هند صبري: لا يمكن أمس السيادة المصرية بسوء ... هناك تلاعب واللي عنده كلامي صوت وصورة يجيبه

مي جودة | فى حياة المشاهير

هند صبري

الجمعة , 15 مايو 2026 - 14:05 | اخر تحديث: الجمعة , 15 مايو 2026 - 15:05

تحدثت النجمة هند صبري عن الانتقادات التي طالتها والدعوات لطردها من مصر بسبب دعمها لقافلة تكسر الحصار عن غزة.

قالت هند صبري: "أنا كهند لا عمري ولا هيحصل ولا يمكن يحصل، إني أمس بأي طريقة السيادة المصرية والشعب المصري الذي أعشقه، والقيادة المصرية، وسلامة الأراضي المصرية التي بالنسبالي أنتمي لها قولا وفعلا، سواء كان في مقر اقامتي، زوجي مصري، وبناتي مصريات تونسيات، وعندي الجنسية المصرية وده فخر كبير وشديد واشتغلت في مصر 26 سنة واخترت الإقامة في مصر والعمل في مصر"، حسب تصريحاتها لبرنامج "معكم منى الشاذلي".

وأضافت هند صبري: اشتغلت في أعمال افتخر بمشاركتي فيها زي مسلسل هجمة مرتدة وفيلم الممر واتشرفت اني وقفت قدام سيادة الرئيس عبدالفتاح السيسي في الندوة التثقيفية للقوات المسلحة الحادية والثلاثين.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

واستكملت هند صبري: مافيش أي تدوينات، أنا هقول اللي حصل لأن أنا بسكت كتير ومابتكلمش، ساعتها كنت وقت حرب غزة، وكل الناس كانت بتساند وتؤازر أخواننا الفلسطينيين في غزة، وكان فيه ساعتها أصوات بتنادي في أوروبا بمسيرة دولية، وكان في زملاء كتير منزلين نفس الـStory، ومكناش فاهمين ولا مدركين اللي ممكن يحصل، ولما فهمت الأبعاد أنا مسحتها من نفسي ولا عمري اتكلمت ولا عمري قولت أي حاجة تمس السيادة المصرية، لكن معرفش بقى كان في حاجات اتشالت من السياق بتاعها، انتمائي لمصر زي ما أنا منتمية لتونس بلدي، وانتمائي وحبي وعشقي للمصريين لا يمكن يخلينا أفكر أقول حاجة ضد الشعب والسيادة المصرية.

وتابعت هند صبري: هناك تلاعب لأن بيقولوا ما هي قالت، أيوة قالت إيه؟ قالت إنها تونسية، أيوة انا تونسية هو أنا هنكر؟ لكن السيادة المصرية هي سيادة البلد الذي أنتمي له وعايشة فيه وبعمل فيه واتجوزت فيه وخلفت عيالي فيه، اللي عنده كلامي يجيبه صوت وصورة، وكل فنان عربي عايش في مصر وعارف خيرها وعايش بخيرها مش هينفع يقول أو يعمل حاجة عير كدة.