هبة السيسي: شيلت 3 أورام وندمانه إني أخدت كيماوي

نهال ناصر | فى حياة المشاهير

هبة السيسي

الأربعاء , 8 أبريل 2026 - 11:28 | اخر تحديث: الأربعاء , 8 أبريل 2026 - 11:28

روت الفنانة هبة السيسي تفاصيل رحلتها مع اكتشاف إصابتها بمرض السرطان.

وقالت هبة السيسي خلال لقائها في برنامج "قعدة ستات" من تقديم مروة صبري: "أقل من سنة بحاجة بسيطة اكتشفت المرض وجالي انهيار عصبي ومكنتش مصدقة إن أنا جالي كانسر ورحت بالتحاليل والإشاعات كل ما اتأكد أن كل حاجة بتثبت وأنا مش مصدقة مكنتش متخيلة أن أنا في يوم من الأيام هبقى مريضة كانسر".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت لتحكي هبة السيسي رحلتها مع المرض: "قبل العملية مقولتش لحد أنا عندي إيه لأن كل واحد فينا عنده مشاكل ومش عايزة أشيل حد همي، لما حسيت أن أنا وصلت لمرحلة محتاجة الناس كلها تبقى حواليا ومحتاجة دعواتهم قلت إني عملت عملية وشيلت 3 أورام، أنا مكنتش هاخد كيماوي أخدته بعد العملية بشهر بعد ما أخدوا العينة وحللوها ولقولها مسرطنة ودا ليه معنى طبي أن السرطان هيهاجمني تاني وبسرعة فكان لازم أخد كيماوي في أسرع وقت".

نرشح لك: دنيا سمير غانم وحسن الرداد وهشام ماجد ومصطفى غريب من بينهم … النجوم في عيد ميلاد إيمي سمير غانم

وأكملت هبة السيسي: "ندمانة إني أخدت كيماوي، أنا أخدت 3 جرعات وبعد كل جرعة ربنا ما يوري حد ألم فظيع في العظام ومش بقدر اتحرك وصداع ومبشوفش تقريبا بتعمي ومش ببقى فاكرة أي حاجة ببقى قاعدة تايهة طول الوقت واكتئاب وبعيط، الجرعة بتتعبني جدا أنك تبقى مريض سرطان وبتاخد كيماوي حاجة صعبة جدا، في أسبوع بعد كل جرعة بقعد تعبانة وبفضل أقول يارب أنا مش قادرة استحمل، في اللحظة دي بقول لو رجع بيا الزمن مش هاخد كيماوي شكلي اتغير وشعري وقع وجسمي تاعبني مش قادرة امارس حياتي عادي".

وكانت هبة السيسي كشفت عن إصابتها بالسرطان وقالت في برنامجها "ميس إيجيبت" الذي تقدمه عبر قناة "الشمس" في أول ظهور لها بعد خضوعها لعملية جراحية: "النهاردة أول حلقة ليا بعد فترة صحية كانت صعبة جدا بعد إصابتي بالسرطان وعملت عملية كبيرة بس الحمد لله ربنا كرمني وعدت على خير".

وتابعت هبة السيسي: "حابه أطمن كل الناس اللي سألوا عليا وقلقوا عليا ودعولي من قلبهم أنا الحمد لله بقيت كويسة، بس الفترة اللي فاتت خلتني أحس يعني إيه دعوة طالعة بصدق من القلب ويعني إيه في ناس حلوة وجميلة موجودة واقفة في ضهري من غير مقابل، حابه أشكر كل الناس اللي سألت عليا سواء برسالة أو بمكالمة أو زيارة أو حتى دعوة لأن دعواتكم فرقت معايا جدا أنا كنت داخلة في موضوع كبير والحمد لله كلامكم الجميل وصلني وكان دعم ليا في وقت بجد أنا كنت محتاجة الدعم وكنتوا فعلا سند حقيقي ليا".

واختتمت هبة السيسي حديثها: "النهادرة أنا راجعة بطاقة جديدة وحابه أقول لأي حد بيمر بتجربة صعبة أنتوا أقوى مما تتخيلوا وربنا هيسخر لكم اللي يسندكم ويدعمكم ومفيش أقرب من ربنا في أي وجع شكرا ليكم جدا".