خاص محمود زيان مهندس الـAI في "الكاميرا الخفية" لـ"في الفن": في التصوير مكانوش عارفين إني حفيد سيد زيان وأصعب حلقة كانت محمد لطفي وعندنا كذا خطة عشان رد فعل الضيف

نهال ناصر | فى سينما وتلفزيون

محمود زيان

الأحد , 15 مارس 2026 - 14:08 | اخر تحديث: الأحد , 15 مارس 2026 - 14:08

تمكن برنامج "الكاميرا الخفية" من حجز مكانا ضمن الأكثر مشاهدة في رمضان 2026، يتحدث الجمهور عن عودة البرنامج والفريق الجديد المكون من مجموعة من الشباب تمكنوا جميعا من لفت الأنظار.

وواحدة من الفقرات المهمة في البرنامج فقرة الـAI، عندما يقوم النجم الضيف بتمثيل مشهد ويسأل تميم يونس مخرج البرنامج مهندس الـAI ويخبره قائلا "AI not good ساقط تعبير وجه ومنصة" وهي اللحظة التي تغضب النجم كثيرا.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

ويقدم دور مهندس الـAI الممثل الشاب محمود زيان، وتواصل FilFan.com معه ليعرفنا بنفسه وعن تجربته في البرنامج وصله قرابته بالنجم الراحل سيد زيان.

نرشح لك: هالة فاخر: فيه أعمال ندمانة عليها بعد مشوار فني طويل ووافقت بسبب الاحتياج المادي

في البداية تعرفنا على محمود زيان الذي أخبرنا عن نفسه قائلا: "أنا درست حقوق إنجليزي في جامعة عين شمس، ووالدي عنده مكتب محاماة بعد التخرج اشتغلت فيه ولحد دلوقتي، لكن حلمي طول عمري إني أكمل مسيرة جدي سيد زيان الله يرحمه وأدخل مجال التمثيل لأن طول عمري بحب الضحك والكوميديا، جدو هو اللي زرع في دماغي فكرة التمثيل من وأنا صغير كان شايفني مناسب للتمثيل".

محمود زيان وجده الفنان الراحل سيد زيان

وسألنا محمود زيان كيف جاءت مشاركته في برنامج "الكاميرا الخفية" وقال: "أخدت ورشة تمثيل مع مروة جبريل وبدأت الطريق من أول خطوة، رغم أن والدي يعرف منتجين وممكن يساعدني لكن هو عايزني أخد الطريق من الصفر، أنا مش عايز أطلع على حس أن جدي سيد زيان، مروة جبريل قالتلي أن في دور ارتجال وعايز ممثل عنده سرعة بديهة لأننا بنتحط في موقف مفيش إسكريبت حسب كل ضيف فلازم نكون جاهزين، رحت عملت "أوديشن" كان موجود تميم يونس والمخرج أحمد عساف، والحمد لله أخدت الدور، كانت أول مرة أنزل موقع تصوير في الأول كنت لسه جديد ومش فاهم بس هما كان عندهم صبر وشجعوني وساعدوني هما ناس محترمين جدا".

محمود زيان ومروة جبريل

وكشف محمود زيان أنه أخفى كونه حفيد النجم الراحل سيد زيان حتى لا يتم معاملته بشكل مختلف أو يشعر أنه دخل المجال بالواسطة قائلا: "وأنا في التصوير مكانوش عارفين إني حفيد سيد زيان إلا في أواخر الحلقات عشان ميبقاش في أي واسطة، كنت أقدر أدخل بواسطة لكن لما أبدأ الطريق بنفسي ولما أعلم مع الناس وبعد كده يعرفوا إني حفيد سيد زيان دا أحلى".

وحكى محمود زيان لنا عن دوره في المقلب وكيف يستفز الفنانين قائلا: "أي ممثل أكتر حاجة يكرها أن حد يعدل على أدائه ممكن نتقبلها من المخرج، لكن يطلع فجأة مهندس AI ويقول مش عاجبه، وأنا عايش جوه الدور قاعد طول الحلقة باصص قدامي ومركز أوي مع التصوير".

