أن يعكس صورة مجتمع مصري جديد، جريء شاب متحرر، في إطار شاشة "شكلها حلو".
بعد حجاب العقل، كل حد بيشتغل ما بيعملش اللي هو مقتنع بيه، لكن بيعمل اللي الناس عايزاه، ولكن لازم نرضي ضميرنا، حسب نفس المعايير اللي لازم يتم تطبيقها حسب شروط الجودة.
التليفزيون المصري لكل المصريين، لازم يبقى بيقدم برامج توعي الناس أكتر، ولو فكرنا بالشكل ده هنلاقي المنتج شكله اختلف.
سيطرة السلفيين
لازم الدولة تخرج من معادلة سيطرة السلفيين او الإخوان، ولكن في حالة سيطرة التيار الإسلامي يبقى نتعامل مع القنوات الخاصة.
هناك قنوات دينية ما بتعملش غير فتاوى 24 ساعة، والدعاة بيتكلموا في جمل غير مفيدة على الراديو والتليفزيون، والناس أخلاقها بايظة.
التليفزيون المصري دلوقتي متحجب، إحنا بنشوف دلوقتي شيوخ طول الوقت قاعدين بيتكلموا!
النيل للمنوعات لن تكرر
قناة النيل للمنوعات لن تكرر، بكل كوادرها ونجومها ومذيعيها ده حتى برنامج زي اسهر معانا لن يكرر مرة أخرى.