شيرين عبد الوهاب: مشهد في فيلم "تايتنك" رجعني ... وكنت في فترة زي اللي بيتولد من جديد

مي جودة | فى حياة المشاهير

شيرين عبد الوهاب

الأحد , 26 أبريل 2026 - 00:04

أجرت النجمة شيرين عبد الوهاب مكالمة هاتفية مع الإعلامي عمرو أديب في برنامجه "الحكاية" للحديث عن عودتها بعد غياب وأغنيتها الجديدة "الحضن شوك".

قالت شيرين عبد الوهاب: "أنا بشتغل، الفترة اللي فاتت كانت زي حد بيتولد من جديد، فكانت محتاجة أكون في بيئة هادية مافيهاش أخبار، كنت زي في منتجع، واتعالجت من حاجات كتير كانت تعباني ومكسراني ودبحاني، بس الحمدلله وبفضل رب العالمين ودعواتكم ليا، مافيش إنسان محظوظ قدي، انا عندي جمهور بيدعي لي كإني واحدة من بناتهم ومن أسرتهم، من دمهم، وأنا بقول لهم، أنتم دمي وروحي وكل حاجة حلوة بتوقفني على رجلي بعد ربنا سبحانه وتعالى، أنا مش عارفة أقول لك ايه غير إني سعيدة أكتر بإن أنا انهاردة هنام وأنا مش خايفة ولا قلقانة ومدفية بحب الناس، زي ما بتدفى دايما بحضنهم، وانهاردة بالذات محتاجة منهم انهم يسمعوني".

وعن سبب عودتها في هذا التوقيت تحديدا، قالت شيرين عبد الوهاب: "اللي رجعني، المشهد العالمي اللي في فيلم تايتنك، لما حد بيحد حد على لوح خشب ويموت وهو بس التاني بيفضل لأن درجة الحرارة في البحر، انا جاية من هنا ومسكت الصفارة وناديت على القارب اللي هيجي ياخدني عشان أقول له إني لسه ماموتش، وإن أنا لسه عايزة اعيش وانجح، دا الترجمة الحقيقية للي جاية منه، جاية من كل كلام لذيذ وحلو فيه دعم ليا، ولما لقيت الدنيا كلها خايفين عليا وبيقولوا لي "مش دلوقتي"، انا عنيدة جدا، وقولت "لأ دلوقتي"، وزي ما انا هطلع مفيش حاجة تعيبني في شكلي، ممكن أكون زدت شوية، والكلام الفاضي دا، أنا بغني بروحي وجسمي وقلبي ومشاعري.. عاوزة الناس بس تسمعني.. مش عاوزة حاجة تاني، غير إني احس أن صوتي في بيوتهم وعربياتهم وتليفوناتهم.