خاص طارق الدسوقي لـ"في الفن": اترددت في قبول "علي كلاي" والتسريبات المنتشرة مش النهاية وانتظروا مفاجآت في الحلقة الأخيرة

نهال ناصر | فى سينما وتلفزيون

طارق الدسوقي

الأربعاء , 4 مارس 2026 - 13:03 | اخر تحديث: الأربعاء , 4 مارس 2026 - 13:03

بعد غياب لفترة أطل علينا الفنان طارق الدسوقي بإطلالة مميزة ومختلفة عوضت الجمهور عن غيابه من خلال دور "منصور الجوهري" في مسلسل "علي كلاي".

بشكل مختلف وشخصية جديدة لم يقدمها من قبل ظهر الفنان طارق الدسوقي في المسلسل، وتواصل FilFan.com معه ليحدثنا عن كواليس عودته من جديد وسبب تحمسه لهذا الدور ورأيه في التسريبات التي انتشرت خلال الأيام الماضية عن نهاية المسلسل.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

في البداية سألنا الفنان طارق الدسوقي عن أكثر ما حمسه لمسلسل "علي كلاي": "أنا غايب بقالي فترة كبيرة وكان لازم لما أرجع يكون من خلال دور ولوك وعمل مختلف، كل حاجة في "علي كلاي" جديدة بالنسبالي لأن أول لقاء يجمعني بمحمد عبد السلام المخرج وبأحمد العوضي ودرة ويارا السكري معظم أبطال المسلسل أنا أول مرة اشتغل معاهم، أول لقاء يجمعي بشركة سينرجي شركة الإنتاج كل حاجة جديدة، اللوك والدور أول مرة أشارك في مسلسل يطلق عليه المسلسل الشعبي أو مسلسل الشارع، كل شيء جديد ومختلف تماما ودا اللي شجعني على قبول العمل والدور".

نرشح لك: ماجد المصري عن ظهوره في "رامز ليفل الوحش": عارف أنه رامز من الأول بس مكنتش عارف كم البهدلة

طارق الدسوقي

وتابع طارق الدسوقي: "في البداية كنت متخوف طبعا ومتردد جدا وخصوصا إني اعتذرت قبل كده عن أعمال أقرب للنوعية دي لكن اللي شجعني حاجات طمنتني منها إني قريت نص المسلسل قبل ما أبدأ التصوير، عرفت أنه دراما شعبية اجتماعية مفيهاش ابتذال أو إسفاف أو بلطجة وعنف، على الرغم من أن البطل بيحب لعبة الملاكمة لكنها لعبة رياضية محبوبة، وفي نفس الوقت مفيش بلطجة حتى المشاهد اللي فيها خناقات بتكون إما دفاع عن النفس أو بينصر حد مظلوم خناقة عادية من غير مطاوي وسيوف، مفيش تدخين أو شيشة دا طمني، الحاجة التانية أحمد العوضي كلمني والمخرج محمد عبد السلام والاتنين حسيت منهم بإصرار ورغبة أكيدة إني أبقى متواجد معاهم في هذا العمل".

وسألنا الفنان طارق الدسوقي عن ردود الفعل التي تلقاها عن المسلسل وقال: "ردود الفعل من الجمهور على السوشيال ميديا والجمهور اللي بقابله في الشارع في حفاوة كبيرة أوي بيا وبرجوعي للدراما بعد غياب ومرحبين جدا بالعودة وبيثنوا على الدور وأدائي وأني مخذلتهمش ولسه عندي الجديد اللي ممكن أقدمه".

طارق الدسوقي في مسلسل علي كلاي

يظهر طارق الدسوقي في دور تاجر كبير وهو دور جديد عليه لكنه يقدمه بأداء مختلف بعيدا عن الصوت المرتفع والصراخ، كما يظهر بشكل جديد تماما، وسألناه عن تفاصيل هذا اللوك وقال: "اللوك اللي ظهرت بيه دا الفضل ليه للمخرج محمد عبد السلام، الملابس والشكل اختيارهم كان ما بين المخرج والستايلست دينا نصير، الأداء تعاون مشترك ما بيني ووجهة نظري للدور وقناعاتي مع المخرج تفاصيل كنا بناقشها كتير، دور "منصور الجوهري" هو أصعب دور موجود كل الأدوار واضحة دا طيب دا شرير إلا "منصور" الناس مش هتبقى عارفة هو طيب ولا شرير، هو شخصية مركبة جواه تفاصيل نفسية كبير المنطقة وأكبر تاجر في المكان لكن في نفس الوقت مكسور وحاسس بالضعف قصاد "ألمظ" انتصار، اللي موتت أم "علي" وقبل كلامها وشروطها أنه يقول أن "علي" مش ابنه وأنه متبنيه، الصراع دا جواه لازم يبان دا اللي صعب الدور واعتقد أن الحمد لله الناس قدرت تحس بالتفاصيل دي اللي بتبان في نظرة عين أو رعشة إيد".

يضم المسلسل عددا كبيرا من النجوم وحدثنا طارق الدسوقي عن كواليس العمل معهم قائلا: "انتصار ومحمود البزاوي وبسام رجب ومعظم الجيل دا أنا اشتغلت معاهم قبل كده كتير أصدقاء وعشرة عمر، أحمد العوضي أول مرة اشتغل معاه هو لطيف جدا وكان مقرب المسافات بينا أنه أعلن أكتر من مرة إنه سعيد أنه بيمثل معايا وأني كنت من اللي حببوه في التمثيل، دا خلى المشاهد اللي بينا فيها تنافس على الجودة عايزين نقدم أفضل ما عندنا".

