قصة مؤثرة – ناجي شحاتة يروي قصة مشهده أمام محمد رمضان الذي تم حذفه من فيلم "أسد"

FIlFan | فى سينما وتلفزيون

الفنان ناجي شحاتة يتحدث عن مشاركته في فيلم "أسد"

الاثنين , 11 مايو 2026 - 13:05

حكي الفنان ناجي شحاته عبر حسابه على "فس بوك" قصة مؤثرة دارت أحداثها في ثلاث سنوات، حول ترشيحه لدور بفيلم "أسد" أمام محمد رمضان، وكيف تم التصوير ثم إبلاغه بحذف مشهده في المونتاج.

قال ناجي شحاتة: بمناسبة فيلم " أسد " اللي نازل قريب في السنيمات ... حابب احكي حكاية.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

من سنتين كدة طلبوني اروح اعمل اوديشن لدور تاجر عبيد في الفيلم دة، اول ما عرفت إن مخرج الفيلم هوالمخرج العالمي الموهوب جدا محمد دياب تحمست جدا واتمنيت حقيقي اني اشتغل معاه، عملت الاوديشن وعرفت انهم اختاروني لدور تاني وهوشخص يمتلك مجموعة من العبيد وعرفت كمان إنه المخرج عجبته الاوديشن وقال إني ممثل "عبقري ".

طبعا كنت طاير من الفرح علشان دي شهادة جبارة من مخرج عظيم، فضلت مستني سنة ونص وعمال اقراء انهم بدأوا يصوروا في الفيلم بس ما حدش كلمني، قولت خلاص بقى مش مكتوبالي امثل الدور ده، وبلعت زعلي وخلاص.

فجاءة بعد سنة ونص كلموني يقولوا لي اني عندي تصوير بعد يومين .... بس يومها كان كمان عندي عرض مسرحية شغال فيها والمواعيد بدأت تتعارض.

الفنان ناجي شحاتة

من حسن الحظ عرفنا نظبط الدنيا وأول ما خلصت عرض المسرحية كان فيه عربية مستنياني علشان تاخدني على اللوكيشن في مدينة الإنتاج.

وصلت وبدأوا مسؤلين الملابس يجهزوا اللبس وكله تمام واصبحت جاهز للتصوير ومتحمس جدا .... بس فجاءة ....عرفت إنه مافيش تصوير يومها علشان النهار طلع وكان لازم مشهدي يكون ليل .

بعدها بيومين ....كلموني تاني وروحت جهزت واخيرا قابلت المخرج محمد دياب اللي شرحلي شوية انا لازم اعمل ايه وايه الاحساس الطاغي في المشهد امام محمد رمضان.

اتعرفت على محمد رمضان وعملنا بروفا ... وبدأنا التصوير....عملنا سبع مرات المشهد من جميع الزواية وبالرغم إنه كان مشهد عنيف جسديا شوية عليا بس كنت مبسوط اوي اوي لما المخرج جاء في الاخر يشكرني على المشهد . عبرت له عن مدى سعادتي اني اشتغلت مع مخرج جميل ومثقف زيه ورجعت بيتي متحمس بقى اني اشوف نفسي في الفيلم دة.

وعدت سنة ونص تانية وكل شوية يقولوا الفيلم في المونتاج .... متحمس وومنتظر بفارغ الصبر .

في رمضان إللي فات وانا في دهب لاقيت رسالة واتساب جيالي .... بصيت لاقيتها من محمد دياب شخصيا.

قلبي نط من السعادة .... معقولة دور تاني معاه في عمل جديد ُ؟

الملصق الدعائي لفيلم "أسد"

فتحت الرسالة....لاقيته بيعرفني بنفسه وبيقول لي انه اضطر يشيل المشهد بتاعي مع محمد رمضان مع اني عملته كويس اوي " دة عن لسانه " وإنه اوقات في المونتاج بيضطروا يعملوا كدة علشان طول الفيلم.

بداء قلبي يكاد يقف من الزعل ... بس في باقي الرسالة لاقيته بيقول لي إنه اهتم يبلغني بنفسه الكلام دة علشان هوحريص اني ما ازعلش وإنه شايف إنه كسب ممثل شاطر وصديق جميل.

بلعت زعلي وانا قاعد وحدي في اوضتي وقعدت افكر .... مشاعر متلخبطة جوايا.... من ناحية زعل واحباط وخيبة امل ومن ناحية تانية امتنان وسعادة إن مخرج عالمي زي الاستاذ محمد دياب يهتم ويبعتلي رسالة صوتية بالرقي دة علشان يعتذر ليا عن مشهد ماكانش هيتعدي دقيقة واحدة في الفيلم.

حسيت بجد اني محظوظ بالرغم إن المشهد اتحزف ... بس محظوظ إنه بالرغم من صغر الدور مخرج عالمي اخد باله من طريقة تمثيلي واهتم إنه يطبطب على قلبي.

متحمس جدا اني اروح اشوف الفيلم علشان متأكد إنه اخراجيا هيكون رائع.

مهما كان الدور صغير .... اتعلمت اني استمتع بكل تفاصيله .... هودة المهم ... شكرا جزيلا Mohamed Diab.

يذكر أن فيلم أسد تدور أحداثه في مصر في القرن التاسع عشر، ويتناول قصة أسد، العبد الذي يحمل روحاً صلبه متمرد، ويركز هذا العمل الدرامي التاريخي على رحلة أسد بعد أن يُشعِل حبٌ ممنوعٌ بينه وبين امرأة حرة شرارة المواجهة مع أسياده.

لكن عندما يُسلب من أسد أثمن ما يملك، يتحول التحدي الصامت إلى ثورة غاضبة، في صراع بطولي لا يضمن النجاة فيه لأحد، معركة أسد لن تحدد مصيره فقط، بل مصير العبودية في البلاد إلى الأبد، ويشارك في بطولة الفيلم: محمد رمضان، ورزان جمال، وعلى قاسم، وكامل الباشا، وإسلام مبارك، وإيمان يوسف، ومصطفي شحاته، بجانب ظهور خاص لكل من ماجد الكدواني وأحمد داش.

فيلم "أسد" من إخراج محمد دياب، تأليف شيرين دياب، محمد دياب، وخالد دياب، ووضع الموسيقى التصويرية للفيلم الموسيقار هشام نزيه، ومدير التصوير أحمد البشاري، مونتاج أحمد حافظ، ومصممة الأزياء ريم العدل.

اقرأ أيضا:

#شرطة_الموضة: تفاصيل بدلة باسل سماقية وفستان ابنته فلك في حفل زفاف ابنته فرح ... إطلالات تصل لـ2 مليون جنيه

ياسمين الخطيب بفستان لامع مكشوف الكتفين في جلسة تصوير جديدة احتفالا بعيد ميلادها

برسالة حب ودعم.. مي كساب تساند أوكا في انطلاق ألبومه الجديد

أحمد فهيم: ياسمين صبري أبهرتني بتعاملها وتواضعها مع الكل في فيلم "نصيب"

نرشح لك: حسام داغر يكشف لـ في الفن مواقف طريفة من دراسة الطب البيطري وقصة نسبه للرسول وذكريات أمير البحار

لا يفوتك: نجوم الفن والإعلام يودعون الفنان هاني شاكر

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5