ميليشيات كارهي الثورة

محمد دياب في

الخميس , 28 يوليو 2011 - 20:07

الجمعه دي اتفقت القوي الوطنيه علي التظاهر يوم الجمعه القادم، ورغم الخلافات اللي زادت في الفتره الاخيره إلا إن الجميع وعد بضبط النفس، وبصراحه أنا عندي ثقة في كل المتظاهريين علي ضبط النفس، ولكن خوفي ليس منهم.

الثوره علي قد عظمتها مجمعتش المصريين كلهم عليها، في الأول كانوا الرافضين للثوره قله، ما بين منتفعين من النظام السابق وما بين اللي متمسك بموقفه من الهجوم علي الثوره لأن الإنسان بطبيعته مبيحبش يطلع غلط "بيسموه الاستثمار الفكري" وبمرور الوقت انضم لهم قصيري النفس و"دول كتار"، وأعضاء الحزب الوطني و أفراد الشرطة، وضيف علي كل دول أهاليهم.

طبعاً يؤخذ علي كثير من الثوار الإصرار علي استعداء فصائل متعددة في نفس الوقت مهما كانت المبررات، وللأسف أصبح يحركنا الحماس وليس الحكمة.

في ظل استعداء كل هولاء كان من الطبيعي أن ينتقل كثير من الرافضين إلي خانه كارهي الثورة، وكان من الطبيعي أن تجد اتهامات التخوين الجزافية صدي لدي الكارهين، والكارهين للثورة مابين اعتصام مصطفي محمود وآسفين يا ريس وأبناء مبارك واعتصام روكسي، في معظمهم ليسوا مأجورين أو لهم مصالح أو بلطجية، كما نحب أن نطلق عليهم ، بل أن أغلبهم للأسف شباب وطني يرى تعريفاً آخر للوطنيه اختلف معه تمام الاختلاف خاصه الجزء الخاص بتخوين أي مصري.

وطنيه التحرير وطنيه أكثر ثقافه وأزعم أنها أكثر شجاعة لأنها خرجت وقتما كان الخروج انتحار، إلا أن نجاح الثورة أصاب الكثير من الثوار بالغرور الفكري، فأصبح الكثيرين لا يعبأون برأي الشارع في مطالبهم التي غالباً ما تكون ذات أولولية، ولكن بلا اهتمام بإقناع الشارع الذي أصبح أكثر ما يستفزه التعامل معه علي أنه غبي.

وبغض النظر أني شايف أن وطنيه كارهي الثورة هي وطنية عندها حول، إلا أن بعض المؤمنين بأن الثورة جزء من مخطط علي استعداد أنهم يموتوا عشان يخلصوا مصر من المؤامرة المزعومة وبدأ منهم مجموعات تتجمع و يعملوا لوبات صغيرة وأكاد أجزم أنهم "بعد تحريض اللواء الرويني" مسؤلين عن الشراره الأولي لأحداث العباسية.

الجيش للأسف محققش في أحداث العباسية، بل في أكتر من تصريح سمي المعتدين مواطنين شرفاء وبالدعم المعنوي ده مبقاش عندي شك أن اللي حصل في العباسية هيتكرر تاني وهيخلي المجموعات الصغيرة اللي بتقاوم الثورة تحس بشرعيتها وعندي شبه يقين أن منهم اللي هيتحول لميليشيات كارهة للثورة.

واسعه شويه!!! طب تخيل أنك واحد مصدق الكلام بتاع أن حد من الثوار جاسوس و جزء من مؤامره لتدمير بلدك، مش هتتمني أنه يتعدم في ميدان عام علي حد تعبير احمد سبايدر؟!! مش هتتمني يختفوا من علي وجه الارض؟!! مش هتتمني الاعتصام يتفض وياريت بمصيبة عشان ميرجعش تاني ابداً؟!!
بالنسبالي حاسس أن هو ده التطور الطبيعي لما يحدث من تحريض، ناس فاكرة أنها بتحب مصر هتحاول تقضي علي اللي بيتقال عليهم خونة، ده اللي لسه حاصل في النرويج تقريباً، ولو ماخدناش موضوع التحريض ده بجدية أكتر من كده هنصحي علي جرائم ترتكب بإسم الوطنيه المغلوطة، بصراحه حاسس أن ده قرب قوي

أرجع لجمعه 29/٧ اللي هينضم فيها الاسلاميين للمعتصمين في التظاهر، الاسلاميين هما كمان في أسابيع الاعتصام تم شحنهم ضد المعتصمين وتقدر تلاحظ ده في اعتداءات العباسية اللي كان فيها ملتحين كتير "خد بالك قلت ملتحي ومنسبتوش لأي فصيل عشان بكره التعميم" واحد منهم في أحد الفيديوهات بيحارب المعتصمين وبيقول: "إلى الجهاد".

بذكر الكلام ده عشان بس نفتكر أن فيه نار تحت الرماد، ورغم تعهد الجميع بضبط النفس إلا أن خوفي مش من المعتصميين ولا التيار الإسلامي، بل خوفي من "ميليشيات كارهي الثورة" اللي قاعدين علي الانترنت يحرضوا كل كارهي الثورة أنهم يروحوا التحرير عشان يفضوا الإعتصام ومسمينها "جمعة فض الإعتصام"، الموضوع جد وفيه ناس كتير بتتبادل الدعوة دي.

طبعاً هما مش هيستخدموا القوة وسط العدد الكبير بتاع بكرة بس ممكن زي أحداث العباسية يسخنوا الناس علي بعض، تخيل لو واحد وسط المتظاهرين شتم ملتحي وقاله "مدنية مدنية".

في 100 فكرة عشان أوقع بين الناس خاصة لما يكونوا مشحونين وأعداده كبيرة، مهم الناس كلها يبقي حذرها مضاعف، وتاني أنا بقول الكلام دة كله عشان بفكر لو أنا مكان حد مش طايق الاعتصام وعاوز اقضي عليه للأبد هعمل ايه؟ فلقيت أفضل السيناريوهات أن أحد الجمع تتحول لإشتباكات داميه تخلي مصر كلها ضد أي تظاهرة مستقبلية.

بصراحة أهم عندي من أي اتجاه او فصيل إن مفيش مصري كمان يفقد روحه أو ينزل منه نقطه دم واحدة، وأتمني يكون وضح للجميع أن طول ما شعار الانتقام هو شعار المرحله ومش التسامح هنضطر نبص لورا كتير ومش هنمشي لقدام بنفس السرعة.

أخيراً وبعد إعتراف اللواء الرويني أن أفراد من الجيش يطلقون الشائعات بأوامره داخل الميدان فإن خطوره أن تحدث أي إشتباكات تتضاعف لأن الشارع ساعتها للأسف ستطول إتهاماته المجلس العسكري.