محمد حماقي يرد على انتقادات "بحريه": مفيش حاجة غلط في الأغنية

نهال ناصر | فى موسيقى وحفلات

محمد حماقي وشيرين عبد الوهاب

الأربعاء , 1 يوليو 2026 - 10:37 | اخر تحديث: الأربعاء , 1 يوليو 2026 - 10:37

تحدث الفنان محمد حماقي عن أغنيته "بحريه" التي طرحها ضمن ألبوم "سمعوني" وشاركته في الغناء الفنانة شيرين عبد الوهاب، وهي الأغنية التي أثارت جدلا وقت طرحها بين معجب بها ومعترض على كلامها.

وقال محمد حماقي خلال لقاء مع Billboard Arabia: "أنا طول الوقت بقول أنا لو عملت أغنية الناس "مهنجتش" قدامها شوية يبقى مفيهاش حاجة جديدة، ممكن تقف شوية قدامها متبقاش مستوعب وبعدين تحبها أوي دا معناه إن في حاجة جديدة وحلوة، الأغاني اللي من أول لحظة تحس أنك عارفها دي أغلب الوقت مفيش فيها حاجة جديدة".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع محمد حماقي: "أغنية "بحريه" من النوع اللي فيه حاجة جديدة بتاخد وقت عشان تستوعب وبعدين بتنبسط وبتحبها، الأغنية كان بقالها كتير معايا، وشيرين عبد الوهاب أقتنعت بيها وأول مرة سمعتها قامت وقفت من مكانها وقالت "أنا بقالي سنين مسمعتش حاجة حلوة كدة" والأغنية فيها عناصر كتير مهمة، أولا أنا وشيرين مصريين والأغنية من قلب ثقافة المصريين كألفاظ وكموضوع، فكرة البنت اللي بتقول لحبيبها تعالى أتقدم ودي فكرة اجتماعيا حلوة فكرة "طيبة" شبه المصريين، وفكرة الشاي في العصرية دي ليها علاقة بالثقافة المصرية، زمان لقطة اليوم عند أغلب الشعب المصري هي كوباية الشاي اللي بتتشرب في البلكونة وقت العصر، أستاذ محمد الموجي كان ليه أغنية زمان غناها بنفسه كانت بتقول "يا فنجان شاي مع سيجارتين ما بين العصر والمغرب"، هي بتحلم بفكرة أنها هتتجوز حبيبها وتبقى قعدة كوباية الشاي دي معاه هو مفيش حاجة غلط خالص في الأغنية هي ألفاظ مش معتادين عليها زي كلمة "الفراندة" محدش بيستخدمها ودي حاجة حلوة أن نحيي جزء من تراث وثقافة الشعب المصري حتى كألفاظ فكرة الكلام بتاع "بحرية" أنا بشوف أن عزيز الشافعي أبدع في اختياره للألفاظ وسرد الحكاية بالصورة الثقافية المصرية واللحن كان خطير وتوما عمل مزيكا خطيرة".

نرشح لك: محمد علاء وهند عبد الحليم وإسلام إبراهيم ووئام مجدي من بينهم … النجوم في عيد ميلاد أحمد عبد الحميد

وأوضح محمد حماقي أنه اعتاد على فكرة طرح أغاني لا يتسوعبها الجمهور من المرة الأولى لكن مع تكرار سماعها يحبها قائلا: "حصلت معايا كتير وقت أغنية "أحلى حاجة فيكي" شيرين عبد الوهاب كلمتني بعد الألبوم ما نزل بـ 3 أيام وقالتلي أنا أول يوم سمعت قلت يا خبر أبيض يا حماقي دا اللي أنت راجع بيه بعد غياب وبعدين تاني يوم سمعت الأغنية حسيت أن فيها حاجة وتالت يوم حسيت أنها حلوة، وحصل كده في "بحريه" وحصل كده قبل نزول الألبوم وقت ما نزلت "قالوا عني إيه"".

وحرص محمد حماقي على توجيه التحية لشيرين عبد الوهاب قائلا: "أوجه تحية كبيرة شيرين عبد الوهاب إضافة كبيرة للأغنية وسعدت بالغناء معاها إحنا من زمان صحاب ونفسنا نشتغل سوا والحمد لله أن الموضوع حصل والناس حبته".