محمود الليثي: أخدت إجازة يوم حفلة شيرين عبد الوهاب عشان أبقى معاها وعيطت أول ما طلعت على المسرح

نهال ناصر | فى حياة المشاهير

محمود الليثي وشيرين عبد الوهاب

الأربعاء , 12 أغسطس 2026 - 11:22 | اخر تحديث: الأربعاء , 12 أغسطس 2026 - 11:22

تحدث الفنان محمود الليثي عن عودة الفنانة شيرين عبد الوهاب ودعمه لها في حفلها الأخير وتقديمهما أغنية "عم المجال" معا.

وكشف محمود الليثي أنه أخذ في يوم حفلة شيرين عبد الوهاب إجازة خصيصا لها وقال في مداخلة هاتفية مع الإعلامية بسمة وهبة ببرنامج "90 دقيقة": "كان عندي حفلة الساعة 5 الصبح، أنا أخدت إجازة عشانها عشان أروح الحفلة وأقعد اتفرج عليها وأروح الكواليس وأطلعها المسرح، أنا عيطت أول ما شيرين طلعت على المسرح، لما نزلت فيديو أغنيتنا على صفحتي الناس كلها بتدعيلي وفرحانين برجوعها".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وعن دعمه لها قال محمود الليثي: "شيرين عبد الوهاب أختي ولما البني آدم بيمر بأي حاجة تعطله في حياته بيستعين بإخواته، هي كان عندها مشكلة معينة في حياتها وأنا كنت أول الحاضرين في الحكاية دي والحمد لله خلصت، إحنا مصر والرجولة اتخلقت في الستات والرجالة المصريين دي شهامة إحنا مولودين بيها متعلمنهاش منعرفش نسيب حد في محنة".

نرشح لك: ليلى زاهر عن زوجها: أول ما شفته أعجبت به ... وهشام جمال: حاسس الولاد هيقووا علاقتنا

وتحدث محمود الليثي عن عودة شيرين عبد الوهاب في حفلها بالساحل الشمالي بعد فترة غياب وقال: "الشخص الناجح ناجح بعد فضل ربنا لأنه بيعمل حاجة بيحبها وبينجح فيها محدش هيعرف يعطله عنها ولا هيختفي عن جمهوره، هي كانت فترة إجازة لشيرين عبد الوهاب تاخد راحة وتعرف تفكر وتعمل أغاني جديدة عشان ترجع لجمهورها بشكل تاني وهي نزلت ووقفت على المسرح قدام 40 ألف شخص بيحبوها".

وردا على سؤال بسمة وهبة حول ما تطلبه شيرين عبد الوهاب منه والدعم الذي تريده قال محمود الليثي: "كان في شوية ناس مفروضين عليها وهي بتتكسف، يعني بيعيش البجح على قفا اللي بيتكسف لما يكون في ناس مش عارف تبعدهم عنك ووجودهم بيضرك بس مش عارف تبعده فتستعين بحد يقوله أنت ليه هنا يلا أمشي".

وأضاف: "شيرين عبد الوهاب بسيطة جدا بتدخل القلب بسرعة، مش بتحط حد في دماغها دايما بتقول ربنا يرزق الناس كلها وياخدني وسطيهم، لو ماشيه معاها 10 آلاف جنيه وقابلت أي حد في الشارع تديهم له بيصعب عليها الناس مش بتكلم حد وحش ولا تضر حد مفيش حد بالإحساس دا يبقى من جواه وحش".