وعن أصعب المشاهد في المسلسل قال: "مش عايز أبالغ بس كل مشاهدي صعبة حتى المشاهد اللي تبدو عادية لكن بيكون جواها تفاصيل كتير صعبة لازم تبان بنظرة برعشة إيد، "منصور الجوهري" المشاهد اللي مش بيكون فيها بيتكلموا عنه هي شخصية محورية، لكن مشهد ضربي لأحمد العوضي بالقلم لما تسبب في أن كل العربيات اتحرقت دا كان من المشاهد الصعبة كل المشاهد دي بنقدمها بجدية وصدق".

طارق الدسوقي في شخصية منصور الجوهري

وخلال الأيام الماضية انتشرت فيديوهات لمشهد مسرب من المسلسل وتحدث البعض أنه نهاية العمل وانتشرت تسريبات وتوقعات كثيرة عن أحداث الحلقة الأخيرة، وقال طارق الدسوقي عن هذه التسريبات: "التسريبات دي مش مشهد النهاية دا مشهد هيبقى في الحلقة 23 تقريبا، والمسلسل 30 حلقة، ولا التسريبات اللي اتقالت فيها أي حاجة صح بالعكس في مفاجآت كتيرة جدا هتحصل الحلقات اللي جايه، ولغاية آخر حلقة الناس مش هتبقى عارفة أو مستنتجة النهاية إزاي".

وأضاف: "المشهد المسرب دا إحنا صورناه في وسط البلد بجد وكنا قاصدين دا أن بعض المشاهد تكون وسط الناس، وكنا بنشوف ردود فعل الناس وكانت أكثر ما توقعنا وإحنا تعبنا جدا في اليوم دا عشان نقدر نسيطر على العدد الكبير اللي كان موجود من الجمهور، كل الناس صورت بالموبايل ونشرت الفيديوهات وإحنا كنا عارفين دا ومتوقعين ومش ممكن هنغامر إننا نحرق المسلسل كان ممكن نصور المشهد دا في مدينة الإنتاج الإعلامي مثلا، يمكن التسريب دا أفاد العمل، لكن مفيش أي معلومة من اللي اتقالت صحيحة".

وكشف طارق الدسوقي أن أغلب أبطال المسلسل لم يعرفوا النهاية إلا مؤخرا مع قرب انتهاء التصوير قائلا: "آخر حلقتين في المسلسل مكانوش مع ولا ممثل مفيش غير المؤلف والمخرج وأحمد العوضي، دلوقتي طبعا الحلقات معانا لأننا فاضلنا أيام تصوير لكن في البداية مكناش عارفين".

وبعيدا عن مسلسل "علي كلاي" يطل الفنان طارق الدسوقي على جمهوره من خلال مسرحية "الملك لير" وقال عنها: "الملك لير إحنا واقفين في رمضان لكن يمكن تاني أيام العيد نرجع تاني على خشبة المسرح القومي، أنا سعيد جدا أن عودتي للناس من خلال المسرح والتلفزيون والإذاعة مختلفة وقوية، في المسرح بمسرحية "الملك لير" أعظم مسرحية اتقدمت على خشبة المسرح القومي مع النجم الكبير يحيى الفخراني ودا أقدم وأعرق مسرح في والعالم العربي، وهي مسرحية لوليم شكسبير وعامل دور مهم جدا جدا ولاقى نجاح كبير، 130 ليلة عرض والمسرح كامل العدد، والتليفزيون "علي كلاي" دراما شعبية جديدة عليا، والإذاعة بعمل مسلسل لإذاعة البرنامج العام مسلسل "سلطان العلماء العز بن عبد السلام"، أنا بحب الأعمال الدينية والتاريخية وقدمت العديد من الأعمال سواء في التليفزيون أو الإذاعة أو المسرح وبستمتع بالأداء باللغة العربية لأني بحبها وعارف قواعد اللغة من أكتر الحاجات اللي بتسعدني العمل باللغة العربية".

طارق الدسوقي في مسرحية الملك لير

وعن جديده قال طارق الدسوقي: "ابتدى يجيلي عروض لأعمال درامية بعد رمضان لسه مأخدتش قرار نهائي فيها، أنا بحب انتظر وأخد نفسي وأشوف ردود الفعل وأحسب الخطوة اللي جايه لأنها لازم تكون أعلى وأكبر من الخطوة دي".

اقرأ أيضا:

مواعيد عرض مسلسل "المتر سمير" لكريم محمود عبد العزيز

إيناس عز الدين: عرفت إني زوجة تانية وإحنا بنكتب الكتاب

فيديو - أحمد السقا: بقول لياسمين عبد العزيز برافو .. شدّي حيلك ومتخليش حاجة تأخرك

القائمة الكاملة بمسلسلات 15 حلقة في النصف الثاني من رمضان 2026

بيتر ميمي يرد على كابتن إيلا بعد تعليقها على مسلسل "صحاب الأرض"

حمل آبلكيشن FilFan ... و(عيش وسط النجوم)

جوجل بلاي| https://bit.ly/36husBt

آب ستور|https://apple.co/3sZI7oJ

هواوي آب جاليري| https://bit.ly/3LRWFz5