وسألنا محمود زيان عن كواليس الحلقات وما أصعب حلقة بالنسبة له وأكثر حلقة يحبها وقال لنا: "أصعب حلقة بالنسبة ليا كانت محمد لطفي كنت قلقان من رد فعله، وأكتر حلقة بحبها كانت حلقة محمد ثروت إحنا كنا خايفين حد فينا يضحك ونبوظ المقلب من كتر الإفيهات اللي بيقولها حتى في عصبيته وفي الخناق، أكتر حاجة مكانتش متوقعة لما الضيف بيبقى هيمشي دي أصعب لحظة وفريق الإنتاج وتميم بيتدخل في فنانين كتير كانوا بيتضايقوا من فقرة AI وبيقرروا يمشوا وإحنا بيبقى لسه في فقرة كمان كان في ساعات لما تميم والمخرج أحمد عساف يلاقوا الضيف اتضايق يقولولي فيبقى خلاص نعدي ونقول AI good، تميم يونس كان ذكي بيشوف الضيف يستحمل إيه وميستحملش إيه فنخلي الضيف يتعصب تدريجيا".

محمود زيان

وأكثر ما لفت انتباه الجمهور هو نهاية كل مقلب وكيف يتم الكشف للفنان عنها وسألنا محمود زيان كيف يتفقون على نهاية كل مقلب وقال: "نهاية كل مقلب بنعمل فيها تغيير عشان الجمهور ميزهقش، مرة ممكن نفضل نعيد المشهد كذا مرة، وبنبقى متفقين في البروفات يعني تميم مثلا يقول لو قلت كلمة كذا هنعمل كذا وكلنا بننسق مع بعض كل الممثلين بيبقوا عارفين هنعمل إيه، إحنا تيم كامل متناغم، دايما بيبقى عندنا كذا خطة عشان رد فعل الضيف".

وعبر محمود زيان عن سعادته بردود فعل الجمهور على البرنامج ودوره فيه قائلا: "مصدقتش إني طلعت "تريند" الدور كلمتين بس الحمد لله، بشكر ربنا جدا على رد فعل الناس وبدعي دايما أنها تكون بداية موفقة لحاجات تانية".

محمود زيان من برنامج الكاميرا الخفية

وبدأ محمو زيان مشواره ببرنامج كوميدي وجده هو واحد من نجوم الكوميديا في مصر فهل سيختار طريق الكوميديا في مشواره، وأجاب على هذا السؤال قائلا: "مش هقفل نفسي في الكوميدي أنا لازم أثبت نفسي في كل الأدوار، أنا بحب الكوميدي لكن لما روحت الورشة مع مروة جبريل بدأت اشتغل على جزء التراجيدي، مشهد التخرج بتاعي كان تراجيدي والناس عيطت فيه، أنا عايز أثبت إني ممثل في الأكشن والتراجيدي والكوميدي".

وكشف محمود زيان لنا عن أكثر الأعمال التي يحبها لجده الراحل سيد زيان: "بعشق مسرحية "العسكري الأخضر" وفيلم "المتسول" مع الأستاذ عادل إمام وبحب أغانيه صوته جميل جدا في المواويل".

اقرأ أيضا:

طارق لطفي: السوشيال ميديا سلاح ذو حديين والنجاح الحقيقي يظهر بالشارع والجمهور هو الحكم

إسلام ضحية نرجس بنت إبليس: حياتي مدمرة من سنين ونفسي أشوف أهلي الحقيقيين

سلوى عثمان: ندمانة على مشاركتي في "أب ولكن" ... الكواليس ماكنتش حلوة

منة فضالي تنفي خلافها مع ياسمين عبد العزيز: بحبها جدا ومبتعملش مشاكل

بيتر ميمي يرد على كابتن إيلا بعد تعليقها على مسلسل "صحاب الأرض"

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5