فيديو - ابنة مديحة كامل: والدتي توفيت بهبوط حاد في الدورة الدموية مش ورم .. وشافت حادث عمر خورشيد بعينها

محمد سليم | فى سينما وتلفزيون

ميرهان الريس ابنة مديحة كامل

الأربعاء , 16 سبتمبر 2026 - 21:23

حلت السيدة ميرهان الريس، ابنة الفنانة المعتزلة الراحلة مديحة كامل، ضيفة على حلقة اليوم من برنامج "الستات" المذاع عبر قناة النهار، حيث حاورتها الإعلامية سهير جودة.

تحدثت ميرهان الريس عن كواليس اعتزال مديحة كامل قائلة: "كانت بتعمل مسرحية مع الفنان الراحل سعيد صالح، وكانت في نفس الوقت في فيلم "بوابة إبليس". جدتي والدتها كانت أحلى منها، وجالها جلطة في المخ، والست الجميلة دي خلال 3 أيام شعرها بقى كتانة بيضة وجسمها اضمحل، ساعتها ماما جالها صدمة وحست إن كله زائل، وده خلاها تعيد تفكيرها مع نفسها، وخدت قرارها بالاعتزال والتفرغ لدراسة الدين والتقرب من الله".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تصريحان ميرهان الريس ابنة مديحة كامل

وأضافت ابنة مديحة كامل: "بعد الاعتزال كانت بتقرا خواطر الشيخ الشعراوي، وتحضر دروس الدكتور عمر عبد الكافي وتسمع الشرايط بتاعته ... وكانت بتقرا في الفقه والسنة والشريعة دول أكتر حاجة .. غير القرآن الكريم وتفسيره".

تصريحان ميرهان الريس ابنة مديحة كامل

ونفت ابنة مديحة كامل أن تكون قد ضغطت على والدتها لارتداء الحجاب قائلة:"أنا وهي عملنا عمرة مع بعض قبل الحجاب بكتير، هي اتحجبت الأول سنة 1991، وقالت لي لازم تتحجبي، قلت لها لأ أنا عندي شخصيتي مش همشي وراكي، زي البنات في السن ده، وبعد شهرين أنا اتحجبت".

طالع أيضا - أحمد عبد الوهاب ومراد مكرم وميشيل ميلاد من بينهم … صور من كواليس حكاية "ما لم يحك عن بني مزار"

تصريحان ميرهان الريس ابنة مديحة كامل

وردا على سؤال عن سبب وفاة مديحة كامل، قالت ميرهان الريس: "سنة 1988 جالها روماتويد ومشيت على كورس علاج وكانت بتمثل وتشتغل عادي، وفي 1992 أول 1993 الروماتويد عمل مية على القلب، واتعالجت بكورتيزون تخنها، وقعدت 6 شهور تعاني وخفت والقلب رجع سليم، والسنة اللي بعدها حجت مع أبوها وكانت بتخدمه. مفيش ورم ومفيش لندن، هي زي موضة الثمانينيات عملت تحاليل وطلعت زي الفل، وتوفيت فجأة بهبوط حاد في الدورة الدموية".

تصريحان ميرهان الريس ابنة مديحة كامل

وحول الفنانات اللاتي بقين على اتصال بوالدتها بعد الاعتزال، قالت ميرهان الريس: "سهير رمزي، والراحلة سهير البابلي، وميرفت أمين، وشادية حضرت فرحي مع إنها مكانتش بتحضر مناسبات. وشمس البارودي كنا بنقابلها في دروس دين، وهالة فؤاد قبل مرضها ووفاتها بفترة قليلة".

كما تحدثت ابنة مديحة كامل عن وقع صدمة وفاة الفنان عمر خورشيد على والدتها قائلة: "حادثة أستاذ عمر خورشيد الله يرحمه كانت قدام عينها، كانت في العربية اللي وراه. شافته بيطير من قزاز العربية بيخبط في العمود وبينزل وبيتدبح بقزاز العربية .. هما كانوا كإنهم أشقاء، وقعدت فترة طويلة نفسيتها تعبانة جدا بسبب الموضوع ده".